Leoni XIV: fitimi nuk mund të jetë zot, shoqëria ka nevojë për qytetërimin e dashurisë

Vatican News

Papa Leoni XIV ka bërë një thirrje të fortë për të vendosur njeriun dhe dashurinë në qendër të jetës ekonomike, politike dhe kulturore, duke paralajmëruar se adhurimi i fitimit si vlerë supreme rrezikon të çnjerëzojë shoqërinë. Mesazhi i Papës u përcoll me rastin e edicionit të parë të “Dialogëve të Borgos”, një takim ndërkombëtar i zhvilluar në Castel Gandolfo, ku u mblodhën përfaqësues të botës së biznesit, universiteteve, organizatave joqeveritare, shoqërisë civile dhe Kishës për të reflektuar mbi sfidat e mëdha të kohës sonë.

Në fjalën drejtuar pjesëmarrësve, Papa Leoni XIV e përshkroi këtë nismë si fillimin e një procesi të ri, që synon të rigjallërojë udhëheqjen morale në një botë gjithnjë e më të fragmentuar dhe të shkëputur nga rrënjët e saj historike e shpirtërore. Sipas Atit të Shenjtë Prevost bota e sotme ka nevojë për rrugë të reja dialogu dhe bashkëpunimi, të afta për t’i shërbyer së mirës së përbashkët dhe për të garantuar një jetë dinjitoze për çdo njeri.

Gjatë takimit të “Dialogëve të Borgos” në Castel Gandolfo u diskutuan tema të ndryshme, nga inteligjenca artificiale dhe ndikimi i saj mbi njerëzimin, te plakja, sporti, diplomacia dhe qëndrueshmëria. Në këtë kontekst, Papa nënvizoi rëndësinë e dëgjimit të ndërsjellë dhe të kërkimit të përbashkët të zgjidhjeve për sfidat globale.

Duke iu referuar figurës biblike të Kullës së Babelit, Leoni XIV paralajmëroi kundër një modeli shoqëror që vendos fitimin mbi dinjitetin e njeriut. Një qasje e tillë, tha Ati i Shenjtë, rrit pabarazitë, dëmton më të pambrojturit dhe ushqen proceset e çnjerëzimit. Përballë këtij rreziku, Papa ftoi të gjithë të angazhohen në ndërtimin e “Jeruzalemit të Ri”, të cilin e përshkroi si qytetërimin e dashurisë, ku dashuria bëhet kriteri themelor i vendimmarrjes ekonomike, politike dhe kulturore.

Në përfundim, Leoni XIV shprehu mirënjohjen e tij për pjesëmarrësit dhe i inkurajoi të vazhdojnë këtë rrugëtim, duke bashkuar njohurinë lokale me përgjegjësinë globale. Ai uroi që secili të bëhet një ndërtues i përulur i një bote më njerëzore, ku çdo person gjen jo vetëm përgjigje për nevojat materiale, por edhe kujdes, respekt, fjalë të mira dhe përzemërsi.