Liban, nunci në fshatrat e Jugut për të dërguar ndihma: "njerëzit kanë nevojë për mbështetje"

R.SH. - Vatikan

Argjipeshkvi Paolo Borgia, Nunc Apostolik në Liban që nga viti 2022, thekson nevojën urgjente për mbështetje pasi vizitoi fshatrat e jugut të Libanit për të ndihmuar në shpërndarjen e 15 tonëve ndihma humanitare nga organizata L’Œuvre d’Orient.

"Tani, pikërisht tani, dëgjova një shpërthim nga Nunciatura Apostolike... Kjo do të thotë se 'muzika' po fillon përsëri në Bejrut," i tha Argjipeshkvi Borgia mediave Vatican News vonë të premten nga kodra e Harissës, ku statuja e ndriçuar e Zojës së Bekuar të Libanit vështron me trishtim qytetin.

Më herët, imzot Borgia mori pjesë në varrimin e At Pierre El Raii, meshtarit maronit të vrarë ndërsa po asistonte një besimtar të famullisë të plagosur në Qlayaa, përpara se të udhëtonte drejt disa fshatrave jugore me një kamion të mbushur me ndihma humanitare.

Ndihma në terren

Fotografitë dhe videot e Argjipeshkvit Borgia duke shkarkuar pako i veshur me veladonin meshtarak, brez dhe kësulë ipeshkvore, u bënë virale në mediat sociale libaneze.

"I përvolëm mëngët për të shkarkuar të gjitha materialet që të mund të fillonim", tha diplomati i Vatikanit. "Sot vizituam gjashtë fshatra dhe takuam komunitete të ndryshme: maronitë, të krishterë të përzier, ortodoksë, greko-melkitë, latinë, madje edhe grupe me banorë druzë dhe sunitë".

Nunci Apostolik në Bejrut e përshkroi përvojën si "një moment të mrekullueshëm vëllazërie" dhe ndau një moment të tensionuar por me humor: ndërsa ishte i gjunjëzuar para altarit të një Kishe të vogël fshati, u lëshuan tre predha mortaje. "Dikush më tha: 'Shkëlqesi, po ju mirëpresin'. Qeshëm me këtë..."

Besimi te Papa

Argjipeshkvi imzot Borgia vuri re besimin e fortë lokal te Selia e Shenjtë dhe te Papa.

"Njerëzit kishin nevojë për mbështetje dhe, mbi të gjitha, për një fjalë nga Papa. Ata i besojnë Selisë së Shenjtë dhe veçanërisht Papës, të cilin e panë këtu në Bejrut dhe me të cilin ndjenë menjëherë një lidhje të veçantë", tha Nunci Apostolik, duke kujtuar vizitën e Papa Leonit XIV në dhjetor 2025.

Rrugë të bombarduara dhe fshatra të bllokuar

Argjipeshkvi Imzot Borgia shprehu shqetësim për infrastrukturën e dëmtuar.

"Na dhembi fakti që, pasi u larguam nga zona, disa rrugë u bombarduan. Qlayaa, pasi na mirëpriti, tani është plotësisht e bllokuar, ashtu si fshatrat e tjerë aty pranë. Nga lufta madje po fillojnë të ndërpresin rrugët e komunikimit drejt Jugut... Shpresojmë që lufta të përfundojë së shpejti dhe paqja të mund të kthehet", tha Nunci Apostolik në Bejrut imzot Borgia.

Frika dhe shpresa

Nunci Apostolik kujtoi se si sulmet e Hezbollahut dhe bombardimet e synuara të Izraelit kanë detyruar zhvendosje masive të popullsisë.

"Hezbollahu", shpjegoi diplomati i Vatikanit, "lëshon raketa drejt Izraelit, ndonjëherë shpesh. Izraeli bombardon në mënyrë selektive në Dahieh: duke shënjestruar makina, apartamente, dhoma hoteli ose shtëpi. Të gjitha lagjet shiite në Bejrut janë pothuajse të zbrazëta për shkak të lëvizjeve masive."

Rreth 800,000 njerëz janë regjistruar për asistencë në faqen e internetit të Ministrisë së Çështjeve Sociale, ndërsa rreth 120.000 po ndihmohen në qendrat lokale.

"Njerëzit në qendra kanë frikë," vuri re Argjipeshkvi Borgia, duke shtuar: "Është një situatë e veçantë. Le të shpresojmë që të bëhet më mirë".