Dhimbja e Papës për tërmetet në Mianmar e Tajlandë dhe zjarret në Kore
R.SH. – Vatikan
Papa Françesku është “thellësisht i pikëlluar” nga humbja e jetëve dhe “shkatërrimi i madh” i shkaktuar nga tërmeti në Azinë Juglindore, që goditi Mianmarin dhe Tajlandën. Tërmeti me magnitudë 7.7 ballë shkatërroi zona të mëdha të të dyja vendeve dhe shkaktoi vdekje e plagosje. Në një telegram ngushëllimi të nënshkruar nga Sekretari i Shtetit të Vatikanit, kardinali Pietro Parolin, drejtuar autoriteteve kishtare dhe civile të Mianmarit dhe Tajlandës, Papa "ofron lutje për shpirtrat e viktimave dhe siguron afërsinë e tij shpirtërore për gjithë të prekurit nga kjo tragjedi". Papa "lutet edhe që personeli i emergjencës të mbështetet, në kujdesin e tij për të plagosurit dhe të zhvendosurit, nga dhuratat hyjnore të forcës dhe të këmbënguljes".
Afërsia me Korenë e goditur nga zjarri
Sërish përmes një telegrami të mëvonshëm, nënshkruar nga kardinali Parolin, Papa shpreh shqetësimin e tij për "kërcënimin ndaj jetës" dhe "për dëmin" e shkaktuar nga zjarret e përhapura në pjesë të ndryshme të Koresë, që kanë prekur veçanërisht zonat e pyllëzuara. Në mesazh, Françesku ua beson shpirtin e të ndjerëve "mëshirës plot dashuri të Zotit të Gjithëpushtetshëm" dhe u dërgon "ngushëllime" të gjithë atyre, që vajtojnë humbjen e të afërmve. Papa siguron lutje edhe për të plagosurit e për personelin e emergjencës, duke uruar për ta "bekimet hyjnore të ngushëllimit, shërimit dhe forcës".
Zjarret, më të shtrirat e regjistruara ndonjëherë në Korenë e Jugut, prekën kryesisht pjesën juglindore të vendit. Viktimat - sipas raporteve të fundit të qeverisë - janë 26 dhe 30 të plagosurit, tetë prej tyre në gjendje të rëndë. Ende njoftohet për zjarre në dhjetë zona me përmasa të mesme e të mëdha.
