Në Castel Gandolfo, me Papën, zërat për paqe të koristëve të rinj dhe të Bocelli-t

Vatican News

“Kënga e Paqes”: kështu quhet mbrëmja e lutjes dhe e vëllazërimit, organizuar nga Qendra e Formimit të Lartë Laudato si' dhe nga Fondacioni Andrea Bocelli, që do të mbahet të mërkurën më 29 korrik, në Castel Gandolfo, në praninë e Papës Leoni XIV. Në orën 19.00, kopshtet e Vilave Papnore në Castel Gandolfo, kjo nismë do ta kthejë sërish Atin e Shenjtë në selinë e tij verore, pasi kaloi atje një muaj, për të filluar sërish punën në Vatikan, selia e tij romake, më 27 korrik . Aktiviteti është pjesë e kremtimeve për 800-vjetorin e kalimit të Shën Françeskut të Asisit në Shtëpinë e Atit Qiellor. Përmes “Këngës së Krijesave”, ai i la botës një vizion të vëllazërimit universal dhe të pajtimit, që ende sot pret të vihet në jetë.

Muzika si gjuhë universale

Në qendër të festës është muzika, me pjesëmarrjen e maestro Andrea Bocelli dhe korit ABF Voices. Ky kor përbëhet nga 164 fëmijë dhe të rinj nga vende të ndryshme, përfshirë Izraelin, Cisgjordaninë, Ugandën, Haitin dhe Italinë (Rione Sanità dhe Camerino). Fëmijët, që bartin histori të luftës, varfërisë dhe vuajtjes, tregojnë se arti dhe kënga mund të shërbejnë si gjuhë universale për dialogun, shpresën dhe pajtimin, duke bashkuar kultura dhe përvoja të ndryshme në një mesazh paqeje.

Një mesazh shprese

Ngjarja nuk është thjesht koncert, por simbol shprese dhe uniteti ndërmjet popujve. Përmes muzikës dhe lutjes, pjesëmarrësit do të reflektojnë mbi rëndësinë e paqes dhe vëllazërimit, vlera themelore që Shën Françesku i ka përfaqësuar dhe që vazhdojnë të frymëzojnë brezat e sotëm. Prania e Papës dhe pjesëmarrja e të rinjve nga kontekste të vështira theksojnë angazhimin për një të ardhme më të mirë, ku muzika dhe përshpirtëria mund të kontribuojnë në ndërtimin e urave ndërmjet kulturave të ndryshme.