എപ്പിഫനി ദിനത്തിൽ ജൂബിലി വർഷാവസാനച്ചടങ്ങുകൾക്ക് ലിയോ പതിനാലാമൻ പാപ്പാ മുഖ്യ കാർമ്മികത്വം വഹിക്കും

മോൺസിഞ്ഞോർ ജോജി വടകര, വത്തിക്കാന്‍ ന്യൂസ്

ജൂബിലി വർഷാവസാനച്ചടങ്ങുകളും എപ്പിഫനി തിരുനാൾ ആഘോഷവും സംബന്ധിച്ച കൂടുതൽ വിവരങ്ങൾ വത്തിക്കാനിലെ ആരാധനാക്രമകാര്യങ്ങൾക്കായുള്ള വിഭാഗം പുറത്തുവിട്ടു. ഇതനുസരിച്ച് 2026 ജനുവരി ആറാം തീയതി ചൊവ്വാഴ്ച രാവിലെ 9.30-നായിരിക്കും ചടങ്ങുകൾ നടക്കുക. വിശുദ്ധ പത്രോസിന്റെ ബസലിക്കയിൽ നടക്കുന്ന ഇരു ചടങ്ങുകളിലും പരിശുദ്ധ പിതാവ് ലിയോ പതിനാലാമൻ പാപ്പാ മുഖ്യ കാർമ്മികത്വം വഹിക്കും.

എപ്പിഫനി എന്ന പ്രത്യക്ഷീകരണത്തിരുനാളിന്റെ ഭാഗമായ വിശുദ്ധ ബലിയർപ്പണത്തിന്റെ ആരംഭത്തിലായിരിക്കും വിശുദ്ധ വാതിൽ അടയ്ക്കുന്ന ചടങ്ങ് നടക്കുക. “ഒരു തിരിനാളം പോലെ എന്റെ പ്രതീക്ഷ എരിയുന്നു, എന്റെ ഗാനം അങ്ങിലേക്കുയരട്ടെ” എന്ന് തുടങ്ങുന്ന, ജൂബിലിയുടെ ഔദ്യോഗിക ഗാനം ലത്തീൻ ഭാഷയിൽ ആലപിച്ചുകൊണ്ടാകും ചടങ്ങുകൾ ആരംഭിക്കുക. തുടർന്ന് നടക്കുന്ന പ്രാർത്ഥനകൾക്ക് ശേഷം പരിശുദ്ധ പിതാവ് വിശുദ്ധ വാതിലിനരികിൽ മുട്ടുകുത്തുകയും, നിശബ്ദമായ പ്രാർത്ഥനയ്ക്ക് ശേഷം ഈ വാതിൽ അടയ്ക്കുകയും ചെയ്യും. വിശുദ്ധ വാതിൽ അടച്ചുകഴിഞ്ഞ് പരിശുദ്ധ പിതാവും മറ്റുള്ളവരും ബസലിക്കയിലെ പ്രധാന അൾത്താരയിലേക്ക് പോവുകയും വിശുദ്ധ ബലിയർപ്പണം തുടരുകയും ചെയ്യും.

വിശുദ്ധ വാതിൽ അടയ്ക്കുന്നതുമായി ബന്ധപ്പെട്ട ചടങ്ങുകൾ 1975-ലെ ജൂബിലിക്കായി തയ്യാറാക്കിയ ക്രമത്തിന്റെ 2000-ൽ ലഘൂകരിച്ച രൂപമനുസരിച്ചായിരിക്കും നടക്കുക. ഇതനുസരിച്ച്, പരസ്യമായി വിശുദ്ധ വാതിൽ ഭിത്തി കെട്ടി അടയ്ക്കുന്ന ചടങ്ങുകൾ ഇത്തവണയും ഉണ്ടാകില്ല. വിശുദ്ധ വാതിൽ അടച്ചുകഴിഞ്ഞ് പത്തോളം ദിവസങ്ങൾക്ക് ശേഷമായിരിക്കും ഇത് നടക്കുക.

വാതിലിന് പിന്നിലെ ഭിത്തിയുടെ നിർമ്മാണം നടത്തുക "സാൻ പിയെത്രീനി" എന്ന പേരിൽ വിളിക്കപ്പെടുന്ന, ബസലിക്കയിലെ പ്രവർത്തകരായിരിക്കും. ഈ ഭിത്തിക്കുള്ളിൽ, ജൂബിലി വാതിൽ അടച്ചതുമായി ബന്ധപ്പെട്ട വിവരങ്ങൾ, ജൂബിലി വർഷത്തിൽ തയ്യാറാക്കിയ നാണയങ്ങൾ, വിശുദ്ധ വാതിലിന്റെ താക്കോൽ എന്നിവയടങ്ങുന്ന ലോഹപേടകവും അടക്കം ചെയ്യും.

ഏശയ്യാ പ്രവാചകന്റെ പുസ്തകത്തിൽനിന്നുള്ള (60, 1-6) ഒന്നാം വായന ഇംഗ്ലീഷിലും, എഫേസോസുകർക്കുള്ള ലേഖനത്തിൽനിന്നുള്ള (3, 2-3a. 5-6) രണ്ടാം വായന സ്പാനിഷ് ഭാഷയിലും, പൂജരാജാക്കന്മാരുടെ വരവിനെക്കുറിച്ച് മത്തായിയുടെ സുവിശേഷത്തിൽനിന്നുള്ള (2, 1-2) വായന ലത്തീൻ ഭാഷയിലും വായിക്കപ്പെടും. ഇതേത്തുടർന്ന് പെസഹയുമായി ബന്ധപ്പെട്ട തീയതികൾ അറിയിക്കപ്പെടും. അതിന് ശേഷമായിരിക്കും പരിശുദ്ധ പിതാവ് സുവിശേഷപ്രസംഗം നടത്തുക.

പ്രസംഗത്തിന് ശേഷമുള്ള "വിശ്വാസികളുടെ പ്രാർത്ഥനകളിൽ, പരിശുദ്ധ പിതാവിനുവേണ്ടിയുള്ള പ്രാർത്ഥന അറബ് ഭാഷയിലും, ജ്ഞാനസ്നാനം സ്വീകരിച്ച ഏവർക്കും വേണ്ടിയുള്ള പ്രാർത്ഥന ഫ്രഞ്ച് ഭാഷയിലും, ഭരണനേതൃത്വം വഹിക്കുന്നവർക്കുവേണ്ടിയുള്ള പ്രാർത്ഥന സ്വാഹിലി എന്ന ആഫ്രിക്കൻ ഭാഷയിലും, ശാസ്ത്രവിഷയങ്ങളുടെ മേഖലയിൽ പ്രവർത്തിക്കുന്നവർക്ക് വേണ്ടിയുള്ള പ്രാർത്ഥന പോർച്ചുഗീസ് ഭാഷയിലും, വിശുദ്ധബലിയിൽ പങ്കെടുക്കുന്നവർക്ക് വേണ്ടിയുളള പ്രാർത്ഥന കൊറിയൻ ഭാഷയിലും വായിക്കപ്പെടും.