Izraeli hap negociatat me Libanin, por sulmet ajrore kundër Hezbollahut vazhdojnë
R.SH. - Vatikan
Duket se është presioni i Shtëpisë së Bardhë pas qëndrimit të Kryeministrit izraelit Netanyahu për të filluar negociatat me Libanin të cilat, sipas thashethemeve, mund të nisin javën e ardhshme në Departamentin e Shtetit Uashington, me pjesëmarrjen e ambasadorëve izraelitë dhe libanezë në Shtetet e Bashkuara. Reduktimi i bombardimeve të Libanit nga Izraeli do të ishte parakusht për negociatat ndërmjet SHBA-së dhe Iranit, të cilat fillojnë nesër, në Islamabad, ndërsa vazhdimi i konfliktit mund të forcojë pozicionin negociues të Teheranit, ose ta detyrojë të braktisë bisedimet.
Situata e Ngushticës së Hormuzit
Hapja e raundit të negociatave nesër, në Pakistan, vihet në rrezik edhe nga menaxhimi i raportuar nga Teherani i Ngushticës së Hormuzit, i denoncuar nga Presidenti i SHBA-së Trump: "Nuk ishte kjo marrëveshja", bërtiti me zë të lartë në lidhje me vendimin e Iranit për të lejuar një maksimum prej 15 anijesh të kalojnë tranzit në ditë. Rihapja pa kufizime e Ngushticës ishte kushti kryesor i vendosur nga Shtetet e Bashkuara për fillimin e negociatave.
Fronti i Libanit
Ndërkohë, Izraeli vazhdon operacionet në Liban kundër Hezbollahut, duke deklaruar se nuk e ka ndërmend t'i ndërpresë, megjithëse, sipas thashethemeve, sulmet gjatë ditëve në vijim mund të jenë të kufizuara. Pavarësisht nga kjo, e pavarësisht edhe nga dënimi i pjesës më të madhe të bashkësisë ndërkombëtare, nga Evropa në Moskë, nga Ankaraja në Pakistan, sulmet izraelite vazhdojnë në Libanin jugor, veçanërisht në qytetet Sidon dhe Nabatieh, Sarafand dhe Haneen. Anasjelltas, që nga agimi i sotëm, alarmet për sulme ajrore u aktivizuan në të gjithë Izraelin, duke përfshirë zonën tregtare të Tel Avivit dhe qytetin bregdetar të Ashdodit, për shkak të raketave të lëshuara nga Hezbollahu, të cilat kanë arritur edhe në Galile.
Situata në Bejrut
Kombet e Bashkuara sapo kishin deklaruar mirëseardhjen e tyre për "çdo negociatë të drejtpërdrejtë ndërmjet Izraelit dhe Libanit", kur ushtria izraelite lëshoi një urdhër të ri evakuimi për periferitë jugore të Bejrutit, ku shkruhet se ndodhet një zyrë e OKB-së. Për më tepër, situata në këtë zonë është veçanërisht kritike, pasi shumë njerëz të zhvendosur nga lagje të tjera të qytetit po strehohen këtu, veçanërisht në zonën Jhnah.
Më e rëndësishmja, dy spitale po operojnë në kushte jashtëzakonisht të vështira pas bombardimeve intensive të mërkurën e kaluar, të cilat lanë aty mbi një mijë të plagosur. Organizata Botërore e Shëndetësisë shprehu shqetësim të madh për situatën dhe denoncoi gjendjen e vështirë për të paktën 450 pacientë, që nuk kanë kujdes të vazhdueshëm shëndetësor.
