തിരുക്കുടുംബം നമ്മുടെ കുടുംബങ്ങൾക്ക് മാതൃകയാണ്

ഫാ. ജിനു തെക്കേത്തലക്കൽ, വത്തിക്കാൻ സിറ്റി

ഈശോമിശിഹായിൽ സ്നേഹം നിറഞ്ഞ  സഹോദരീ സഹോദരന്മാരെ,

ഇന്നത്തെ സുവിശേഷം നമ്മെ കൊണ്ടുപോകുന്നത് ചരിത്രത്തിലെ ഏറ്റവും നിർണ്ണായകമായ ഒരു യാത്രയിലേക്കാണ്. ബെത്‌ലഹേമിലെ കാലിത്തൊഴുത്തിൽ നിന്ന്, ഈജിപ്തിലേക്കുള്ള മരുഭൂമിയിലൂടെ, തിരികെ നസറത്തിലേക്കുള്ള യാത്ര. മത്തായിയുടെ സുവിശേഷം രണ്ടാം അധ്യായം 13 മുതൽ 23 വരെയുള്ള വാക്യങ്ങൾ നമ്മോട് സംസാരിക്കുന്നത് കേവലം ഒരു ചരിത്രസംഭവത്തെക്കുറിച്ചല്ല, മറിച്ച് ദൈവത്തിൻ്റെ രക്ഷാകര പദ്ധതിയിൽ മനുഷ്യൻ എങ്ങനെ സഹകരിക്കണമെന്നും, തിരുക്കുടുംബം എങ്ങനെ നമുക്കൊരു മാതൃകയാകുന്നുവെന്നും ഉള്ള വലിയ സത്യങ്ങളെക്കുറിച്ചാണ്.

ഈ സുവിശേഷഭാഗം ധ്യാനിക്കുമ്പോൾ പ്രധാനമായും അഞ്ച് കാര്യങ്ങളാണ് നമ്മുടെ ചിന്തയിലേക്ക് കടന്നുവരേണ്ടത്.

ദൈവത്തിൻ്റെ എളിമ

നമ്മുടെ ചിന്തകൾക്ക് അതീതമായ ഒരു വിരോധാഭാസമാണ് ഈ സുവിശേഷഭാഗത്തിൻ്റെ തുടക്കത്തിൽ നാം കാണുന്നത്. പ്രപഞ്ചത്തെ മുഴുവൻ സൃഷ്ടിച്ചു പരിപാലിക്കുന്ന സർവ്വശക്തനായ ദൈവം, തൻ്റെ ഏകജാതനെ ഭൂമിയിലേക്ക് അയച്ചപ്പോൾ, അവനെ സംരക്ഷിക്കാൻ തിരഞ്ഞെടുത്തത് സ്വർഗ്ഗീയ സൈന്യത്തെയല്ല, മറിച്ച് ഒരു പാവപ്പെട്ട മരപ്പണിക്കാരനെയും ലളിതമായ ഒരു പെൺകുട്ടിയെയും ആയിരുന്നു.

ഹെറോദേസ് എന്ന ക്രൂരനായ രാജാവ് ഉണ്ണീശോയെ വധിക്കാൻ ശ്രമിക്കുന്നു. ദൈവത്തിന് വേണമെങ്കിൽ ഒറ്റ നിമിഷം കൊണ്ട് ഹെറോദേസിനെ നശിപ്പിക്കാമായിരുന്നു. അല്ലെങ്കിൽ തൻ്റെ പുത്രനെ അദൃശ്യനാക്കാമായിരുന്നു. എന്നാൽ ദൈവം അത് ചെയ്തില്ല. പകരം, ദൈവം "പലായനം" ചെയ്യാൻ ആവശ്യപ്പെടുന്നു. എന്തൊരു എളിമയാണിത്! സർവ്വശക്തൻ സൃഷ്ടിയുടെ മുൻപിൽ ഓടിയൊളിക്കുന്നു.

ദൈവം മനുഷ്യനായി അവതരിച്ചപ്പോൾ, മനുഷ്യജീവിതത്തിൻ്റെ എല്ലാ അരക്ഷിതാവസ്ഥകളും അവിടുന്ന് സ്വീകരിച്ചു. ഒരു അഭയാർത്ഥിയുടെ വേഷം കെട്ടാൻ ദൈവം മടിച്ചില്ല. അധികാരത്തിൻ്റെ ഗർവ്വിനെ, എളിമയുടെ പലായനം കൊണ്ട് തോൽപ്പിച്ച ദൈവത്തെയാണ് നാം ഇവിടെ കാണുന്നത്. നമ്മുടെ ജീവിതത്തിൽ പ്രതിസന്ധികൾ വരുമ്പോൾ, ദൈവം എന്തിന് അത് അനുവദിക്കുന്നു എന്ന് നാം ചോദിക്കാറുണ്ട്. എന്നാൽ ഓർക്കുക, സ്വന്തം പുത്രനെപ്പോലും പ്രതിസന്ധികളിൽ നിന്ന് 'മാന്ത്രികമായി' രക്ഷിക്കാതെ, മനുഷ്യസഹജമായ സഹനങ്ങളിലൂടെ വഴിനടത്തിയ ദൈവമാണ് നമ്മുടേത്. ആ എളിമയാണ് നമ്മുടെ ശക്തി.

ഈജിപ്തിലേക്കുള്ള പലായനം

"രാത്രിയിൽ" എഴുന്നേറ്റ് അവർ യാത്ര തിരിച്ചു എന്ന് സുവിശേഷം പറയുന്നു. ആ രാത്രിയുടെ ഭീകരത നമുക്കൊന്ന് ആലോചിച്ചു നോക്കാം. അപരിചിതമായ വഴി, കയ്യിൽ ഒന്നുമില്ല, ലക്ഷ്യം വിജാതീയരുടെ നാടായ ഈജിപ്ത്. പഴയ നിയമത്തിൽ ഇസ്രായേൽ ജനത അടിമകളായി കിടന്ന സ്ഥലമാണ് ഈജിപ്ത്. അവിടേക്കാണ് പുതിയ ഇസ്രായേലായ ഈശോ പോകുന്നത്.

ഇതൊരു ഉല്ലാസയാത്രയായിരുന്നില്ല. പൊള്ളുന്ന മരുഭൂമിയും, കൊള്ളക്കാരുടെ ശല്യവും, വന്യമൃഗങ്ങളുടെ ഭീഷണിയും നിറഞ്ഞ വഴി. കൈക്കുഞ്ഞുമായി പോകുന്ന മറിയം, വഴി അറിയാതെ ഉഴലുന്ന ജോസഫ്. ഇവർ കടന്നുപോയ മാനസിക സംഘർഷം എത്ര വലുതായിരുന്നിരിക്കണം?

ഇന്ന് ലോകമെമ്പാടും യുദ്ധവും ദാരിദ്ര്യവും മൂലം പലായനം ചെയ്യുന്ന ലക്ഷക്കണക്കിന് അഭയാർത്ഥികളുടെ മുഖം നമുക്ക് ഈ തിരുക്കുടുംബത്തിൽ കാണാം. സ്വന്തം മണ്ണിൽ നിന്ന് പറിച്ചുനടപ്പെടുന്നവൻ്റെ വേദന ഈശോ അനുഭവിച്ചു. "എനിക്ക് വീടില്ല, എനിക്ക് നാടില്ല" എന്ന് പറഞ്ഞ് വിഷമിക്കുന്നവർക്ക്, ഈജിപ്തിലേക്ക് ഓടിപ്പോകുന്ന ഉണ്ണീശോ വലിയൊരു ആശ്വാസമാണ്. ആരും തുണയില്ലാത്തവൻ്റെ തുണയായി ദൈവം കൂടെയുണ്ട് എന്നതിൻ്റെ വലിയ തെളിവാണിത്.

ദൈവപദ്ധതിയുമായി സഹകരിക്കുമ്പോഴുള്ള വെല്ലുവിളികൾ

ദൈവഹിതം അനുസരിക്കുക എന്നത് എപ്പോഴും പൂക്കികൾ വിരിച്ച പാതയല്ല എന്ന് ജോസഫിൻ്റെ ജീവിതം നമ്മെ പഠിപ്പിക്കുന്നു. ദൈവത്തിൻ്റെ രക്ഷാകര പദ്ധതിയുമായി സഹകരിക്കാൻ വിളിക്കപ്പെടുന്നവർ വലിയ ത്യാഗങ്ങൾ സഹിക്കേണ്ടി വരും.

ജോസഫിനെ നോക്കുക. അവൻ നീതിമാനാണ്. അവൻ ദൈവത്തെ സ്നേഹിക്കുന്നവനാണ്. എന്നിട്ടും അവൻ്റെ ജീവിതം മുഴുവൻ അപ്രതീക്ഷിതമായ തിരുത്തലുകളായിരുന്നു.

ഒന്നാമതായി, അവൻ്റെ ഉറക്കം തടസ്സപ്പെടുന്നു. ദൈവം സ്വപ്നത്തിൽ വന്ന് "എഴുന്നേൽക്കുക" എന്ന് ആജ്ഞാപിക്കുന്നു.

രണ്ടാമതായി, അവൻ്റെ തൊഴിലും വരുമാനവും ഉപേക്ഷിക്കേണ്ടി വരുന്നു. നസറത്തിൽ അവൻ തുടങ്ങിയ ചെറിയ ജീവിതം ഉപേക്ഷിച്ച്, ഭാഷയോ സംസ്കാരമോ അറിയാത്ത ഈജിപ്തിലേക്ക് പോകേണ്ടി വരുന്നു.

മൂന്നാമതായി, അവൻ്റെ ഭാവിയെക്കുറിച്ചുള്ള സ്വപ്നങ്ങൾ മാറ്റിവയ്ക്കപ്പെടുന്നു.

നമ്മൾ പലപ്പോഴും ചിന്തിക്കാറുണ്ട്, "ഞാൻ ദൈവത്തിന് വേണ്ടി ഇത്രയൊക്കെ ചെയ്തിട്ടും എനിക്ക് എന്താണ് കഷ്ടപ്പാടുകൾ മാത്രം?" എന്ന്. എന്നാൽ നോക്കുക, ലോകരക്ഷകനായ ഈശോയെ വളർത്താൻ നിയോഗിക്കപ്പെട്ട ജോസഫിനും മറിയത്തിനും ദൈവം നൽകിയത് സുഖലോലുപതയല്ല, മറിച്ച് സഹനങ്ങളാണ്. ദൈവഹിതം നടപ്പിലാക്കാൻ "ഇപ്പോൾ, ഉടനെ"  പ്രവർത്തിക്കേണ്ടി വരും. ജോസഫ് "നാളെ പോകാം" എന്നോ "നേരം വെളുക്കട്ടെ" എന്നോ പറഞ്ഞില്ല. അവൻ്റെ അനുസരണം ഉടനടിയുള്ളതായിരുന്നു. ദൈവത്തിൻ്റെ പദ്ധതികൾക്ക് മുൻപിൽ സ്വന്തം സൗകര്യങ്ങൾ ബലികഴിക്കാൻ തയ്യാറാകുന്നിടത്താണ് യഥാർത്ഥ ക്രിസ്തീയ ജീവിതം ആരംഭിക്കുന്നത്.

തിരുക്കുടുംബം നൽകുന്ന മാതൃക

ഈ പ്രതിസന്ധികളുടെ നടുവിലും തകർന്നുപോകാതെ പിടിച്ചുനിന്ന ആ കുടുംബമാണ് നമ്മുടെ മാതൃക. എന്താണ് അവരെ പിടിച്ചു നിർത്തിയത്?

•                പരസ്പരമുള്ള വിശ്വാസം: ജോസഫ് പറഞ്ഞപ്പോൾ മറിയം മറുചോദ്യം ചോദിച്ചില്ല. മറിയത്തിൻ്റെ മൗനവും പ്രാർത്ഥനയും ജോസഫിന് കരുത്തായി. പ്രതിസന്ധികൾ വരുമ്പോൾ പരസ്പരം കുറ്റപ്പെടുത്തുന്ന ഭാര്യാഭർത്താക്കന്മാർ ഇന്നത്തെ കാലത്ത് ഏറിവരികയാണ്. "നിൻ്റെ കുറ്റം കൊണ്ടാണ് ഇത് സംഭവിച്ചത്" എന്ന് പറയുന്നതിന് പകരം, "നമുക്ക് ഒന്നിച്ച് നേരിടാം" എന്ന് പറയുന്ന ജോസഫും മറിയവുമാണ് നമുക്ക് മാതൃക.

•                ദൈവസ്വരം കേൾക്കാനുള്ള മനസ്സ്: ആ ബഹളങ്ങൾക്കിടയിലും ദൈവത്തിൻ്റെ സ്വരം (സ്വപ്നത്തിലൂടെ) തിരിച്ചറിയാൻ ജോസഫിന് കഴിഞ്ഞു. നമ്മുടെ കുടുംബങ്ങളിൽ ദൈവത്തിൻ്റെ സ്വരം കേൾക്കാൻ നാം സമയം കണ്ടെത്താറുണ്ടോ? പ്രാർത്ഥനയിലൂടെയും വചനവായനയിലൂടെയും ദൈവഹിതം തിരിച്ചറിയുന്ന കുടുംബങ്ങൾക്കേ പ്രതിസന്ധികളെ അതിജീവിക്കാൻ കഴിയൂ.

•                ശിശുവിനെ കേന്ദ്രമാക്കിയുള്ള ജീവിതം: അവരുടെ യാത്ര മുഴുവൻ ഉണ്ണീശോയെ സംരക്ഷിക്കാൻ വേണ്ടിയായിരുന്നു. അവരുടെ ജീവിതത്തിൻ്റെ കേന്ദ്രം 'അഹം'ആയിരുന്നില്ല, മറിച്ച് 'ദൈവം' ആയിരുന്നു. നമ്മുടെ കുടുംബങ്ങളുടെ കേന്ദ്രം ആരാണ്? പണമാണോ? മക്കളാണോ? അതോ ഈശോയാണോ? ഈശോ കേന്ദ്രസ്ഥാനത്തുള്ള കുടുംബങ്ങളിൽ സഹനങ്ങൾ വന്നാലും തകർച്ചകളുണ്ടാകില്ല.

 സഹനങ്ങളിലെ ദൈവസാന്നിധ്യം

ഹെറോദേസ് മരിച്ചപ്പോൾ, വീണ്ടും ദൈവദൂതൻ പ്രത്യക്ഷപ്പെട്ട് അവരോട് തിരികെ പോകാൻ പറയുന്നു. ഇതിൽ നിന്നും നാം പഠിക്കേണ്ട വലിയൊരു പാഠമുണ്ട്: "സഹനങ്ങൾക്കും പീഡനങ്ങൾക്കും ഒരു കാലാവധിയുണ്ട്, എന്നാൽ ദൈവകാരുണ്യത്തിന് അവസാനമില്ല."

ഈജിപ്തിലെ പ്രവാസത്തിന് ഒരു അവസാനമുണ്ടായി. ഹെറോദേസ് മരിച്ചു, പക്ഷേ ഉണ്ണീശോ ജീവിച്ചു. തിന്മയുടെ ശക്തികൾ എത്ര തന്നെ ശക്തമാണെന്ന് തോന്നിയാലും, അവയ്ക്ക് ദൈവത്തിൻ്റെ പദ്ധതിയെ തകർക്കാൻ കഴിയില്ല. ദൈവം തൻ്റെ ജനത്തെ കൈവിടില്ല. "ഞാൻ നിങ്ങളോട് കൂടെയുണ്ട്" എന്ന വാഗ്ദാനം പാലിക്കുന്നവനാണ് ദൈവം.

ഈജിപ്തിലേക്കുള്ള വഴിയിലും, അവിടെ താമസിച്ച നാളുകളിലും, തിരികെ വരുമ്പോഴും അവർ തനിച്ചായിരുന്നില്ല. സാക്ഷാൽ ദൈവപുത്രൻ അവരുടെ കൈകളിൽ ഉണ്ടായിരുന്നു. നമ്മുടെ ജീവിതത്തിലെ 'ഈജിപ്തുകളിലും' - അത് രോഗമായാലും, കടബാധ്യതയായാലും, കുടുംബപ്രശ്നങ്ങളായാലും - ഈശോ കൂടെയുണ്ട് എന്ന സത്യം നമ്മെ ധൈര്യപ്പെടുത്തണം. ദൈവം പ്രശ്നങ്ങൾ ഇല്ലാതാക്കുന്നവനല്ല, മറിച്ച് പ്രശ്നങ്ങളുടെ നടുവിൽ കൂടെ നടക്കുന്നവനാണ്.

പ്രിയപ്പെട്ടവരെ,

നസറത്തിലെ ആ ചെറിയ കുടുംബം, തിരുക്കുടുംബം, ഇന്ന് നമ്മുടെ ഓരോരുത്തരുടെയും കുടുംബങ്ങൾക്ക് നേരെ പിടിച്ച കണ്ണാടിയാണ്.

1.              നിങ്ങളുടെ കുടുംബം സാമ്പത്തിക തകർച്ചയിലാണോ? ഓർത്തിരിക്കുക, ജോസഫും മറിയവും ദാരിദ്ര്യത്തിലൂടെ കടന്നുപോയവരാണ്.

2.              നിങ്ങൾ നാടുവിട്ടു ജോലി ചെയ്യേണ്ടി വരുന്നവരാണോ? ഈജിപ്തിലേക്ക് പലായനം ചെയ്ത തിരുക്കുടുംബത്തെ ഓർക്കുക.

3.              അധികാരികളിൽ നിന്നോ സമൂഹത്തിൽ നിന്നോ പീഡനങ്ങൾ ഏൽക്കുന്നുണ്ടോ? ഹെറോദേസിനെ ഭയന്ന് ഓടേണ്ടി വന്ന ദൈവപുത്രനെ ഓർക്കുക.

പക്ഷേ, ഇതിനെല്ലാം ഒടുവിൽ അവർ നസറത്തിൽ തിരിച്ചെത്തി, ദൈവകൃപയിൽ വളർന്നു. നമ്മുടെ സഹനങ്ങളും ശാശ്വതമല്ല. ദൈവഹിതത്തിന് കീഴ്വഴങ്ങാൻ നാം തയ്യാറായാൽ, ജോസഫിനെപ്പോലെ ഉത്തരവാദിത്വങ്ങൾ ഏറ്റെടുക്കാൻ തയ്യാറായാൽ, മറിയത്തെപ്പോലെ ദൈവത്തെ ഹൃദയത്തിൽ സംഗ്രഹിക്കാൻ തയ്യാറായാൽ, നമ്മുടെ കുടുംബങ്ങളും തിരുക്കുടുംബങ്ങളായി മാറും.

ഹെറോദേസുമാർ മരിച്ചുപോകും, എന്നാൽ ദൈവഹിതം അനുസരിക്കുന്നവർ എന്നേക്കും നിലനിൽക്കും.

ഈജിപ്തിലെ പ്രവാസവും ഭയവും മാറി, നസറത്തിലെ സമാധാനം നമ്മുടെ ഭവനങ്ങളിൽ നിറയാൻ ഇടയാകട്ടെ. അതിനായി തിരുക്കുടുംബത്തിൻ്റെ മധ്യസ്ഥ്യം നമുക്ക് യാചിക്കാം.