Françesku: bota ka nevojë për gëzim të vërtetë

R.SH. / Vatikan

Realizojeni dhe dëshmojeni thirrjen e përbashkët për shenjtëri. Transmetojani breznive të reja, me profesionalitet e përgatitje, por mbi të gjitha, me lumturi të vërtetë. Kush lind duke mësuar ta vërejë bukurinë dhe mirësinë e përbashkët për të gjithë, shpalos hijet e atyre që fshihen pas “qeshjeve të regjistruara paraprakisht dhe stereotipeve sipërfaqësore”.

Shenjtëria, përgatitja dhe dashamirësia janë tri termat mbi të cilat reflektoi Papa Françesku, së bashku me pjesëmarrësit në Kapitullin e XV të përgjithshëm zgjedhor të Bashkimit të Misionareve të Shkollës së Shën Katerinës së Sienës, pritur sot, 4 janar, në Sallën Klementine, në Vatikan.

 “Përgjigje krijuese” për pyetjet e sotme

Papa Françesku e nisi bisedën duke kujtuar njëqindvjetorin e kongregacionit domenikan, themeluar në vitin 1924 nga e Nderuara Luigia Tincani. Trashëgimia e tij konsiston në kërkimin e "përgjigjeve krijuese" për pyetjet e kohës sonë dhe pasqyrohet në temën e zgjedhur nga rregulltaret për takimet e tyre: "Ta kuptojmë të tashmen, për të kuptuar së bashku të ardhmen e Bashkimit, për udhë me Kishën”.

Ta kuptojmë të tashmen, për të kuptuar të ardhmen, për udhë, jo të ndalura - të vdekurit janë të ndalur - përudhë me Kishën. Është gjë e bukur”.

Thirrja e përbashkët për shenjtërinë

Tek "indiferentët e fesë” dhe "të largëtit" - sipas Papës - duhet të arrijë bindja për një "thirrje" të përbashkët ndaj fesë". Bindja e "shenjtërisë", term kërkues, nëse jo i frikshëm, por cak "themelor" i çdo jete:

Shenjtëria është një gjë e gëzueshme, shenjtëria tërheq, shenjtëria është gëzim shpirtëror. Vërtetë nuk është e lehtë ta gjesh shenjtërinë, por me hirin e Zotit mund ta bëjmë. Sa i rëndësishëm është ky mision sot, veçanërisht për të rinjtë!

Largohuni nga thashethemet që helmatisin

Për gratë e kushtuara, rregulltaret, shenjtëria shprehet në moton domenikane "contemplata aliis tradere", dmth duke u transmetuar të tjerëve frytet e asaj "sequela Christi" në të cilën Françesku na fton të qëndrojmë të rrënjosur. Përndryshe, përfundojmë tek "armiku shumë i madh", d.m.th. "tek thashethemet ", nga të cilat Papa i fton besimtaret të distancohen.

“Thashethemet vrasin, thashethemet helmojnë. Ju lutem, asnjë përgojim ndërmjet jush, asnjë. Të ecim përpara e pa përgojime”.

Të njohim “të mirën” e shoqërive tona

Misioni nuk mund të anashkalojë "përgatitjen", term që sot mund të zëvendësohet me "profesionalizëm". Jo reduktim - shpjegon Papa - por vëmendje e përtërirë për studimin, krahasimin dhe ndarjen e njohurive të mësuara. Kështu do të realizohet ideali i Koncilit II të Vatikanit për ta bërë tonën "gjithçka që është e mirë në dinamizmin e sotëm shoqëror".

 “Hapja” është fjala kyçe e përsëritur nga Papa Françesku, shoqëruar nga “dialog me të gjithë”. E më pas shton edhe një mësim, që vjen nga Jezusi, i cili nuk e përbuzi ballafaqimin me askënd:

Ju lutem, dialogoni me të gjithë, përveç djallit. Djalli hyn në bashkësi, shikon, xhelozitë, të gjitha këto gjëra që u përkasin tërë njerëzve, jo vetëm grave, të gjithëve, e djalli shkon pikërisht atje. Me djallin nuk dialogohet. Kuptuat? Nuk ka dialog me djallin!

“Njohja diellore” e të afërmit

Gjithsesi, e gjithë kjo nuk do të ishte e mundur pa "dashuri", fjala e tretë e kujtuar nga Papa. Ati i Shenjtë Françesku i nxit gratë e kushtuara që të jenë lajmëtare të lumturisë, që është "dhuratë e Shpirtit" veçanërisht ndërmjet të rinjve, duke jetuar çdo takim me "mirënjohjen diellore" të të afërmit "në veçantinë e tij të shenjtë".