Papa Leoni: mbrojtja e të miturve 'është detyrim' për Kishën

Vatican News

Papa Leoni i bëri këto vërejtje para audiencës së tij të përgjithshme të mërkurën për anëtarët e «Qendrës për kërkim dhe trajnim për mbrojtjen e të miturve», një organizatë ndërdisiplinore latino-amerikane që përqendrohet te parandalimi i abuzimit dhe mbështet mbrojtjen e vogëlushëve.

Ati i Shenjtë Prevost tha se ishte i kënaqur që po priste përfaqësues nga vende të ndryshme latino-amerikane me një qëllim shumë të qartë të përbashkët: për punë që bashkësitë kishtare të jenë vende të sigurta për të gjithë, veçanërisht për fëmijët, adoleshentët dhe njerëzit më të cënueshëm. Papa Leoni u theksoi atyre dëshirën e tij që "të gjitha hapësirat në Kishë, qofshin fizike apo virtuale, të jenë vërtet vende për një takim të frytshëm me Jezu Krishtin, ku të mos ketë frikë , dyshime ose mosbesim.”

Nevoja për hapësira të sigurta

“Faleminderit që jeni këtu dhe që kryeni këtë detyrë shumë të rëndësishme.”

Ati i Shenjtë Leoni XIV i ftoi pjesëmarrësit të shqyrtojnë mirë se si dishepujt e parë, që nga çasti kur takuan Jezu Krishtin, u mrekulluan – një takim që shënoi jetën e tyre dhe i bëri të nisnin një rrugë kthimi në fenë e vërtetë, deri sa iu dorëzuan Atij pa rezerva.

Kjo përvojë, vërejti ai, nuk është diçka nga e kaluara, sepse të gjithë njerëzit janë të thirrur të takojnë Zotin e Ringjallur dhe të fitojnë një përvojë të vërtetë dashurie me Zotin. Por për ta arritur këtë, theksoi Papa Leoni, “është e nevojshme që të kemi hapësira të sigurta.” Abuzimi, nënvizoi Papa, shkakton trauma të mëdha dhe e prish zhvillimin shpirtëror dhe njerëzor të individit.

Jezusi bënte thirrje për mbrojtjen e të vegjëlve

Duke iu bindur paralajmërimit të vetë Zotit, tha Papa, qendra themeloi misionin e saj, “duke iu përgjigjur thirrjes së Krishtit kur na kujton nevojën që të mos bëhemi shkandull për të vegjëlit (krh. Mt 18:6).”

Më pas, Papa Leoni kujtoi se gjatë udhëtimit të tij apostolik në Spanjë javën e kaluar, foli me ipeshkvijtë për dhimbjen e atyre që janë plagosur nga ata që duhej të ishin kujdesur për ta, duke i quajtur këto situata, para të cilave, "bashkësia kishtare është e thirrur të përgjigjet duke i dëgjuar mirë, me vërtetësi, me drejtësi, duke i dëmshpërblyer dhe duke marrë angazhim gjithnjë e më të vendosur për parandalimin e tyre dhe nxitjen e kulturës së kujdesit për të miturit".

Një detyrim për të gjithë Kishën

"Kjo detyrë, sadoqë është kryesisht përgjegjësi e atyre prej nesh që janë të thirrur për të qenë barinj", këmbënguli Papa Leoni, "është një detyrim për të gjithë në Kishë, dhe disa, si ju, e kanë marrë përsipër atë edhe në fushën profesionale".

Papa Leoni i falënderoi të pranishmit dhe në të njëjtën kohë u dha zemër "të vazhdojnë përpara me këtë punë të madhe, duke forcuar rrjetet e bashkëpunimit mes Kishave vendase dhe institucioneve civile, duke mbështetur kulturën e parandalimit dhe të kujdesit për më të cënueshmit".

Në mbyllje, Ati i Shenjtë Leoni XIV, pasi ua besoi përpjekjet e tyre Zojës së Bekuar, që ata të vazhdojnë të punojnë për këtë mision dhe në mënyrë që, gjithnjë e më shumë, e gjithë bashkësia kishtare të përfshihet në të, u dha pjesëmarrësve bekimin e tij apostolik.