Papa mbledh kardinalët më 26-27 qershor për të diskutuar sfidat e Kishës dhe të botës
Vatikan News
Papa Leoni XIV do të mbledhë më 26 dhe 27 qershor kardinalët nga e gjithë bota në Vatikan për një Koncistor të Jashtëzakonshëm, kushtuar reflektimit mbi sfidat me të cilat përballet sot Kisha Katolike dhe shoqëria ndërkombëtare.
Takimi do të zhvillohet pak ditë para solemnitetit të Shenjtorëve Pjetër dhe Pal dhe është i dyti që Papa Prevost organizon me Kolegjin e Kardinalëve, pas atij të mbajtur në janar. Në qendër të diskutimeve do të jenë temat e paqes, konfliktet që po prekin shumë vende të botës, misioni i Kishës në rrethanat e sotme dhe zbatimi i procesit sinodal.
Gjatë dy ditëve të punimeve, kardinalët do të reflektojnë mbi ndikimin që luftërat, tensionet dhe ndarjet kanë në jetën e popujve dhe të bashkësive kishtare. Ata do të kërkojnë gjithashtu mënyra konkrete për të nxitur pajtimin, bashkëjetesën dhe paqen, si dhe për të forcuar dëshminë e Ungjillit në botën e sotme.
Puna do të zhvillohet sipas metodës sinodale, e cila bazohet në dëgjimin e ndërsjellë, dialogun, lutjen dhe reflektimin e përbashkët. Kardinalët do të ndahen në 20 grupe pune dhe do të marrin pjesë në katër sesione, ku secili do të ketë mundësi të japë kontributin e vet mbi temat e trajtuara.
Një pjesë e rëndësishme e diskutimeve do t’i kushtohet edhe enciklikës së Papa Leonit XIV, «Magnifica Humanitas», e cila trajton dinjitetin e njeriut, kulturën e solidaritetit dhe përgjegjësinë e përbashkët për të ndërtuar një botë më të drejtë dhe më paqësore.
Sipas programit, sesioni i parë do të përqendrohet në pyetjen se si Kisha mund ta shpallë Ungjillin në botën e sotme dhe cilat janë sfidat kryesore që përjetojnë besimtarët. Sesionet pasuese do të trajtojnë kulturën e pushtetit dhe qytetërimin e dashurisë, ndërtimin e së mirës së përbashkët dhe rrugën e zbatimit të Sinodit në vitet e ardhshme.
Për të ruajtur një atmosferë të lirë dhe vëllazërore diskutimi, kardinalëve u është kërkuar të mos bëjnë deklarata publike gjatë zhvillimit të Koncistorit dhe të respektojnë konfidencialitetin e debateve.
Takimi do të përmbyllet me një dialog të hapur ndërmjet Papës dhe kardinalëve, pas të cilit Leoni XIV do të mbajë fjalimin përfundimtar. Më 29 qershor, Papa do të kryesojë Meshën solemne të Shenjtorëve Pjetër dhe Pal në Bazilikën e Shën Pjetrit.
