Папата до шпанска невладина организација: Го откривате Христос во лицето на секој човек
Папата Лав XIV, утрото на 24 август 2026 година, во Ватикан се сретна со членови на Федерацијата „Марсодето“, организација која ги поддржува лицата со интелектуална попреченост и церебрална парализа во Толедо, Шпанија.
Федерацијата, основана во 1980 година, отпатува во Рим на ходочестие за да одбележи 45 години од својата мисија. Папата призна дека работата на оваа организација е „несомнено тешка задача“, која вклучува многу скриен труд што никој не го гледа и што само Бог може да го награди.
Сепак, тој нагласи дека тоа е мисија која причинува задоволство, бидејќи во лицето на секој човек може да се препознае самиот Исус Христос.
Преку својата работа, посочи Папата, членовите на Федерацијата „Марсодето“ сведочат за евангелската порака: „Вистина ви велам: доколку сте го направиле тоа на еден од овие Мои најмали браќа, Мене сте Ми го направиле“ (Матеј 25,40).
Препознавањето на Христовиот поглед, кој нè предизвикува во животот на најранливите, рече папата Лав XIV, „ни помага да растеме како човечко и христијанско општество“.
Никој да не остане без поддршка
Солидарноста, одбраната на човековото достоинство и целосната инклузија се вредностите што го обележуваат пристапот на Федерацијата во работата со лицата со интелектуална попреченост и церебрална парализа.
Пред повеќе од 40 години отец Марселино Касас Пуенте ја основал Федерацијата „Марсодето“, започнувајќи сон што со текот на времето станал реалност: ниту едно семејство во кое има лице со интелектуална попреченост да не остане без поддршка.
Денес Федерацијата им служи на повеќе од 2.600 луѓе. Папата Лав XIV истакна дека на тој начин организацијата го спроведува во дело она што тој го нагласи за време на својата посета на Шпанија во јуни оваа година: „Христовата љубов нè поттикнува кон нашите браќа и сестри“ (сп. 2 Коринтјаните 5,14), а милосрдието и грижата со кои одговараме на Неговите поттикнувања се доказ за нашата вера.
Завршувајќи ја својата порака до членовите на Федерацијата „Марсодето“, Папата ги довери на заштитата на Марија, молејќи таа да ги придружува во нивната понатамошна работа.
„Нека ве охрабрува во моментите на најголеми тешкотии и нека ви помогне секогаш да го држите погледот вперен во Господ, за да продолжи вашата Федерација да биде вистинска референтна точка и за Црквата и за општеството. Нека ве благослови Бог“, порача папата Лав XIV.
