Corpus Domini, Papa: procesionet, “dëshmi e guximshme e fesë"
R.SH. / Vatikan
Të ecësh pas të Shenjtnueshmit Sakrament të Eukaristisë për të kujtuar se Zoti është ndërmjet nesh, e në krahun tonë. Këtë e theksoi Papa Leoni XIV në përshëndetjet në gjuhë të ndryshme gjatë audiencës së sotme të përgjithshme, duke kujtuar Solemnitetin e Corpus Christi, që bie nesër, më 4 qershor. E duke iu drejtuar shtegtarëve italianë, Leoni XIV foli për kuptimin dhe rëndësinë e procesioneve, që zhvillohen në këtë ditë.
Në Eukaristi kundrojmë Jezusin, bukën e thyer, të dhënë për secilin prej nesh. Procesionet me Sakramentin e Shenjtë të Eukaristisë, që zhvillohen në rrugët e shumë qyteteve, janë shprehje e devotshmërisë popullore eukaristike; në këtë drejtim, ju inkurajoj ta mbani gjallë manifestimin e bukur të dëshmisë publike të fesë.
Zoti me ne
Një mendim i përsëritur edhe në përshëndetjet drejtuar besimtarëve polakë, duke u kujtuar se Jezusi është i gjallë dhe ecën me ne.
Pjesëmarrja në procesionet eukaristike - veçanërisht nga ana e familjeve, fëmijëve dhe të rinjve - të jetë dëshmi e guximshme e fesë dhe t’u kujtojë të gjithëve se Zoti është i pranishëm në mes të popullit të tij dhe e shoqëron në jetën e përditshme.
Dëshmitarë të dashurisë së Tij
Papa Leoni, në përshëndetjen e tij drejtuar shtegtarëve anglishtfolës, u përqendrua më pas në forcën që ofron Eukaristia.
Ndërsa përgatitemi për Solemnitetin e Korpit e të Gjakut të Jezu Krishtit, të forcohemi nga kjo dhuratë hyjnore dhe të bëhemi dëshmitarë të dashurisë së tij për të gjithë ata që e takojnë.
Një zemër durimtare e bujare
Besimtarëve portugalishtes, Papa u kujtoi se qershori është muaji i kushtuar Zemrës së Krishtit. Ftesa e Papës është t'i afrohemi Atij për të ndryshuar zemrat tona.
Të dashur vëllezër e motra, në këtë muaj kushtuar Zemrës së Shenjtë të Jezusit, t’i afrohemi më shumë gurrës së mëshirës dhe butësisë së Zotit, në mënyrë që i Ngjalluri t’i shndërrojë zemrat tona, t’i bëjë më të durueshme, më bujare, më të dhembshura.
Në përshëndetjet, mendimi i Papës shkoi te meshtarët dhe rregulltarët e Lindjes së Mesme, të cilëve u siguroi lutjet dhe bekimin e tij për shërbesën e tyre dhe “pritjet e vendeve të tyre përkatëse”.
