Papa mes jetimëve të Yaoundé: “e ardhmja juaj është më e madhe se plagët tuaja”
R.SH. / Vatikan
Leoni XIV, gjatë udhëtimit të tij apostolik në Afrikë, viziton Kamerunin, vendi i dytë. Në këtë kontekst, Papa vizitoi jetimoren Ngul Zamba në Yaoundé, një institucion që ofron strehim dhe mbështetje për fëmijë dhe të rinj.
“Ne nuk jemi jetimë… Ne jemi bij të Zotit… Kisha është familja jonë… Ati i Shenjtë është ati ynë”.
Nuk ka vetëm ankim, por shpresë në këngën që fëmijët e jetimores së Yaoundé “Ngul Zamba” (fjalë për fjalë “Forca e Zotit”) ia kushtojnë Leonit XIV. Papa, në përfundim të ditës së parë të udhëtimit apostolik në Kamerun, ka dashur që, pas takimit të zakonshëm institucional me presidentin dhe autoritetet në Pallatin Presidencial, të zhvillojë një moment baritor duke vizituar këtë strukturë që strehon rreth gjashtëdhjetë fëmijë dhe të rinj të moshave të ndryshme: nga 3 deri në 20 vjeç.
Kjo jetimore ka një histori të vështirë, me strehimin e fëmijëve të braktisur nga familjet e tyre, disa prej të cilëve kanë aftësi të kufizuara, ndërsa të tjerë janë përjashtuar nga institucione të tjera për shkak të përfshirjes në krime ose përdorimin e drogës.
Në takimin me ta, Papa përçoi një mesazh të fuqishëm shprese dhe inkurajimi, duke u thënë atyre se “Zoti është gjithmonë i pranishëm, edhe nëpërmjet vuajtjes, dhe që askush nuk është kurrë i harruar nga Ai”. Leoni XIV theksoi se “në sytë e Zotit, të gjithë janë të barabartë, dhe se askush nuk është "i huaj" në familjen e madhe të Zotit”.
Leoni XIV shprehu mirënjohjen e tij që kishte mundësinë të vizitonte një vend si Ngul Zamba, ku ndihma dhe dashuria janë elementët themelore të mbijetesës. Me një mesazh të qartë, Papa u tha fëmijëve dhe rinisë të mos e lejojnë të kaluarën e tyre të vështirë të përcaktojë të ardhmen e tyre. Duke iu drejtuar atyre, Ati i Shenjtë theksoi se ata janë "bartës të një premtimi", një të ardhme që është "më e madhe se plagët e tyre". Papa gjithashtu theksoi se “Zoti është i pranishëm në çdo moment të jetës, dhe se gjithçka që ata kanë kaluar, për Zotin është e njohur”.
“Aty ku mund të ketë varfëri, vuajtje apo padrejtësi, Zoti është i pranishëm dhe është gjithmonë pranë jush”, tha Papa, duke shtuar se “fëmijët janë të veçantë për Zotin, sepse Jezusi ka pasur gjithmonë një dashuri të veçantë për ta dhe i ka vendosur ata në qendër të vëmendjes”.
Një tjetër aspekt i rëndësishëm i mesazhit të Papës ishte inkurajimi për "vëllazërimit" që ekziston në këtë jetimore, kjo përmasë është një mbështetje e fuqishme për të përballuar vështirësitë e jetës. Vëllazëria, tha Ati i Shenjtë, është thelbësore për të kaluar përmes dhimbjeve dhe mundimeve që këta fëmijë dhe të rinj kanë kaluar në jetën e tyre. Leoni XIV u foli edhe mësuesve dhe edukatorëve të Ngul Zamba, duke vlerësuar kontributin e tyre të pashtershëm në mbështetje të këtyre fëmijëve, duke i ofruar atyre jo vetëm mbështetje materiale, por edhe një të ardhme e një mundësi për të zhvilluar potencialin e tyre.
Papa Leoni XIV e përshkroi vizitën e tij si një mundësi për të përçuar "përdëllimin e Zotit" dhe për të treguar dashurinë e tij të pandërprerë për të gjithë ata që përballen me vuajtje dhe varfëri. Ati i Shenjtë e vlerësoi punën e shumë edukatorëve, vullnetarëve dhe motrave të Kongregatës së Shën Marisë, të cilët çdo ditë janë angazhuar për të ofruar një mbështetje të plotë fëmijëve të këtij institucioni, duke u siguruar atyre jo vetëm mbijetesë, por gjithashtu mundësi për zhvillim moral dhe shpirtëror.
Në një moment emocional të takimit, Papa theksoi se ata që ofrojnë kujdes dhe mbështetje për këta fëmijë janë përfaqësues të "dashurisë përdëllyese të Zotit ". Ata janë burimi i shpresës dhe mbrojtjes për këta fëmijë, duke siguruar që ata të ndihen të dashur dhe të sigurt. Leoni XIV falënderoi gjithashtu motrat dhe edukatorët për angazhimin e tyre të palodhur dhe për forcën që ata tregojnë çdo ditë për t'u ofruar këtyre fëmijëve një të ardhme të ndritur.
Një mesazh për të ardhmen
Në fund të vizitës, Papa iu drejtoi një fjalimi të thjeshtë, por të fuqishëm fëmijëve dhe të rinjve që ishin të pranishëm, duke i inkurajuar ata që të mos e lejojnë të kaluarën e tyre të vështirë të përcaktojë të ardhmen. Ati i Shenjtë theksoi se përmes besimit dhe përkushtimit, ata mund të ndryshojnë botën dhe të krijojnë një shoqëri më të drejtë dhe më të dashur.
Disa prej fëmijëve të jetimores u shprehën me shumë emocion për vizitën e Papës. Ata i dhanë atij dhurata simbolike, si një skulpturë druri dhe një libër, si dhe kënduan këngë tradicionale për të shprehur mirënjohjen e tyre. Papa iu përgjigj me dhuratën e një figure të Shën Jozefit, duke e quajtur atë "babain" që do t’i mbrojë ata dhe do të jetë një shenjë e dashurisë dhe kujdesit të përhershëm për ta.
Në fund të takimit, Papa iu bashkua fëmijëve në këngë, duke duartrokitur dhe duke u bashkuar me ritmin e tyre, duke treguar një lidhje të thellë me ata dhe duke i inkurajuar që të vazhdojnë të besojnë në dashurinë dhe mirësinë që ata kanë marrë nga Zoti.
Ndërkohë, jashtë jetimores, një turmë e madhe njerëzish, përfshirë shumë motra rregulltare dhe fëmijë, ndoqën Papën me entuziazëm, duke vallëzuar dhe duartrokitur. Kjo skenë ishte një shenjë e pasionit dhe dashurisë që populli afrikan ka për udhëheqësin e tyre shpirtëror, dhe një simbol i forcës dhe unitetit që ekziston mes tyre.
