Папата во Шпанија: „Доаѓам да ја потврдам и обновам верноста кон Евангелието“

„Доаѓам меѓу вас за да ја потврдам, охрабрам и всадам обновена верност кон Евангелието меѓу верниците, како и подлабоко помирување и соработка меѓу различните елементи на оваа нација.“

Ова го истакна папата Лав XIV во сабота, 6јуни 2026 година, обраќајќи им се на властите и на дипломатскиот кор во Кралската палата во Мадрид, Шпанија, каде што престојува во рамките на еднонеделното апостолско патување.

Голема земја која речиси два милениума го прифаќа Евангелието

Во своето обраќање, Папата ѝ се заблагодари на Шпанија „за нејзиното верно почитување на меѓународното право и мултилатерализмот“, што, според него, „се одразува во активна посветеност на мирот и солидарноста меѓу народите“.

Истовремено, Светиот Отец ја охрабри нацијата „да негува дијалог и граѓанско пријателство во сопствената земја, да ги зема предвид перспективите на сиромашните и младите за иднината, да ги усогласува барањата за автономија и единство и да ја унапредува каузата за единство во Европа, не во спротивност со другите сили, туку како дар за целото човечко семејство“.

Папата изрази благодарност до Шпанија за поканата и за можноста да биде присутен на ова патување во „голема земја која речиси два милениума го прифаќа Евангелието“. Тој потсети дека традицијата отсекогаш ја поврзувала почетната евангелизација на Иберискиот Полуостров со проповедта на апостолот Јаков Постариот.

Народната побожност ги доведува луѓето во допир со Исус

Папата рече дека оваа врска има значајно теолошко значење, бидејќи ја изразува свеста на локалната Црква за нејзиниот континуитет со апостолската мисија што започнала на Педесетница.

Тој истакна и дека древната врска меѓу христијанската вера и оваа земја длабоко ја обликувала шпанската култура и претставува извор на надеж и насока пред предизвиците со кои денес мораме заедно да се соочиме како човечко семејство.

„Мислам на изразите на народната побожност, кои претставуваат автентична драматизација на спасението во секој град и населено место, во ритамот на годината и во различните животни околности. Заедно со уметничкото и музичкото наследство, како и со многуте братства и добротворни здруженија, тие сведочат за плодната средба меѓу Исус Христос и вашиот народ, страстен народ кој го сака животот и го изразува“, рече Папата.

Папата нагласи дека дошол за да ја охрабри оваа вера меѓу верниците.

Верската слобода и слободата на совеста мора да бидат заштитени

Светиот Отец истакна дека сака да ја повика нацијата на „подлабоко помирување и соработка“ меѓу различните делови на Шпанија, нагласувајќи дека историјата на земјата покажува оти „културата на средбата, а не на конфронтацијата, е она што поттикнува стабилност и просперитет“.

Во тој контекст, Папата се потсети на свети Иван од Крстот и света Тереза од Авила, чија страст за божествените Таинства ги поврзала како пријатели. Тој потсети дека овие две големи личности од Шпанија го збогатиле животот на Црквата и духовниот пат на многумина веќе пет века, и тоа далеку надвор од границите на Шпанија. Папата се осврна и на свети Игнатиј Лојола.

Размислувајќи за светците, папата Лав забележа: „Нашето време, навидум потресено од страшни нерамнотежи и конфликти, од своите длабочини вика за мир, за ново разбирање на човечката личност и нејзиното неповредливо достоинство, за цивилизација на љубовта.“

Потоа се осврна на духовната слика на света Тереза од Авила:

„Света Тереза го опишува истиот овој процес користејќи ја сликата на внатрешниот замок. Како што се движиме од соба во соба кон највнатрешната одаја, односно кон сопственото срце, светилиштето на вистината, просторот се проширува, умот се отвора, предизвиците се надминуваат, тензиите се распрснуваат, другите го наоѓаат своето место, а вселената станува дом. Ова не е бегство во себе, туку радикална отвореност кон Totus Alius et Semper Novus, која се постигнува кога се враќаме кон себе.“

„Оваа димензија на човечката личност“, рече папата Лав, „е причината поради која верската слобода и слободата на совеста мора да бидат заштитени.“

Потреба од соочување со растечката поларизација

Денес, предупреди папата Лав, искушението да се стекнува популарност преку разгорување на поларизацијата се чини дека не се намалило, туку пораснало, а човечкото достоинство продолжува да се нарушува.

„Затоа ни се потребни култура, внатрешност и бесплатно и квалитетно образование; потребна ни е трансценденција. Сепак, дури и во овие темни ноќи, мажите и жените верни на вистината се повикани да напредуваат од една одаја во друга, сè додека правдата и мирот не се прегрнат во нивната совест. Преку нивната слобода учиме да бидеме слободни“, рече Папата.

Католичката црква, истакна тој, е во служба на жедта на човечкото срце. „Тоа е служба која не е обележана со наметнување“, рече Папата, „туку со евангелско сведоштво потврдено од мноштво маченици и светци. Денес Црквата е подготвена да се стави во служба на иднината на еден народ кој бара помирување и мир.“

Од љубов кон вистината, рече папата Лав, ги повикува сите „да ги остават настрана раздорните и поларизирачки наративи за вашата општествена реалност и историја, за да ги надминат стерилните поедноставувања преку плодно вреднување на сложеноста“. Во тоа, додаде тој, гледа повик што е особено соодветен за Европа, „во која Шпанија има единствена и суштинска улога“.

Потребен е квалитативен чекор напред

Папата ја повика нацијата да ја цени и проучува сложеноста, учејќи не да ја негира, туку да ја прифаќа како благослов.

Тој забележа дека новите технологии „создадоа вештачка средина во која нашите основни избори се ставаат на испит, предрасудите се зголемуваат, критичкото размислување ослабува, а доминантните интереси шират желби за смрт“. Сепак, додаде тој, „доброто може да преовлада и да се шири“.

„Од суштинско значење е, особено од страна на оние што имаат економски, политички и институционални одговорности“, нагласи Папата, „да се направи квалитативен чекор напред, промена во насоката на инвестирање во училиштата, универзитетите и истражувањето, како и во локалните заедници и граѓанското општество, како плодна почва за учество и културно посредување.“

Папата се осврна и на потребата Шпанија да придонесува за мирот и хармонијата.

„Безбедноста, која премногу често очекуваме да ја најдеме во оружјето и ѕидовите“, рече папата Лав, „всушност најдобро се постигнува кога учиме да одиме напред едни покрај други, растејќи заедно, рамо до рамо.“

Благодарност за посветеноста на мирот, мултилатерализмот и меѓународното право

„Вашата сопствена историја сведочи за тоа“, рече Папата.

Светиот Отец призна дека присуството на исламот на Иберискиот Полуостров претставува „долготрајна политичка, културна и религиозна реалност“, па ја охрабри земјата да продолжи да оди напред во мирен соживот и меѓурелигиски дијалог.

На крајот, Светиот Отец ѝ се заблагодари на Шпанија за нејзината посветеност на мирот, мултилатерализмот и меѓународното право и ја охрабри нацијата да промовира мир и хармонија и во својата земја и надвор од неа.

„Бог да ја благослови Шпанија!“, рече папата Лав.