Barcelonë, Papa takon delegatët e MED26: sfidat dhe shpresa e Mesdheut
R.SH. - Vatikan
Pasditja e Papës Leoni XIV në Barcelonë u karakterizua nga një sërë takimesh të rëndësishme, si në nivel institucional ashtu edhe pastoral. Në qytetin katalanas, Ati i Shenjtë Leoni XIV u takua me ipeshkvij, të rinj dhe përfaqësues të ndryshëm të shoqërisë civile që po marrin pjesë në Takimin Mesdhetar MED26, i cili zhvillohet në Barcelonë deri më 12 qershor. Mesazhi i Papës ishte i qartë: të punojmë së bashku për ta bërë botën një vend më të drejtë, më paqësor dhe më vëllazëror.
Sipas njoftimit të Zyrës së Shtypit të Selisë së Shenjtë, sot më 9 qershor Papa zhvilloi disa takime në selinë e Kryeipeshkvisë së Barcelonës. Ndër to ishte edhe biseda me presidentin e Generalitat de Catalunya, Salvador Illa i Roca, e cila zgjati rreth pesëmbëdhjetë minuta. Në përfundim të saj, Leoni XIV përshëndeti bashkëpunëtorët e presidentit. Më pas, Leoni XIV iu drejtua Komitetit Organizator të vizitës apostolike, duke shprehur mirënjohjen për përkushtimin dhe punën e kryer gjatë përgatitjeve. Takimi përfundoi me bekimin e Papës për të gjithë të pranishmit.
Drejt brigjeve ku pritet Ungjilli
Një moment i veçantë ishte takimi me rreth 200 pjesëmarrësit e MED26. Duke iu drejtuar atyre, Papa i ftoi të jenë njerëz në udhëtim, jo vetëm në kuptimin fizik, por edhe në atë shpirtëror, duke arritur në ato brigje ku njerëzit presin një fjalë shprese, paqeje dhe vëllazërimi. Leoni XIV u ndal edhe te sfidat e shumta që përballon sot rajoni mesdhetar, me një vëmendje të veçantë ndaj situatës në Lindjen e Mesme. Ati i Shenjtë shprehu vlerësimin e tij për angazhimin e pjesëmarrësve në ndërtimin e urave të dialogut dhe të bashkëjetesës, duke theksuar se:
“Diversiteti është një pasuri dhe pikërisht në diversitet mund të gjejmë unitetin”.
Papa i falënderoi për përpjekjet e tyre në shërbim të paqes dhe të së mirës së përbashkët, duke i inkurajuar të vazhdojnë të jenë dëshmitarë të kulturës së takimit dhe të solidaritetit. Takimi përfundoi me lutjen e përbashkët të lutjes së Atë Ynës, në një atmosferë bashkimi dhe shprese.
MED26 i kushtohet temës së ndërtimit të paqes në Mesdhe. Kujtojmë se më 12 mars të këtij viti, Papa Leoni XIV pati pritur në Vatikan një delegacion të Zyrës së Koordinimit Kishtar të Mesdheut, të kryesuar nga kardinali Jean-Marc Aveline, duke i nxitur të vazhdojnë nismat në favor të edukimit për paqen dhe promovimit të kulturës së takimit ndërmjet popujve.
