Hebdomada Papae, o noticiário em latim da Rádio Vaticano

“HEBDOMADA PAPAE”
Notitiæ Vaticanæ Latine redditæ
Die quarto mensis Aprilis anno bismillesimo vicesimo sexto

TITULI

Via Crucis ad Colossǽum, Crucem in univérsis statiónibus Papa gerénte.

Papa pedes ábluit duódecim presbyterórum Urbis.

Leo Papa Quartus Décimus petit, ut «pro víctimis innocéntibus bellórum orémus».

Salútem plúrimam ómnibus vobis optátis audiéntibus hódie núntios Latína lingua prolátos ex corde dicit Maríus Galgano.

NOTITIAE

Tríduum Paschále huius anni áliquid præ recentióribus innovávit. Missæ enim vespertína in Cena Dómini, quæ cor est Feriæ Quintæ Hebdómadæ Sanctæ et inítium Trídui Paschális dénuo suetam apud sedem suam est celebráta, Basílicam scílicet Sancti Ioánnis in Lateráno, diœcésis Románæ ecclésiam cathedrálem. Per omnes quattuórdecum statiónes circa Colossǽum Leo Papa, qui primam suam Viam Crucis óbiit, féria sexta in Passióne Dómini, die tértio mensis Aprílis, in Anfitheátro Flávio crucem gessit. De his refert Xavérius Sartre:

Reveréndo Patri Francísco Patton, iam custódi in Terra Sancta ab anno bismillésimo décimo sexto ad annum bismillésimum vicésimum quintum, munus commíssum est meditatiónes scribéndi de itínere Iesu usque ad Gólgotam. Frater Minor de Monte Nebo in Ioardánia idéntidem sese factus est vocem doléntem géntium Vicíni Oriéntis, hoc potíssimum árduo témpore. Prætérito anno, sicut et anno bismillésimo vicésimo quarto, meditatiónes redáctæ sunt a Papa Francísco, post réditum Domum Sanctæ Marthæ, consummáto receptaculo in Valetudinário Gemelli.

Ritus ipse Lotiónis péduum, memoriále gestus, quem Iesus in Cœna Novíssima discípulis confécit,  immútat. Duódecim presbýteri románi gestum Papæ Leónis recepérunt. Hæc mémorat Rosárius Tronnolone:

Ex his úndecim – Vicariátus Romæ enúntiat – sacerdótes sunt, quos prætérito anno Leo Papa Quartus Décimus presbyterátu auxit; Reveréndus Dóminus Lauréntius Chiesa autem Moderátor Spirituális est Pontifícii Seminárii Maióris Románi. Expléta litúrgia, Papa Sanctíssimum Sacraméntum afférret ad locum repositiónis, Cappéllam scílicet Sancti Francísci.

NOTITIAE BREVIORES

Papa Audiéntiam fériæ quartæ cóntulit ad capítulum quartum Constitutiónis Apostólicæ «Lumen Géntium», quod de láicis tractat. In salutatiónibus adhortátus est ad orándum pro bellórum víctimis innocéntibus, quia «pax et amor mortem exsúperant».

Papa nominávit Paulam Fanelli Moderatrícem Directiónis de operáriis Sanctæ Sedis apud Secretáriam de Œconómia. Quæ láurea coróna ornáta est in Quæstiónibus de apparátibus administrándis et consíliis quoad humánas opes divérsis in indústriis capiéndis.

Leo Quartus Décimus dénuo pacem appellávit, féria tértia Hebdómadæ Sanctæ álloquens ad diurnários, dum e Villa Barberini Arce Gandúlfi egrediebátur.

Finis fit hæc loquéndi, cétera nova próxima hebdómada. Valéte!