Папата потсети дека евхаристиската благодат нè преобразува и нè прави носители на надежта

На почетокот од вториот ден од својата пасторална посета на Шпанија, папата Лав XIV ја предводеше Светата Литургија по повод празникот Пресвето Тело и Крв Христови. Пред повеќе од 1,2 милиони луѓе, кои го исполнија плоштадот „Плаза де Сибелес“ во Мадрид и околните улици, во недела 7 јуни 2026 година, Папата ја изрази својата радост што е со нив, „собрани околу Евхаристијата, дарот на живото Христово присуство меѓу нас“.

Папата рече дека на овој ден на посебен начин се сеќаваме дека Господ доброволно ни го понудил Својот живот „за да можеме да влеземе во заедништво со Отецот и да станеме Негови деца“. Тој потсети дека Христос „е тука како живиот леб што слезе од небото, за да нè храни со самиот Божји живот, со љубов посилна од смртта“.

Жива вера во традициите на празникот

Папата оддаде почит на богатата историја на шпанското славење на Господовото присуство во евхаристискиот леб. Во Мадрид, како и во многу други делови од Шпанија, празникот Тело Христово се слави на посебен начин, како можност повторно да се вратиме „во срцето на верата за да ја обновиме нашата љубов и верност кон Бога“.

Тој истакна дека овие традиции, обележани со свечени поворки низ вековите, дале единствени и креативни изрази на побожност, уметност, музика, архитектура и живот на шпанскиот народ.

Но тие, нагласи Папата, не се само фолклор и уметност, туку „исповед на верата во присуството на воскреснатиот Господ, Кој е жив и продолжува да оди меѓу нас, Кој станува леб за да ја задоволи нашата глад за живот и ги посетува длабочините на нашите срца и историја, дури и оние обвиени во темнина“.

Христос нè храни и нè придружува

Евхаристиските поворки потсетуваат дека Христос нè храни, но и дека „излегува да нѐ сретне“ и нè придружува во секојдневниот живот, објасни Папата.

„Тој е Бог Кој е близок до нас, Кој оди со Својот народ, Господар на историјата. Тој е утеха за слабите, светлина за семејствата, надеж за болните и мир за оние што страдаат. Христос, Кој поминува низ улиците во монстранцата, е истиот Оној Кој се поистоветува со сиромашните, угнетените, осамените и напуштените“, рече папата Лав.

Тој објасни дека празникот Тело Христово нè повикува „да излеземе од нашата себичност и рамнодушност, од удобната и приватна вера, за да одговориме на Неговиот повик за преобраќање, да ја промениме нашата перспектива и да го примиме Неговото присуство што нè преобразува и нè прави градители на нов свет“.

Денешното славење на Тело Христово, со посебните поворки, останува секогаш актуелен повик „во нашиот секојдневен живот, во нашите односи, во општеството и во градењето на иднината“ да се сетиме, како што слушнавме во литургиските читања, дека Бог нè љуби, нè храни, нè придружува и нè спасува.

Побожноста треба да биде жива и денес

Потоа папата Лав ја истакна „задачата на Шпанија денес и во иднина“: „да се погрижи побожноста што со векови ја обликувала и ја определувала оваа земја да не биде музеј на минатото што треба да се посети, туку училиште на верата од кое може да се црпи и денес“.

Ова училиште, рече Папата, нè повикува „да клекнеме пред Бога и пред нашиот ближен“. Таму „бесплатноста на љубовта станува дар, за да може да тече меѓу нас и да ги скрши синџирите на секој себичен живот“.

И како што Бог е „вистинско присуство“, така и ние „сме повикани да бидеме присутни во реалностите и предизвиците на општеството“, лично посветувајќи се на градењето на општото добро.

Да пиеме од евхаристискиот извор

На крајот, Папата ги охрабри сите да се вратат кај Господ „со искрена љубов“, да бидат отворени за средба со Него и да „Му дозволат да ја задоволи жедта на нашите срца, за потоа да можеме да тргнеме по патиштата на животот и историјата, носејќи им го на луѓето овој поток свежа вода, поток на љубов, мир, правда и радост“.

Тој се молеше сите повторно „да пиеме од овој евхаристиски извор“, кој „нè испраќа да ги освежиме нашите браќа и сестри, нашите семејства, сиромашните, страдалниците и оние што ја изгубиле надежта“.

„Евхаристиската благодат нè преобразува и нè прави носители на преобразбата на историјата, знак на надеж за оние што ги среќаваме. Нека Господ Исус, присутен во Евхаристијата, ве преобрази во леб што се прекршува, се дава и се принесува, за да никне живот во полнота за вас, за вашите семејства и за вашата земја“, рече папата Лав XIV.

Прославата заврши со евхаристиска процесија и благослов предводени од папата Лав, кој ја носеше монстранцата со Пресветата Тајна по патеки украсени со шеснаесет различни цветни теписи, составени од повеќе од 30.000 цветови.