“¡Que Dios bendiga a España!”. "Falenderimi" i Leonit XIV për udhëtimin apostolik
R.SH. / Vatikan
Nga dritarja e studios të Pallatit Apostolik, Papa Leoni XIV, pas lutjes mariane të Engjëllit të Zotit këtë të diele, 14 qershor, i shprehu mirënjohjen Zotit për udhëtimin e tij të katërt apostolik në Spanjë, që filloi më 6 qershor dhe përfundoi më 12. Në Sheshin e Shën Pjetrit, me 20,000 shtegtarë nën një diell tashmë veror, para se të fillonte lutja, jehonin akordet e këngës "Alza la mirada", frymëzuar nga motoja e udhëtimit të Ipeshkvit të Romës në Gadishullin Iberik. Papa, që vizitoi Madridin, Barcelonën, Gran Canarian dhe Tenerifen, shprehu mirënjohjen për ipeshkvijtë, rregulltarët e rregulltaret si dhe të gjithë besimtarët spanjollë që, në çdo fazë të vizitës së tij, e pritën me gëzim e dashuri të madhe. Përpara se ta bekojë gjithë vendin, Papa falënderoi në veçanti sovranin, Mbretin Felipe VI.
Shpreh posaçërisht mirënjohjen time ndaj Zotit për udhëtimin apostolik që më lejoi ta bëj në Spanjë. Falënderoj popullin spanjoll që më priti me entuziazëm e devocion. Jam veçanërisht mirënjohës ndaj Madhërisë së Tij Mbretit. Falënderoj me dashuri ipeshkvijtë, të gjitha komunitetet që vizitova dhe mbarë Kishën në Spanjë. ¡Que Dios bendiga siempre a España!
Afërsi me popullin e Filipineve të goditur nga tërmeti
Mendimet e Papës më pas shkuan te populli i Ishujve Filipine, i goditur të hënën e kaluar, më 8 qershor, nga një tërmet me magnitudë 7.8, me qendër kryesisht ishullin Mindanao në jug të vendit, që shkaktoi mbi 60 vdekje, qindra të plagosur dhe mbi 32,000 të zhvendosur.
I siguroj afërsinë time popullit të Filipineve, të goditur pak ditë më parë nga një tërmet i fuqishëm. Lutem për të ndjerit dhe familjet e tyre, për të plagosurit dhe për të gjithë ata që vuajnë nga kjo fatkeqësi.
Të lumtë e rinj, mbështetje për të gjithë Kishën
Më pas kujtoi të lumtë e rinj, me shpresë që shembulli i tyre të shërbejë si frymëzim për meshtarë të tjerë. Më 6 qershorin e kaluar, Jan Bula dhe Václav Drbola, meshtarë çekë të martirizuar nga komunizmi, u shpallën të lum në Brno të Republikës Çeke. Po atë ditë, në Krakov të Polonisë, në Shenjtëroren e Shën Gjon Palit II, i cili i njihte, u lumnuan edhe Jan Świerc me tetë shoqërues, priftërinj salezianë, viktima të persekutimit nazist.
Sot pasdite në Brno, do të festohet lumnimi i dy meshtarëve të parë çekë të martirizuar nga komunizmi. Do të doja të përmendja edhe disa të lum të rinj. Priftërinjtë dioqezanë Wenceslas, Drobla dhe John Bula të Moravisë. Edhe John Schwerz dhe tetë shoqërues, priftërinj salezianë polakë. Të gjithë u shpallen të lum si martirë, pasi kishin qenë viktima të persekutimit nga regjimet totalitare për besnikërinë e tyre ndaj Krishtit.
Pastaj Papa kujto se, dje, më 13 qershor, në famullinë e Jauru, Brazil, ku kishte shërbyer për 30 vjet, misionari italian, Atë Nazareno Lanciotti, u lartua në nderime të altarit. U vra në shenjë hakmarrjeje për luftën e tij kundër trafikut të drogës dhe prostitucionit.
Për më tepër, dje, në Mato Grosso, Brazil, u shpall i Lum Nazareno Lanciotti, një meshtar dhe misionar romak. Edhe ai ishte martir. Sepse në emër të Ungjillit, ai mbrojti më të varfrit. Ndërmjetësimi i këtyre dëshmitarëve të guximshëm e mbështet misionin e priftërinjve dhe të të gjithë Kishës.
Rritje në Bashkësi me "Dishepujt e Krishtit"
Papa përdori anglishten për të falënderuar "Komisionin Ndërkombëtar për Dialog të Dishepujve të Krishtit dhe Kishës Katolike" për punën e tij të rëndësishme teologjike, një organizatë e themeluar në vitin 1977 e për të nxitur mirëkuptimin e ndërsjellë dhe rrugën drejt unitetit të krishterë.
U shpreh përshëndetjet e mia anëtarëve të Komisionit Ndërkombëtar për Dialog midis Dishepujve të Krishtit dhe Kishës Katolike. Reflektimet tuaja le të na ndihmojnë të rritemi në bashkësi.
Së fundi, u shpreh përshëndetjet e mia shumë shtegtarëve nga Shtetet e Bashkuara të Amerikës, Shteti i New Jersey-t dhe komuniteteve të tjera të pranishme në shesh.
