Hebdomada Papae, o boletim em latim da Rádio Vaticano

“HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die décimo mensis Ianuárii anno bismillésimo vicésimo sexto

TÍTULI

In Generáli Audiéntia die Mercúrii séptimo mensis Ianuárii catechésium novam sériem Leo quartus décimus incohávit in Concílio Oecuménico Vaticáno Secúndo íterum legéndo versántium.

Mensis Ianuárii die Iovis octávo Missam célebrans una cum Cardinálibus in extraordinário Consistório coadunátis, humilitátem, mútuam auditiónem, divínam Providéntiam éxtulit Summus Póntifex, quae praesto peténtibus semper est ómnibus.

Die quarta mensis Ianuárii, domínica áltera post Dómini Nativitátem, in Angélica Praecatióne mónuit Póntifex nostrum unumquémque Dei imáginem deférre, ex quo agnóscere debémus inviolábilem cuiúsque hóminis dignitátem.

Salútem multam ómnibus vobis audiéntibus núntios Latínos dicit Rosárius Tronnolone.

NOTÍTIA 1

Ex Audiéntia Generáli die Mercúrii séptimo mensis Ianuárii adhortátus est Leo quartus décimus Papa ad Concílii Vaticáni Secúndi documénta íterum fruénda, ut prophétia hodiernúmque tempus rursus detegátur. Refert Sílvia Guidi.

Magni moménti datur occásio ut pulchritúdo ac pondus recolántur Concílii Vaticáni Secúndi. Sic prǽbuit Leo quartus décimus novam sériem catechésium, quam die Mercúrii séptimo mensis Ianuárii ipse incohávit. Concílium quippe Dei ut Patris vultum íterum exhíbuit qui, in Christo, nos vocat ut sui fílii simus, Ecclésiam ut communiónis mystérium respéxit atque unitátis sacraméntum inter Deum eiúsque pópulum, atque litúrgicam reformatiónem incohávit, unde potíssimum actuósam et cónsciam Dei pópulus daret óperam. Ob óculos hodiérnis provocatiónibus hábitis, ait Póntifex, vígili ánimo témporum signa vestigáre debémus, animósi iustítiae pacísque testes.

NOTÍTIA 2

Die Iovis octávo mensis Novémbris, in Sancti Petri basílica Sanctam Missam celebrávit Leo quartus décimus una cum Cardinálibus in extraordinário Consistório coadunátis. Lóquitur Márius Galgano.

Huc una pervénimus non ad quaedam singulária aut commúnia provehénda, asséruit Póntifex, sed ad nostra propósita discernénda, uno Dómino iuvánte. Non enim peritórum sumus manípulus, sed fídei commúnitas, ad orándum mutuóque auscultándum vocáta: nihil est quod férimus, quod donum talentúmque accépimus, fructum feréndum. Homínibus sciscitántibus respóndere intérdum non valémus, instruméntis caréntes, ad quaestiónes extémplo solvéndas inhábiles, sed mútuam óperam praestáre póssumus ad “quinque panes ac duos pisces” inveniéndos, quos usque praestat Providéntia, subsídia peténtibus fíliis.

NOTÍTIAE BREVÍSSIMAE

Die séptimo mensis Ianuárii cum extraordinárium Consistórium agi coeptum est, allóquens, óperis ratiónem memorávit Summus Póntifex, mútuae nempe auscultatiónis pondus, dum Spíritus Sanctus moderátur atque una simul ambulátur.

Die domínica quarta mensis Ianuárii, ántequam Angélica Salutátio dicerétur, confirmávit Póntifex Iesu incarnatiónem nobis osténdere omnes hómines Dei vultum reférre, unde agnóscere debeámus uniuscuiúsque dignitátem esse inviolábilem atque mútuum amórem nobis exercéndum.

Haec dicénda putávimus, próxima hebdómada, nova tradéntur. Valéte omnes!