വത്തിക്കാനിൽ പുൽക്കൂട് പ്രദർശനം ഉദ്ഘാടനം ചെയ്തു

ഫാ. ജിനു തെക്കേത്തലക്കൽ, വത്തിക്കാൻ സിറ്റി

എല്ലാവരെയും വത്തിക്കാനിലേക്ക് ആലിംഗനം ചെയ്തു സ്വീകരിക്കുന്ന മാതൃകയിൽ ബെർണിനി വിഭാവനം ചെയ്ത സ്തൂപസമുച്ചയത്തിനുള്ളിൽ, 32 രാജ്യങ്ങളിൽ നിന്നുള്ള,  പുൽക്കൂടുകൾ പ്രദർശനത്തിനായി തുറന്നുകൊടുത്തു. ഡിസംബർ മാസം എട്ടാം തീയതി നടന്ന ലളിതമായ ചടങ്ങിൽ, സുവിശേഷവത്ക്കരണത്തിനായുള്ള ഡിക്കസ്റ്ററിയുടെ പ്രൊ-പ്രീഫെക്ട് മോൺസിഞ്ഞോർ റീനോ ഫിസിക്കെല്ലയാണ് പ്രദർശനം  ഉദ്‌ഘാടനം ചെയ്തത്. തികച്ചും സൗജന്യമായ പ്രദർശനം 2026 ജനുവരി 8 വരെയായിരിക്കും.

ഇറ്റലി, ഫ്രാൻസ്, ക്രൊയേഷ്യ, പോളണ്ട്, ഹംഗറി, സ്ലൊവാക്യ, സ്ലൊവേനിയ, റൊമാനിയ, സ്വിറ്റ്സർലൻഡ് തുടങ്ങിയ നിരവധി യൂറോപ്യൻ രാജ്യങ്ങളിൽ നിന്നും, അമേരിക്ക, പെറു, എറിത്രിയ, കൊറിയ, വെനിസ്വേല, തായ്‌വാൻ, ബ്രസീൽ, ജപ്പാൻ, ഫിലിപ്പീൻസ്, ഇന്തോനേഷ്യ, പരാഗ്വേ, ഇന്ത്യ തുടങ്ങിയ ലോകത്തിന്റെ മറ്റ് ഭാഗങ്ങളിൽ നിന്നും പുൽക്കൂടുകൾ പ്രദർശനത്തിനായി ഒരുക്കിയിരിക്കുന്നു.

കാലങ്ങളായി ക്രിസ്തുമസ് കാലത്ത്, വത്തിക്കാൻ ചത്വരത്തിന്റെ മനോഹാരിത വർധിപ്പിക്കുന്ന രംഗമാണ് ഈശോയുടെ ജനനം ചിത്രീകരിക്കുന്ന നൂറു പുൽക്കൂടുകളുടെ പ്രദർശനം. എല്ലാ ദിവസങ്ങളിലും, വൈകുന്നേരം  ഏഴു മണി വരെ പൊതുജനങ്ങൾക്ക് പ്രദർശനം കാണുവാൻ അവസരമുണ്ട്.