Më 1 tetor, Papa do të flasë në konferencën e Lëvizjes Laudato Si' mbi klimën

R.SH. – Vatikan

Në Castel Gandolfo, në Qendrën Mariapolis të fokolarinëve, të mërkurën, më 1 tetor, do të mbahet takimi "Raising Hope for Climate Justice" (Të shtojmë shpresën për drejtësi klimatike”. Kjo konferencë ndërkombëtare, e promovuar nga Lëvizja Laudato si', në bashkëpunim me partnerë të ndryshëm kishtarë dhe institucionalë, do të shënojë 10-vjetorin e enciklikës së Papës Françesku, kushtuar kujdesit për Krijimin. Një njoftim për shtyp sqaron se ngjarja, e planifikuar deri më 3 tetor, do të mbledhë së bashku mbi 400 udhëheqës fetarë, ekspertë të klimës, përfaqësues të shoqërisë civile dhe institucioneve nga e gjithë bota, me qëllim përcaktimin e hapave të ardhshëm për kthesën ekologjike të botës, në dritën e mësimeve të Kishës.

Papa Leoni XIV do të kryesojë "Kremtimin e Shpresës" të mërkurën pasdite. Sesioni do të përfshijë disa dëshmi, përfshirë atë të ministres së Mjedisit dhe Ndryshimeve Klimatike të Brazilit, Marina Silva, si edhe të ish-guvernatorit të Kalifornisë, Arnold Schwarzenegger, i cili është përfshirë prej kohësh në nisma për mbrojtjen e Krijimit. Pas fjalimit të Papës, do të ketë një moment simbolik dhe shpirtëror për impenjimin e përbashkët, ndjekur nga takimi me një grup pjesëmarrësish në konferencë. Më 2 dhe 3 tetor, do të mbahen sesione pune, tryeza të rrumbullakta dhe lutje. Me këtë veprimtari përfundon Koha e Krijimit, filluar më 1 shtator, ndërsa më 4 tetor, në festën e Shën Françeskut të Asizit, kremtohet Dita Botërore e Lutjes për Kujdesin ndaj Krijimit.