SHBA-Iran, presidentët nënshkruajnë marrëveshjen e paqes nga distanca
Vatican News
Mbrëmjen e djeshme u nënshkrua marrëveshja e paqes mes Iranit dhe Shteteve të Bashkuara të Amerikës. Një nga pikat e parashikuara në negociatat e 60 ditëve të ardhshme është angazhimi i Teheranit për të holluar uraniumin e pasuruar që zotëron, ndërsa Uashingtoni, në këmbim, do të heqë menjëherë të gjitha sanksionet, duke filluar nga ato ndaj naftës iraniane.
Ceremonia në Zvicër
Nënshkrimi u bë nga distanca mes presidentit iranian Pezeshkian dhe presidentit amerikan Trump, i cili ndodhet për vizitë në Francë dhe firmosi dokumentin në Versajë në praninë e presidentit francez Emmanuel Macron. Ceremonia zyrtare është programuar për nesër në një resort në Lucernë të Zvicrës, në praninë e zëvendëspresidentit amerikan JD Vance dhe kryetarit të Parlamentit iranian, Mohammad Bagher Ghalibaf, të cilën Irani tashmë e ka cilësuar si “të panevojshme”.
Reagimet
Presidenti amerikan Trump u shpreh i kënaqur me marrëveshjen dhe, në margjinat e samitit G7 në Evian të Francës, deklaroi: “Me këtë marrëveshje, Teherani nuk do të ketë kurrë armë bërthamore, por nëse ajo nuk respektohet, ne do të rikthehemi të sulmojmë.”
Nga ana tjetër, kryetari i Parlamentit iranian, Ghalibaf, tha: “E mbajmë gishtin mbi këmbëz. Pesimizmi dhe mosbesimi im ndaj Amerikës janë në nivelin më të lartë.”
Marrëveshja u mirëprit edhe nga sekretari i përgjithshëm i NATO-s, Mark Rutte, i cili e cilësoi atë si “një marrëveshje të mirë” për t’i dhënë fund luftës që, sipas tekstit, ka nisur më 28 shkurt.
Nyja libaneze
Drafti prej 14 pikash parashikon gjithashtu përfundimin e armiqësive në Liban. Sekretari i përgjithshëm i Hezbollahut, Naim Qassem, e ka quajtur marrëveshjen “një fitore të madhe” për Iranin, i cili prej kohësh mbështet këtë milici islamiste shiite.
Megjithatë, në vendin e njohur si “Toka e Kedrave”, Liban, konflikti vazhdon në praktikë. Izraeli njoftoi sot vdekjen e një ushtari të forcave të sigurisë gjatë luftimeve, pa specifikuar më tej, në jug të vendit, si dhe interceptimin e disa raketave të lëshuara kundër ushtrisë së tij.
