Papa kujton martirët augustinianë: është e mundur të jetosh në paqe
R.SH. / Vatikan
Papa Leone XIV zhvilloi dje pasdite një vizitë private në Qendrën e mikpritjes dhe miqësisë në Bab El Oued, në provincën e Algjerit, e drejtuar nga motrat rregulltare augustiniane misionare. Ati i Shenjtë kishte qenë më parë aty si drejtues i Urdhrit të Shën Augustini dhe u prit me shumë ngrohtësi nga motrat, të cilat e konsiderojnë si pjesë të familjes së tyre shpirtërore.
Vizita kishte për qëllim të nderonte kujtimin e dy murgeshave augustiniane, të vrara më 23 tetor 1994 gjatë luftës civile në Algjeri, ndërsa po shkonin në Meshë. Ato janë pjesë e 19 martirëve të Algjerisë, të cilët u lumturuar në vitin 2018. Papa Leoni XIV kujtoi sakrificën e tyre dhe theksoi se martirizimi është një dëshmi e fuqishme e fesë dhe përkushtimit.
Në qendrën Bab El Oued zhvillohen shumë aktivitete sociale dhe edukative për fëmijë, të rinj dhe gra, si kurse qepjeje, pikture dhe punime artizanale. Gjatë takimit, Papa u lut së bashku me murgeshat dhe dëgjoi dëshmi nga një motër që kishte jetuar me viktimat.
Në fjalën e tij, Leoni XIV theksoi se prania e murgeshave në Algjeri është shumë e rëndësishme dhe një shenjë shprese për shoqërinë. Ati i Shenjtë tha se nga mësimet e Shën Augustini mësohet të promovohet respekti për dinjitetin e çdo njeriu dhe të vlerësohen dallimet kulturore dhe fetare. Sipas tij, paqja është e mundur pikërisht kur njerëzit pranojnë dhe respektojnë njëri-tjetrin në diversitet.
Papa gjithashtu falënderoi motrat rregulltare për shërbimin e tyre dhe i inkurajoi të vazhdojnë misionin, duke përhapur dashuri dhe vëllazëri. Ati i Shenjtë Prevost kujtoi edhe se festa e 19 martirëve të Algjerisë përkon me 8 majin, ditën e zgjedhjes së tij si Papë.
Në fund të takimit, disa gra që frekuentojnë qendrën Bab El Oued i dhuruan Papës një rruzare dhe një stolë me simbolin augustinian dhe mesazhin në arabisht “Zoti është dashuri”, si shenjë e mesazhit të paqes dhe bashkëjetesës që Papa dëshiron të përçojë.
