വെനിസ്വേലൻ ജനതയ്ക്ക് തന്റെ സാമീപ്യം അറിയിച്ച് പരിശുദ്ധ പിതാവ്

വത്തിക്കാൻ ന്യൂസ്

1400-ലധികം പേർക്ക് ജീവഹാനി സംഭവിക്കുകയും, 3200-ഓളം പേർക്ക് പരിക്കേൽക്കുകയും ചെയ്ത,  വെനസ്വേലയിലുണ്ടായ വിനാശകരമായ ഭൂകമ്പത്തിൽ, ദുരിതബാധിതർക്ക് തന്റെ സാമീപ്യവും, പ്രാർത്ഥനകളും പരിശുദ്ധ പിതാവ് ലിയോ പതിനാലാമൻ പാപ്പാ അറിയിച്ചു. തകർന്നടിഞ്ഞ കെട്ടിടങ്ങൾക്കിടയിൽ കാണാതായ 50,000-ത്തോളം പേർക്കായി രാപ്പകൽ തിരച്ചിൽ നടത്തുന്ന രക്ഷാപ്രവർത്തകരെ പാപ്പാ പ്രോത്സാഹിപ്പിക്കുകയും അവർക്ക് നന്ദിയർപ്പിക്കുകയും ചെയ്തു.

ജൂൺ 24-നാണ് വെനസ്വേലയിൽ 7.2, 7.5 തീവ്രത രേഖപ്പെടുത്തിയ ഇരട്ട ഭൂകമ്പങ്ങൾ ഉണ്ടായത്. 'ലാ ഗ്വൈര' (La Guaira) പ്രവിശ്യയെയാണ് ദുരന്തം ഏറ്റവും കൂടുതൽ ബാധിച്ചത്. ജൂൺ മാസം ഇരുപത്തിയെട്ടാം തീയതി നടന്ന  മധ്യാഹ്ന പ്രാർത്ഥനാവേളയിൽ പാപ്പാ മരിച്ചവരുടെ നിത്യശാന്തിക്കായി പ്രാർത്ഥിക്കുകയും, പരിക്കേറ്റവർക്കും,  ഈ ദുരന്തത്തിൽ ദുരിതമനുഭവിക്കുന്നവർക്കും തന്റെ ആത്മീയ സാമീപ്യം ഉറപ്പു നൽകുകയും ചെയ്തു. എന്നാൽ വാക്കുകൾ കൊണ്ട് മാത്രമല്ല, പാപ്പായുടെ ഉപവി പ്രവർത്തനങ്ങൾക്കായുള്ള കേന്ദ്രം വഴിയായി, ഒരു ലക്ഷം യൂറോ  അടിയന്തര ധനസഹായമായി പാപ്പാ ഇതിനോടകം വെനസ്വേലയിലേക്ക് അയച്ചിരുന്നു.

കഴിഞ്ഞ ദിവസം നടന്ന കർദ്ദിനാൾമാരുടെ കൺസിസ്റ്ററിയിലും, വെനസ്വേലയ്ക്കായി പ്രാർത്ഥിക്കാൻ പാപ്പാ  ആവശ്യപ്പെട്ടിരുന്നു. അന്താരാഷ്ട്ര സമൂഹം വെനസ്വേലയ്ക്ക് ആവശ്യമായ എല്ലാ സഹായങ്ങളും നൽകണമെന്ന് അഭ്യർത്ഥിച്ചതോടൊപ്പം, വർഷങ്ങളായി കഷ്ടതകൾ അനുഭവിക്കുന്ന ആ രാജ്യത്തിന് ഈ ദുരന്തം താങ്ങാവുന്നതിലും അധികമാണെന്നും പാപ്പാ കൂട്ടിച്ചേർത്തു.