Папата на светата Литургија во Римини: „На секое ниво, авторитетот е служење“

Папата Лав XIV во саботата навечер, 22 август 2026 година, служеше света Литургија на пристаништето во италијанскиот град Римини. Со ова заврши неговата еднодневна пасторална посета, која започна во Република Сан Марино и вклучуваше средба со учесниците на „Средбата за пријателство меѓу народите“.

Светиот Отец ја започна својата проповед потсетувајќи на исповедта на верата на свети Петар, кој Го признава Исус како Христос, Месијата, како што е запишано во Евангелието.

„Овде сме“, рече папата Лав XIV, „затоа што веруваме дека Исус е Месијата, вечниот Син на Отецот, осветен и испратен во светот ‘да служи и да го даде Својот живот како откуп за мнозина’.“

Во зборовите на Петар, продолжи тој, „ја препознаваме вистината што нè исполнува со радост и надеж и го наоѓаме патот што води во живот: патот на Бога Кој се става во служба на човештвото“.

Папата Лав XIV објасни дека токму така треба да го разбереме Исусовото предавање на клучевите на Царството. Тој гест ни покажува дека во Црквата авторитетот е служење.

Не само епископите и свештениците, туку секој крстен човек, рече Папата, е повикан да прегрне, повторно да обедини, прими, ослободи, прости и да го изведе на слобода „секој што е заробен од гревот и неговите последици“.

Сè што сме и имаме е дар од Бога

Осврнувајќи се на старозаветното читање, во кое неправедниот управител е отстранет од својата положба во полза на праведниот Елијаким, папата Лав XIV ја истакна пораката: „Сè што имаме и што сме е дар од Бога, за да можеме, во Неговите раце, да бидеме едни за други орудија на спасение во правда.“

Потоа Папата зборуваше за „недостижноста“ на Божјите планови за нас, за која свети Павле говори во второто читање. Тие планови, рече тој, не се тешко разбирливи поради сложеноста на расудувањето што стои зад нив, туку поради „разоружувачката бескрајност на Неговата љубов, која ги надминува сите наши способности и очекувања“.

Оваа божествена љубов, која сме повикани да ја поддржуваме, се огледува во чесноста, великодушноста и добронамерноста на луѓето од регионот Ромања, рече Светиот Отец.

Тој ги охрабри да продолжат да се грижат овој крај да биде гостопримливо место, „не само за одмор и забава, туку и за духовност“.

Одморот како вистинска средба со Бога и ближните

Во контекст на летниот одмор што се ближи кон крајот, папата Лав XIV ги предупреди верниците да не дозволат времето на одмор да се претвори во „распаѓање и пропаст“, туку да ја искористат можноста за вистински одмор во средба со Бога и со другите луѓе, во длабочините на душата.

Тој рече дека христијанската заедница е повикана да го негува ова искуство, како на лично така и на институционално ниво, преку гостопримство, сеќавање и подготвеност „да помогне и да понуди милосрдие“.

Ова, додаде Папата, не се однесува само на оние што бараат одмор и освежување, туку и на оние што се „ранети по тело и дух, кои бараат засолниште, храна и помош далеку од својата татковина“.

Цитирајќи го локалниот епископ, папата Лав XIV ги покани верниците собрани на светата Литургија да негуваат ставови на молитва, единство, слушање, храброст, едноставност и благодарност.

На крајот им се заблагодари за пречекот и ги довери на застапништвото на Пресвета Богородица и на нивните светци заштитници.