സുതാര്യതയോടും സത്യസന്ധതയോടും കൂടെയുള്ള മാധ്യമപ്രവർത്തനം പൊതുനന്മയും ഐക്യവും വളർത്തുന്നു: ലിയോ പതിനാലാമൻ പാപ്പാ

മോൺസിഞ്ഞോർ ജോജി വടകര, വത്തിക്കാന്‍ ന്യൂസ്

അഭിപ്രായങ്ങളിലെ ഭിന്നതകളും വ്യത്യസ്തതകളും നിലനിൽക്കുമ്പോഴും സത്യസന്ധയോടെയും സുതാര്യതയോടെയും നടത്തുന്ന മാധ്യമപ്രവർത്തനം സമൂഹത്തിന്റെ പൊതുനന്മയ്ക്കും മാനവികതയുടെ ഐക്യത്തിനും സഹായകരമാകുമെന്ന് ലിയോ പതിനാലാമൻ പാപ്പാ. ഇറ്റലിയിലെ "ല റെപുബ്ലിക്ക" (La Repubblica) എന്ന പത്രത്തിന്റെ അൻപതാം സ്ഥാപനവർഷികവുമായി ബന്ധപ്പെട്ട് ഡയറക്ടർ മാരിയോ ഒർഫേയോയ്ക്ക് (Mario ORFEO) ജനുവരി 14-ന് അയച്ച ഒരു സന്ദേശത്തിലാണ് മാധ്യമമേഖലയിലുണ്ടാകേണ്ട മൂല്യങ്ങളെക്കുറിച്ച് പാപ്പാ സൂചിപ്പിച്ചത്.

വിവിധ അഭിപ്രായങ്ങളും, കാഴ്ചപ്പാടുകളും സംസ്കാരങ്ങളും നിലനിൽക്കുമ്പോൾത്തന്നെ സുതാര്യതയോടും സത്യസന്ധതയോടും കൂടി, കാര്യങ്ങൾ അറിയാനുള്ള സാധ്യത നൽകുന്നതാണ് പത്രസ്വാതന്ത്ര്യത്തിന്റെ അർത്ഥം തന്നെയെന്ന് പാപ്പാ എഴുതി. ഇത്തരം പ്രവർത്തനം "ശത്രുതാമനോഭാവം" ഇല്ലാത്തതാണെങ്കിൽ അത് പൊതുനന്മയ്ക്കും മാനവികതയുടെ ഐക്യത്തിനും സഹായകരമാകുമെന്ന് പാപ്പാ വ്യക്തമാക്കി.

വിവിധ നഗരങ്ങളിൽ വേരോട്ടമുള്ള ല റെപുബ്ലിക്കയുടെ പ്രധാന ഓഫീസ്, താൻ അദ്ധ്യക്ഷനായിരിക്കുന്ന രൂപത കൂടിയായ റോമിലാണ് എന്ന കാര്യം പരാമർശിച്ച പാപ്പാ, ഇത് ഇറ്റലിയിലെയും ലോകത്തിലെയും സംഭവങ്ങളെക്കുറിച്ച് സവിശേഷമായ രീതിയിൽ നോക്കിക്കാണാൻ സഹായകരമാണെന്ന് അഭിപ്രായപ്പെട്ടു. കഴിഞ്ഞ അൻപതു വർഷങ്ങളുടെ ചരിത്രത്താളുകൾ സ്വാതന്ത്ര്യത്തോടെ വായിക്കാൻ നിങ്ങൾക്കായെന്നും, സഭയുടെ ചരിത്രമുൾപ്പെടെയുള്ള കാര്യങ്ങൾ ഈ വർഷങ്ങളിൽ നിങ്ങൾ നിങ്ങളുടെ വായനക്കാരിലേക്കെത്തിച്ചുവെന്നും പാപ്പാ എഴുതി.

സത്യാന്വേഷണത്താൽ നയിക്കപ്പെടുന്നതും, മുൻവിധികളില്ലാത്തതും സ്വതന്ത്രവും സംവാദകാത്മകവുമായ വാർത്താവിനിമയശൈലി വളർത്തിയെടുക്കാൻ ല റെപുബ്ലിക്കയെ പാപ്പാ ആഹ്വാനം ചെയ്തു.

1996 വരെ പത്രാധിപരായിരുന്ന എവ്ജേനിയോ സ്‌കൽഫാരി സ്ഥാപിച്ച ല റെപുബ്ലിക്കയുടെ പ്രഥമ പകർപ്പ് 1976 ജനുവരി 14-നായിരുന്നു പറത്തിറങ്ങിയത്.