Papa: përdorimi i energjisë atomike qoftë në shërbim të jetës e të paqes
R.SH. / Vatikan
Në orën 1:23 të mëngjesit, më 26 prill 1986, një mosfunksionim në reaktorin numër 4 të centralit bërthamor të Çernobilit, pranë Kievit, në Ukrainë, shkaktoi aksidentin më të madh në historinë e energjisë bërthamore. Shpërthimi shkatërroi brendinë e ndërtesës, duke lëshuar një re të frikshme tymi radioaktiv në atmosferë. Përpara se të përhapej në të gjithë Evropën, ndoti zona të gjera të Ukrainës, Bjellorusisë dhe Rusisë, duke detyruar zhvendosjen e mijëra njerëzve. Njerëz, që nuk u kthyen kurrë më në shtëpitë e tyre e që e braktisën përfundimisht një territor të gjerë, që ende konsiderohet "i pabanueshëm".
Në përvjetorin e katastrofës më të keqe bërthamore në histori, e cila shkaktoi dëme të panumërta në shëndetin e njeriut dhe keqformime të rënda gjenetike tek fëmijët e palindur, lartohet sot zëri i Papës:
Sot kujtohet përvjetori i dyzetë i aksidentit tragjik të Çernobilit, i cili e preku thellësisht ndërgjegjen e njerëzimit. Ai mbetet paralajmërim për rreziqet e natyrshme në përdorimin e teknologjive gjithnjë e më të fuqishme. Ia besojmë mëshirës së Zotit viktimat dhe të gjithë ata që ende vuajnë pasojat.
Në shërbim të jetës e të paqes
Shkallëzimi ushtarak në Lindjen e Mesme dhe konflikti në Zaporizhzhia, Ukrainë, ringjallën alarmin global mbi sigurinë e reaktorëve dhe të gjithë familjes njerëzore, të kërcënuar në shumë fronte nga energjia bërthamore. Prandaj, Papa Leoni këmbëngul në përgjegjësinë e qeverive:
Shpresoj se gjykimi dhe përgjegjësia do të mbizotërojnë gjithmonë në të gjitha nivelet e vendimmarrjes, në mënyrë që çdo përdorim i energjisë bërthamore të jetë në shërbim të jetës dhe të paqes.
E pasi përshëndeti grupet e shumta të pranishme në Sheshin e Shën Pjetrit, Ati i Shenjtë Leoni XIV u drejtoi një mendimi të veçantë familjeve dhe miqve të dhjetë meshtarëve të rinj, të shuguruar këtë paradite në Bazilikën e Shën Pjetrit: "Shoqërojini gjithnjë me lutje këta shërbëtorë të rinj të Ungjillit", tha Papa.
Një përshëndetje e veçantë ishte për mbi 70 fëmijët e grupit të vallëzimit "Malva" nga Brovary, Ukrainë, të cilët erdhën në Romë për t'i sjellë Papës Leoni një mesazh paqeje, shkruar në gjethet e një peme.
