റോമിലെ മേജർ ബസലിക്കകളിൽ പ്രത്യാശയുടെ ജൂബിലി വർഷത്തിൽ തുറന്ന വിശുദ്ധ വാതിലുകൾ അടയ്ക്കുന്നു

മോൺസിഞ്ഞോർ ജോജി വടകര, വത്തിക്കാന്‍ ന്യൂസ്

പ്രത്യാശയുടെ ജൂബിലി വർഷത്തിന്റെ ആരംഭത്തിൽ റോമിലെ മേജർ ബസലിക്കകളിൽ തുറന്ന വിശുദ്ധ വാതിലുകൾ അടയ്ക്കുന്നത് സംബന്ധിച്ച വിവരങ്ങൾ പരിശുദ്ധ സിംഹാസനം പുറത്തുവിട്ടു. ജൂബിലി വർഷത്തിന്റെ അവസാനം കുറിക്കുന്ന ചടങ്ങുകളിൽ പ്രധാനപ്പെട്ടതാണ്, പ്രാർത്ഥനയുടെയും വിശുദ്ധ ബലിയുടെയും പശ്ചാത്തലത്തിലുള്ള ഈ കർമ്മം.

മേരി മേജർ ബസലിക്കയിൽ വിശുദ്ധവാതിലാണ് ആദ്യം അടയ്ക്കപ്പെടുക. ഡിസംബർ 25 വ്യാഴാഴ്ച വൈകുന്നേരം അഞ്ചുമണിക്ക്, സായാഹ്നപ്രാർത്ഥനയോടെ ചടങ്ങുകൾ ആരംഭിക്കും. തുടർന്ന് നടക്കുന്ന വിശുദ്ധ വാതിൽ അടയ്ക്കുന്ന ചടങ്ങുകളിൽ ബസലിക്കയുടെ ആർച്ച്പ്രീസ്റ്റായ കർദ്ദിനാൾ റൊളാന്താസ് മാക്റിസ്കാസ് മുഖ്യ കാർമ്മികത്വം വഹിക്കും. തുടർന്ന് വിശുദ്ധ ബലിയർപ്പണവും നടക്കും. ഉണ്ണിയേശുവിന്റെ പുൽത്തൊട്ടിയുടെ തിരുശേഷിപ്പുകൾ സൂക്ഷിക്കപ്പെടുന്നത് ഈ ബസലിക്കയിലാണ്. 2025 ജനുവരി ഒന്നാം തീയതിയാണ് ഈ ബസലിക്കയിലെ വിശുദ്ധ വാതിൽ തുറക്കപ്പെട്ടത്. ലഭ്യമായ കണക്കുകൾ പ്രകാരം രണ്ടു കോടിയിലധികം ആളുകളാണ് ജൂബിലി വർഷത്തിൽ ഈ വിശുദ്ധ വാതിൽ കടന്നത്. ഫ്രാൻസിസ് പാപ്പായുടെ ആഗ്രഹപ്രകാരം, അദ്ദേഹത്തിന്റെ ഭൗതികശരീരം അടക്കം ചെയ്യപ്പെട്ടതും ഈ ബസലിക്കയിലാണ്.

രണ്ടാമതായി അടയ്ക്കപ്പെടുന്ന വിശുദ്ധ വാതിൽ വിശുദ്ധ ജോൺ ലാറ്ററൻ ബസലിക്കയിലേതാണ്. ഡിസംബർ 27 ശനിയാഴ്ച രാവിലെ പതിനൊന്നിന് നടക്കുന്ന ചടങ്ങുകളിൽ റോം രൂപതയ്ക്കുവേണ്ടിയുള്ള പരിശുദ്ധ പിതാവിന്റെ വികാർ ജനറൽ കൂടിയായ കർദ്ദിനാൾ ബാൾദോ റെയ്‌ന മുഖ്യ കാർമ്മികത്വം വഹിക്കും. മോൺ. മാർകോ ഫ്രിസീനയുടെ നേതൃത്വത്തിൽ റോം രൂപതയുടെ ഔദ്യോഗിക ഗായകസംഘം ഗാനങ്ങൾ ആലപിക്കും. ചടങ്ങുകളിൽ സംബന്ധിക്കാൻ ആഗ്രഹിക്കുന്ന വിശ്വാസികൾ സൗജന്യമായി ലഭിക്കുന്ന ടിക്കറ്റുകൾ മുൻകൂട്ടി കൈപ്പറ്റിയിരിക്കണം. ജൂബിലി വർഷങ്ങളുടെ ചരിത്രത്തിൽ ആദ്യമായി തുറക്കപ്പെട്ടത് ഈ ബസലിക്കയിലെ വാതിലാണ്. 1423-ൽ മാർട്ടിൻ അഞ്ചാമൻ പാപ്പായാണ് ജൂബിലി വർഷത്തിന്റെ ഭാഗമായി വിശുദ്ധ വാതിൽ കടക്കുന്ന ചടങ്ങിന്റെ പ്രാധാന്യം എടുത്തുകാണിച്ചത്. 1499-ലെ ക്രിസ്തുമസ് കാലത്ത് അലക്‌സാണ്ടർ ആറാമൻ പാപ്പായാണ് വിശുദ്ധ പത്രോസിന്റെ ബസലിക്കയിൽ ആദ്യമായി വിശുദ്ധ വാതിൽ തുറന്നത്.

മൂന്നാമതായി അടയ്ക്കപ്പെടുക റോമൻ മതിലുകൾക്ക് പുറത്തുളള വിശുദ്ധ പൗലോസിന്റെ നാമധേയത്തിലുള്ള ബസലിക്കയിലെ വിശുദ്ധ വാതിലാണ്. ഡിസംബർ 28 ഞായറാഴ്ച രാവിലെ പത്തുമണിക്ക് ആരംഭിക്കുന്ന ഈ ചടങ്ങിൽ ബസലിക്കയുടെ ആർച്ച്പ്രീസ്റ്റായ കർദ്ദിനാൾ ജെയിംസ് മൈക്കിൾ ഹാർവെയ്‌ മുഖ്യ കാർമ്മികത്വം വഹിക്കും. വിശുദ്ധ ബലിയുൾപ്പെടെ ഈ ചടങ്ങിന്റെ ഭാഗമായുണ്ടാകും. ചടങ്ങിൽ സംബന്ധിക്കുന്നതിന് ടിക്കറ്റ് ആവശ്യമില്ല. എന്നാൽ വിശുദ്ധബലിയിൽ സഹകാർമ്മികരാകാൻ ആഗ്രഹിക്കുന്ന വൈദികർ sacrestia@abbaziasanpaolo.org എന്ന ഇമെയിലിലേക്ക് ഡിസംബർ 26-നുള്ളിൽ എഴുതണം.

മേജർ പേപ്പൽ ബസലിക്കകളിലെ വിശുദ്ധ വാതിലുകളിൽ അവസാനമായി അടയ്ക്കപ്പെടുക വത്തിക്കാനിലെ വിശുദ്ധ പത്രോസിന്റെ ബസലിക്കയിലെ വാതിലായിരിക്കും. ജനുവരി ആറാം തീയതി ചൊവ്വാഴ്ച നടക്കുന്ന ഈ ചടങ്ങോടെ ജൂബിലി വർഷം അവസാനിക്കും. എപ്പിഫനി തിരുനാളിന്റെ കൂടി ഭാഗമായി രാവിലെ 9.30-ന് ആരംഭിക്കുന്ന വിശുദ്ധ ബലിയിൽ പരിശുദ്ധ പിതാവ് ലിയോ പതിനാലാമൻ പാപ്പാ മുഖ്യ കാർമ്മികത്വം വഹിക്കും. 2024 ഡിസംബർ 24-ന് ഫ്രാൻസിസ് പാപ്പായാണ് ജൂബിലി വർഷാരംഭത്തിന്റെ ഭാഗമായി ഈ വാതിൽ തുറന്നത്.

ഫ്രാൻസിസ് പാപ്പാ റോമിലെ റേബിബ്ബിയയിലുള്ള ജയിലിൽ ഡിസംബർ 26-ന് അത്യപൂർവ്വമായി തുറന്ന വിശുദ്ധ വാതിൽ അടയ്ക്കുന്ന തീയതി വരും ദിവസങ്ങളിൽ അറിയിക്കുമെന്ന് പരിശുദ്ധ സിംഹാസനം വ്യക്തമാക്കി.