Vizita e Papës në spitalin psikiatrik, një mesazh "i fortë" për shëndetin mendor

R.SH. – Vatikan

Në Spitalin Psikiatrik Jean-Pierre Olie në Malabo, Guinea Ekuatoriale, përgatitjet janë në kulmin e tyre për vizitën e Papës Leoni. Logoja zyrtare e Udhëtimit Apostolik, që përmban moton "Krishti, drita e Guinesë Ekuatoriale, drejt një të ardhmeje me shpresë", është vendosur në pjesën e jashtme të ndërtesave, dhe rreshta karrigesh janë renditur në një pavijon qendror ku pacientët dhe stafi do të mblidhen për të dëgjuar Papën. "Është një nder i madh", thotë Prof. Bechir Ben Hadj Ali, mjeku tunizian që shërben si Drejtor i Përgjithshëm i spitalit. Vizita e Papës është një "gjest jashtëzakonisht i rëndësishëm", thekson ai, i cili do të vërë në qendër të vëmendjes rëndësinë e shëndetit mendor në Guinenë Ekuatoriale dhe në mbarë botën.

Objekti shëndetësor, i vetmi i këtij lloji në vend, u themelua një dekadë më parë dhe filloi me vetëm njëzet e pesë shtretër. Tani ka 146, të ndarë në gjashtë reparte. Për momentin, ai po kujdeset për rreth 125 pacientë (100 burra dhe 25 gra) që jetojnë me psikozë, depresion, ankth dhe varësi nga substancat. Në dhjetor 2025, spitali u riemërua në nder të psikiatrit të njohur francez Jean-Pierre Olié, i cili luajti një rol kyç në ngritjen e tij. Mbështetja e Zonjës së Parë Constancia Mangue de Obiang ishte gjithashtu thelbësore, thotë Prof. Ben Hadj Ali. Në mbarë botën, por veçanërisht në Afrikë, thekson mjeku tunizian, shëndeti mendor shpesh konsiderohet gabimisht si i një rëndësie "dytësore".

Vizita e Papës dërgon kështu një mesazh "shumë të fortë" mbi rëndësinë e kujdesit për ata që vuajnë nga sëmundjet mendore. Dr. Engracia Asangono Nchuchuma, zëvendësdrejtoreshë e spitalit, shpjegon se struktura ka evoluar së fundmi drejt një modeli të kujdesit të bazuar në komunitet. Spitali jo vetëm që ofron konsulta psikiatrike dhe psikologjike ambulante nga e hëna në të premte, por ka edhe një ekip lëvizës që udhëton për t'u kujdesur për pacientët të cilët, për arsye të ndryshme, nuk mund të marrin pjesë në kontrollet e tyre. Përveç kësaj, së fundmi ka hapur një njësi të psikiatrisë fëmijërore për të ndihmuar kërkesën në rritje midis të miturve. Po bëhet gjithashtu edhe një përpjekje për të përmbushur nevojat shpirtërore të pacientëve, thotë Dr. Asangono Nchuchuma, duke përfshirë kremtimet e Meshës dhe, së fundmi, përgatitjen për vizitën papnore. Kur Papa Leoni të mbërrijë, thekson ajo, ai do të "ndihmojë të gjithë t'i shohin njerëzit me sëmundje mendore jo si individë që duhen izoluar, por për t'u integruar në komunitetet tona".