Папата апелира до Трамп и до светските лидери: Пронајдете решенија за ставање крај на војната

„Ми пренесоа дека претседателот Трамп неодамна изјавил дека би сакал да ја заврши војната. Се надевам дека навистина бара ‘излез’. Се надевам дека бара начин да се намали насилството, бомбардирањето, што би претставувало значаен придонес за отстранување на омразата што се создава и постојано се зголемува на Блискиот Исток и на други места.“

Само неколку дена пред Велигден папата Лав XIV повторно го упати својот повик за мир во свет ранет од судири и насилство.

Во своето обраќање пред новинарите вечерта, на 31 март 2026 година, во Кастел Гандолфо, папата Лав им се обрати на сите светски лидери, повикувајќи ги: „Вратете се на масата, на дијалогот. Да бараме решенија за проблемите, да бараме начини да се намали насилството што го поттикнуваме, за мирот, особено на Велигден, да може да завладее во нашите срца.“

Велигденско примирје

Велигден, потсети Папата, „треба да биде најсветото, најсветото време во годината. Тоа е време на мир, време за длабоко размислување, а сепак, како што сите знаеме, и повторно во светот, на толку многу места, гледаме толкаво страдање, толку многу смрт, дури и на невини деца.“

„Постојано упатуваме повици за мир, а сепак, за жал, многумина сакаат да поттикнуваат омраза, насилство, војна“, нагласи папата Лав. Затоа ги повика сите, „особено христијаните“, овие денови да ги живеат со свесност дека „Христос и денес е распнат, дека Христос и денес страда во невините, особено во оние што страдаат од насилство, омраза и војна.“

„Да се молиме за нив, за жртвите на војната, да се молиме навистина да има нов, обновен мир, кој може да им донесе нов живот на сите“, повика папата Лав. Одговарајќи на прашања од новинарите, тој ја изрази и својата надеж дека за Велигден би можело да се почитува примирје.

Крстниот пат на Велики Петок

Папата беше прашан и за својата одлука лично да го носи Крстот за време на традиционалниот Крстен пат во Колосеумот во петок.

„Мислам“, одговори Лав XIV, „дека тоа ќе биде важен знак поради она што Папата го претставува: духовен водач во денешниот свет, глас што кажува дека Христос и понатаму страда. И јас ги носам во своите молитви сите тие страдања.“

Тој го обнови својот повик до „сите луѓе со добра волја, до луѓето на верата, да одиме заедно, да одиме со Христос, Кој страдаше за нас за да ни донесе спасение, и самите да настојуваме да бидеме носители на мирот.“

Претстојната посета на Шпанија

Пред да го поздрави големиот број присутни, меѓу кои и градоначалникот на Албано, Папата беше прашан што очекува од својата претстојна посета на Шпанија во јуни.

„Вера, многу љубов, гостопримство и топол пречек“, одговори тој.

„Ја посетувам Шпанија повеќе од 40 години и секогаш сум наоѓал народ со голема вера и добра волја“, додаде Папата, изразувајќи надеж дека „сето тоа ќе можеме да го прославиме и за време на оваа посета.“