കുടിയേറ്റജനതയെ അനുസ്മരിച്ചും യുദ്ധാവസാനത്തിനായി പ്രാർത്ഥിച്ചും ലിയോ പതിനാലാമാൻ പാപ്പാ

മോൺസിഞ്ഞോർ ജോജി വടകര, വത്തിക്കാന്‍ ന്യൂസ്

സ്പെയിനിലെ സെവുത്ത (Ceuta) പ്രദേശത്ത് നിലനിൽക്കുന്ന പ്രതിസന്ധിയിൽ ആശങ്കയറിയിച്ചും, ലോകത്തിന്റെ വിവിധയിടങ്ങളിലെ യുദ്ധങ്ങൾ മൂലം ദുരിതമനുഭവിക്കുന്ന മനുഷ്യർക്കായി പ്രാർത്ഥിച്ചും ലിയോ പതിനാലാമൻ പാപ്പാ. കടുത്ത വേനലായിട്ടും, പരിശുദ്ധ പിതാവിനൊപ്പം പ്രാർത്ഥിക്കാനും, പാപ്പായുടെ ആശീർവാദം സ്വീകരിക്കാനുമായി എത്തിയ ആയിരക്കണക്കിന് ആളുകൾക്കൊപ്പം ത്രികാലജപപ്രാർത്ഥന നയിച്ച അവസരത്തിലാണ്, ലോകത്തിന്റെ വിവിധ ഭാഗങ്ങളിൽ കഷ്ടപ്പാടനുഭവിക്കുന്ന മനുഷ്യരെക്കുറിച്ച് പാപ്പാ പരാമർശിച്ചത്.

സെവുത്തയിലെ പ്രതിസന്ധി

ആഫ്രിക്കയുടെ വടക്കൻ തീരത്ത്, മൊറോക്കോയുടെ അതിർത്തിയിലുള്ള, സ്പെയിനിന്റെ സ്വയംഭരണപ്രദേശമായ സെവുത്തയിലെ വലിയ കുടിയേറ്റ പ്രതിസന്ധി പരാമർശിച്ച പാപ്പാ, പ്രദേശത്തെ സ്ഥിതിഗതികൾ താൻ ആശങ്കയോടെയാണ് നോക്കിക്കാണുന്നതെന്ന് പ്രസ്താവിച്ചു.

“ഔർ ലേഡി ഓഫ് ആഫ്രിക്ക”യുടെ മാദ്ധ്യസ്ഥ്യത്തിൽ, പ്രദേശത്ത് സമാധാനവും സുസ്ഥിരതയും നീതിയും ഉണ്ടാകട്ടെയെന്നാണ് താൻ പ്രാർത്ഥിക്കുന്നതെന്ന് സ്പാനിഷ് ഭാഷയിൽ പരിശുദ്ധ പിതാവ് പറഞ്ഞു.

മൊറോക്കോയിൽനിന്ന് സ്പെയിനിന്റെ കീഴിലുള്ള സെവുത്തയിലേക്ക് അടുത്ത ദിവസങ്ങളിൽ മാത്രം അറുപതിനായിരത്തോളം ആളുകളാണ് കയറാൻ പരിശ്രമിച്ചത്. പ്രദേശത്തെ സ്ഥിരതാമസക്കാരായ ആളുകളുടെ എഴുപത് ശതമാനമാണ് ഈ ജനസംഖ്യ. ഈ സ്വയം ഭരണപ്രദേശത്ത് സ്വീകരിക്കാനാകുന്നതിനപ്പുറം കുടിയേറ്റക്കാർ എത്തിയതിനെത്തുടർന്ന് സ്പെയിൻ സർക്കാർ പ്രദേശത്ത് കൂടുതൽ സുരക്ഷാസേനയെ വിന്യസിച്ചിരുന്നു. കടൽമാർഗം അതിർത്തി കടക്കാനുള്ള ശ്രമങ്ങൾക്കിടെ തിരക്കിനിടയിൽപ്പെട്ടും, കടലിൽ വീണും കഴിഞ്ഞ ദിവസങ്ങളിൽ മാത്രം പ്രദേശത്ത് 67 പേരെങ്കിലും മരിച്ചതായി റിപ്പോർട്ടുകൾ വ്യക്തമാക്കിയിരുന്നു.

കാദിസ് രൂപത

അതേസമയം, കുടിയേറ്റവുമായി ബന്ധപ്പെട്ട ഈ പ്രതിസന്ധിയിൽ പ്രദേശത്തെ കാദിസ് രൂപത (Cádiz) ആശങ്ക രേഖപ്പെടുത്തുകയും, ഈ പ്രതിസന്ധിയിൽ പ്രാദേശിക ഭരണനേതൃത്വത്തിനൊപ്പം, അവിടുത്തെ മാനവികപ്രതിസന്ധിയോട് പ്രതികരിക്കാൻ തയ്യാറാകുകയും ചെയ്തിരുന്നു. ഇടവകകളിൽനിന്ന് ശേഖരിച്ച സംഭാവനകൾ, കുടിയേറ്റക്കാരുടേതുൾപ്പെടെയുള്ള അടിസ്ഥാന ആവശ്യങ്ങൾക്കായി രൂപതാനേതൃത്വം നീക്കിവച്ചു.

നിരവധിയിടങ്ങളിലെ യുദ്ധങ്ങളും സഹനമനുഭവിക്കുന്ന ജനങ്ങളും

ലോകത്ത് യുദ്ധങ്ങളും സംഘർഷങ്ങളും മൂലം ദുരിതമനുഭവിക്കുന്ന ആളുകളെയും പരിശുദ്ധ പിതാവ് തന്റെ പ്രഭാഷണത്തിൽ അനുസ്മരിച്ചു. യുദ്ധങ്ങൾ അവസാനിക്കാനും സംഘർഷങ്ങൾക്ക് നയതന്ത്രപരമായ പരിഹാരങ്ങൾ കണ്ടെത്തുവാനും വേണ്ടി നമുക്ക് പ്രാർത്ഥിക്കാമെന്ന് പരിശുദ്ധ പിതാവ് ആഹ്വാനം ചെയ്തു.

കുട്ടികളും, വയോധികരും രോഗികളുമായ ആളുകളെ പ്രത്യേകം പരാമർശിച്ച പാപ്പാ, യുദ്ധങ്ങളും സംഘർഷങ്ങളും മൂലം ദുരിതമനുഭവിക്കുന്നവർക്ക് ദൈവം ആശ്വാസം നൽകട്ടേയെന്നും, അവർക്കായി സഹായസഹകരണങ്ങൾ എത്തിക്കുന്നവരെ അനുഗ്രഹിക്കട്ടെയെന്നും ആശംസിച്ചു.