Hebdomada Papae, o noticiário em latim da Rádio Vaticano

HEBDÓMADA PAPAE”
NOTÍTIAE VATICÁNAE LATÍNE RÉDDITAE
Die vicésimo quinto mensis Iúlii anno bismillésimo vicésimo sexto

TÍTULI

Sábbato, die duodécimo mensis Iúlii, músicae clássicae concéntum Leóni quarto décimo Arce Gandúlfi Albanénsis dioecésis praebére vóluit.

Domínica die, ex verbis ante Angélicam Salutatiónem dicéndam enuntiátis, Summus Póntifex memorávit bonum étiam ex mali ténebris oríri.

Die Lunae vicésimo mensis Iúlii Montis Cassíni Papa monásticam communitátem privátim invísit.

Salútem plúrimam ómnibus vobis audiéntibus núntios Latínos dicit Rosárius Tronnolone.

NOTÍTIAE

Vesperascénte die duodevicésimo mensis Iúlii músicum concéntum participávit Póntifex, qui in Arcis Gandúlfi Palátii Apostólici cavǽdio hábitus est isque ab Albanénsi dioecési cóncitus, ut affectiónis esset signum in eum férias agéntem. Refert Eugénius Murrali.

“In terrárum vívimus orbe ubi deest pulchritúdo”, ait Summus Póntifex: “Tot adsunt negótia, bella, dimicatiónes, ódium, violéntia, carens opus et cétera incómmoda. Quod his rebus frui póssumus, id magnum est benefícium, quóniam éfficit ut memória teneámus plus adésse quam hoc. Vir ac fémina, cum volunt, una simul, pulchritúdinem exhibére possunt, quae ex corde ad cor nos ádiuvat ad caelum suspiciéndum. Música, ars, pulchritúdo”, áddidit ipse, “instruméntum sunt quod éfficit ut vel óptimam hóminis partem contueámur”.

Domínica undevicésima die mensis Iúlii, Regni parábolas éxplicans Leo quartus décimus, Angélicam Precatiónem recitávit una cum peregrínis in Libertátis Plàtea Arcis Gandúlfi coadunátis. Ante Mariálem Precatiónem, ex allocutióne, evangélicam ratiónem memorávit Póntifex quae mínime per insoléntiam agit, non dominátu praevalére vult. Alexánder De Carolis lóquitur.

“Iesus vult– ait Póntifex –  ut falláciam nos caveámus Dei cogitándi, poténtis simulácri, qui per vim operátur et dominári vult, qui triúmphans ádvenit. At contra, parvitátem pótius díligit, temperáti sui amóris signum, Isque líberos nos facit Se accipiéntes aut respuéntes, qui per zizániam procédit, qui de abscóndito agit et invisíbilis tamquam mínimum semen et intra pastam sine strépitu ferméntat”. Quod ex Regni parábolis exstat – adiécit Póntifex – probe ratiónem enódat, qua in mundo, nostra vita operátur Deus: patiénter agit, ad ánimis demíssis líberat atque hortátur ut fidúciam habeámus, étiam si absens videátur. “Reápse Ipse nos usque comitátur Eiúsque amor pro nobis semper operátur.

NOTÍTIAE BREVÍSSIMAE

Die vicésima Lunae mensis Iúlii mane monásticam communitátem et Abbatíam Benedictínam Montis Cassíni privátim Summus Póntifex invísit. In órdinis fundatóris sepúlcro Leo quartus décimus orávit pro pace conciliánda in terrárum orbis regiónibus, quae sánguine et contentiónibus cruentántur. Horam Sextam cum mónachis recitávit et cum iis prandit ante quam Arcem Gandúlfi péteret.

Satis dictum est, quae sunt futúra, narrábimus próxima hebdómada. Valéte!