സെപ്റ്റംബർ, ഒക്ടോബർ മാസങ്ങളിലെ പാപ്പായുടെ ഔദ്യോഗിക പരിപാടികൾ പ്രസിദ്ധീകരിച്ചു

വത്തിക്കാൻ ന്യൂസ്

ലിയോ പതിനാലാമൻ പാപ്പാ, 2026 സെപ്റ്റംബർ, ഒക്ടോബർ മാസങ്ങളിൽ, കാർമ്മികത്വം വഹിക്കുന്ന തിരുക്കർമ്മങ്ങളുടെയും സന്ദർശനങ്ങളുടെയും വിവരങ്ങൾ വത്തിക്കാനിലെ പൊന്തിഫിക്കൽ തിരുക്കർമ്മങ്ങൾക്കായുള്ള വിഭാഗം പ്രസിദ്ധീകരിച്ചു.

സെപ്റ്റംബർ മാസം ഏഴാം തീയതി, വൈകുന്നേരം 6 മണിക്ക് റോമിന് പുറത്തുള്ള ജെനസാനോ പട്ടണത്തിൽ സ്ഥിതി ചെയ്യുന്ന, അഗസ്റ്റീനിയൻ സന്യാസികൾ ശുശ്രൂഷ ചെയ്യുന്ന സദ് ഉപദേശങ്ങളുടെ മാതാവിന്റെ തീർത്ഥാടന കേന്ദ്രത്തിൽ, പരിശുദ്ധ പിതാവ് ലിയോ പതിനാലാമൻ പാപ്പാ, വിശുദ്ധ ബലിയർപ്പിക്കും. 1200 മുതൽ അഗസ്റ്റീനിയൻ സന്യാസികളാണ് ഈ തീർത്ഥാടന ദേവാലയത്തിൽ ശുശ്രൂഷ ചെയ്യുന്നത്. 1959-ൽ ജോൺ ഇരുപത്തിമൂന്നാമൻ പാപ്പായും,  1993-ൽ ജോൺ പോൾ രണ്ടാമൻ പാപ്പായും ഈ തീർത്ഥാടന ദേവാലയം സന്ദർശിച്ചിട്ടുണ്ട്.

സെപ്റ്റംബർ മാസത്തെ ഏറ്റവും പ്രധാനപ്പെട്ട പരിപാടി, സെപ്റ്റംബർ മാസം  25 മുതൽ 28 വരെ ഫ്രാൻസിലേക്ക് നടത്തുന്ന അപ്പസ്തോലിക സന്ദർശനമാണ്. ഈ യാത്രയുടെ ഭാഗമായി പാപ്പാ  യുനെസ്കോയുടെ (UNESCO) ആസ്ഥാനവും സന്ദർശിക്കും. അന്താരാഷ്ട്ര തലത്തിൽ സമാധാനവും വിദ്യാഭ്യാസവും പ്രോത്സാഹിപ്പിക്കുന്നതിനുള്ള വത്തിക്കാന്റെ ശ്രമങ്ങളുടെ ഭാഗമായാണ് ഈ സന്ദർശനം വിഭാവനം ചെയ്തിരിക്കുന്നത്.

ഒക്ടോബർ മാസത്തിൽ രണ്ട് പ്രധാന ശുശ്രൂഷകളാണ് പാപ്പായുടെ മുഖ്യകാർമ്മികത്വത്തിൽ നടക്കുന്നത്. ഒക്ടോബർ 8-ന് വൈകുന്നേരം 6 മണിക്ക് വത്തിക്കാനിലെ വിശുദ്ധ പത്രോസിന്റെ ബസിലിക്കയിൽ വച്ച് പൊന്തിഫിക്കൽ സർവ്വകലാശാലകളുടെ അധ്യയന വർഷാരംഭത്തോടനുബന്ധിച്ച് പാപ്പാ  വിശുദ്ധ ദിവ്യബലി അർപ്പിക്കും.

ഒക്ടോബർ 14-ന് രാവിലെ 10 മണിക്ക് 'അമോറിസ് ലെത്തീത്സ്യ' (Amoris Laetitia) എന്ന അപ്പസ്തോലിക പ്രബോധനത്തിന്റെ പത്താം വാർഷികത്തോടനുബന്ധിച്ച് വിശുദ്ധ പത്രോസിന്റെ ചത്വരത്തിൽ വച്ച് പരിശുദ്ധ പിതാവ് വിശുദ്ധ ബലിയർപ്പിക്കും.