Festa e Trinisë Shenjte na kujton se ‘Zoti është dashuri'

R.SH. - Vatikan

Këtë të diele Kisha katolike romake kremton solemnitetin e festës së Trinisë Shenjte. Kështu, Kisha na fton të ndalemi përballë misterit më të thellë të fesë sonë të krishterë: Hyji është Atë, Bir dhe Shpirt Shenjt; një Hyj i vetëm në tri Vetje Hyjnore. Ky mister nuk është thjesht një e vërtetë teologjike për t’u kuptuar me mendje, por një realitet i gjallë që na zbulon zemrën e vetë Zotit. E kjo zemër ka një emër: dashuri.

Shkrimi Shenjt na thotë: “Zoti është dashuri”. Në këto tri fjalë përmblidhet e gjithë zbulesa hyjnore. Hyji nuk është vetmi, por bashkim i përkryer dashurie. Ati e do Birin, Biri e do Atin, ndërsa Shpirti Shenjt është vetë lidhja e kësaj dashurie të amshuar. Jezusi erdhi në botë për të na zbuluar këtë mister, për të na bërë ta njohim Atin dhe për të na dhuruar Shpirtin Shenjt, i cili na udhëheq drejt së vërtetës së plotë.

Kur sodisim Trininë Shenjte, zbulojmë edhe të vërtetën për vetveten. Njeriu, i krijuar në shëmbëlltyrën e Zotit, nuk mund ta gjejë lumturinë në egoizëm apo në mbyllje ndaj të tjerëve. Ai realizohet vetëm në dashuri, në dhurimin e sinqertë të vetvetes. Sa herë që përpiqemi ta ndërtojmë jetën vetëm mbi dëshirat dhe interesat tona, përballemi me zbrazëti dhe konflikte. Por kur mësojmë të japim, të falim dhe të shërbejmë, zbulojmë lirinë e vërtetë.

Kjo është edhe mësimi që na jep Krishti në Kryq. Dashuria e vërtetë nuk ndalet para vuajtjes dhe sakrificës. Ajo nuk kërkon të marrë, por të japë. Në Kryq shohim dashurinë e Zotit që shkon deri në fund për njeriun. Në Eukaristi, kjo dashuri bëhet përsëri e pranishme, duke na ftuar të jetojmë sipas të njëjtit ligj: ta dhurojmë jetën për të tjerët.

Misteri i Trinisë Shenjte mbetet përtej kufijve të arsyes njerëzore, por nuk e kundërshton atë. Përkundrazi, na ndihmon të kuptojmë se në themel të gjithësisë dhe të historisë nuk qëndron forca, pushteti apo rastësia, por dashuria. Një dashuri e amshuar, e pafund dhe krijuese.

Prandaj, festa e Trinisë Shenjte është një ftesë për të hyrë gjithnjë e më thellë në këtë dashuri. Sa më shumë t’i hapim zemrat tona Atit, Birit dhe Shpirtit Shenjt, aq më shumë do të gjejmë të vërtetën tonë, paqen tonë dhe lumturinë tonë. Sepse njeriu është krijuar nga dashuria dhe për dashurinë, ndërsa Zoti, që është Trini e Shenjtë, mbetet burimi dhe qëllimi i çdo jete.