SHBA-së dhe Izraeli sulmojnë Iranin, Trump kërkon ndryshimin e regjimit
R.SH. - Vatikan
Luftë kundër Iranit. Israele dhe Shtetet e Bashkuara të Amerikës në veprim, regjimi përgjigjet me raketa. Goditet një bazë amerikane. Kolona tymi të zi janë ngritur në Teheran, ndërsa shpërthime janë raportuar edhe në qytete të tjera. Ajatollahu Ali Khamenei është dërguar në një vend të sigurt. Presidenti Donald Trump deklaroi: “Po mbrojmë amerikanët, regjimi nuk do ta ketë kurrë armën bërthamore”. Fjalët e ministrit izraelit të Mbrojtjes, Israel Katz: “Duhet të heqim kërcënimet ndaj shtetit tonë”. Është goditur edhe baza e marinës amerikane në Bahrein.
Sot në agimin e 28 shkurtit 2026, Shtetet e Bashkuara të Amerikës dhe Izraeli nisën një operacion të gjerë ushtarak kundër Iranit. Lajmi u bë i ditur nga autoritetet e të dy vendeve dhe nga agjencitë kryesore ndërkombëtare. Presidenti amerikan, Donald Trump, konfirmoi në një videomesazh nisjen e «major combat operations» kundër Republikës Islamike, duke folur për një veprim «masiv» të drejtuar jo vetëm kundër programit bërthamor, kapaciteteve raketore dhe marinës iraniane, por sidomos me synimin për arritjen e një ndryshimi regjimi në Iran.
Objektivat e sulmit
Në fjalimin e tij këtë mëngjes, Trump deklaroi se qëllimi i operacionit është të sigurojë që «amerikanët të mos kërcënohen kurrë nga një Iran i pajisur me armë bërthamore», duke iu drejtuar më pas popullit iranian: «ora e lirisë suaj është afër. Kur të kemi përfunduar, merrni kontrollin e qeverisë suaj, do t’ju takojë juve ta bëni këtë». Izraeli shpalli gjendjen e jashtëzakonshme dhe vendosi kufizime në territorin kombëtar në pritje të hakmarrjeve të mundshme.
Ndërkohë, në kryeqytetin iranian, sulmet goditën zonën ku ndodhen rezidenca e liderit suprem, Ali Khamenei, Këshilli Lartë për la Sigurinë kombëtare dhe zyra presidenciale. Burime lokale pohojnë se Khamenei është dërguar në një vend të sigurt. Në shënjestër u vu edhe kompleksi i ministrisë së së Inteligjencës në verilindje të Teheranit. Zyrtarë të ushtrisë amerikane deklaruan se sulmi ndaj Iranit do të jetë shumë më i gjerë krahasuar me atë të qershorit të kaluar kundër objekteve të programit bërthamor të Republikës Islamike.
Është sërish luftë në Gjirin Persik
Shpërthime të shumta dhe të vazhdueshme janë dëgjuar edhe në Tabriz, Karaj dhe Kermanshah. Autoritetet e Teheranit nuk kanë publikuar një bilanc zyrtar të viktimave apo dëmeve. Komunikimet në internet në vend rezultojnë pjesërisht të ndërprera, ndërsa ministria e Arsimit ka njoftuar mbylljen e shkollave dhe kalimin e përkohshëm në mësim në distancë.
Janë goditur edhe Isfahan dhe qytete të tjera iraniane, me në shënjestër “aparatin ushtarak”, në një sulm që do të jetë “më i gjerë se ai i qershorit”, sipas burimeve amerikane. Një lëvizje “parandaluese për të hequr kërcënimet” iraniane, bën të ditur shteti hebraik, duke paraprirë njoftimin amerikan. Regjimi i ajatollahëve “nuk do ta ketë armën bërthamore, Rojet Revolucionare të dorëzojnë armët ose do të përballen me një vdekje të sigurt”, paralajmëron Donald Trump. Televizioni izraelit flet për “dhjetëra të vdekur mes pasdaranëve, edhe figura kyçe”.
Por kjo lëvizje shkakton përgjigjen e menjëhershme të Teheranit, nga ku brenda pak orësh nis lëshimi i raketave drejt Izraelit: janë dëgjuar shpërthime në Tel Aviv. Është goditur një bazë amerikane në Bahrein. Raketa edhe mbi Doha. “Po reagojmë ndaj agresionit të SHBA-ve dhe Izraelit”, njofton Teherani. Tashmë është sërish luftë në Gjirin Persik.
