Папата во Ангола: Исус е со нас кога простуваме и кога се молиме заедно

Папата Лав XIV во понеделникот наутро, 20 април 2026 година, отпатува во североисточниот град Сауримо, со што го започна третиот ден од неговото апостолско патување во Ангола.

По пристигнувањето, Светиот Отец се упати кон дом за стари лица што го води државата.

Домот, кој жителите го нарекуваат „Лар“, што значи „дом“, згрижува 62 стари лица, од кои 26 се мажи, а 36 жени.

Обраќајќи им се на штитениците, папата Лав ја изрази својата радост поради нивното „добредојде исполнето со вера“ и ја искажа својата надеж дека тие навистина живеат во семејна атмосфера, достојна за името што го носи овој дом.

Тој потсети дека Исус сакал да ги посетува домовите на своите пријатели, поминувајќи време со тештата на Петар, како и често посетувајќи го домот на Марија, Марта и Лазар.

И во овој дом, рече Папата, Исус живее меѓу старите лица, особено кога тие си простуваат еден на друг и бараат помирување по некоја мала навреда.

„Тој престојува меѓу вас секогаш кога се обидувате да се љубите и да си помагате еден на друг како браќа и сестри“, рече тој. „Кога сите вие, или барем некои од вас, се молите заедно со едноставност и со понизност, Тој е тука меѓу вас.“

Папата Лав XIV им се заблагодари на анголските власти за поддршката што ја даваат на иницијативи како домот „Лар“.

„Грижата за најслабите е многу важен знак за квалитетот на општествениот живот на една нација“, рече тој. „Да не заборавиме дека на старите лица не им е потребна само помош, туку пред сè треба да бидат сослушани, затоа што тие ја чуваат мудроста на еден народ.“

Папата го заврши своето кратко обраќање со молитва за старите лица и доверувајќи ги на заштитата на Пресвета Богородица.

Блиската поврзаност на Црквата со домот во Сауримо

Според Георгина Мвандумба, директорка на домот, локалната Католичка црква одржува одлична врска со штитениците, обезбедувајќи им духовна помош и финансиска поддршка за функционирањето на установата.

Во разговор за Vatican News со Дулсе Араужо, таа посочи дека многу од жителите одгледуваат мали градини, како начин за одмор и за обезбедување храна за себе.

Тие често заедно присуствуваат на света Литургија во домот, иако не сите се католици.

На прашањето која е нејзината најголема желба за старите лица во Ангола, Мвандумба одговори дека се надева оти ќе се надмине „апсурдната практика на вештерство“, за семејствата да престанат да ги напуштаат своите стари родители поради суеверни верувања.