Ангел Господов: Уметноста е универзален јазик кој го замолчува секој воен крик
Молитва за земјите во војна, жалење што не можеше да служи света Литургија по повод јубилејот на уметниците, благодарност до здравствените работници од поликлиниката Гемели во Рим, каде што е хоспитализиран поради респираторна инфекција – стои во неделното попладневно обраќање на папата Фрањо и објавено од Канцеларијата за печат на Светиот Престол. По повод јубилејот на уметниците, Папата потсети дека самата уметност има во себе моќ да придонесе за ширење на мирот, а потоа изрази жалење што не можел лично да го доживее славењето на Евхаристијата посветена за уметниците кои дојдоа од различни делови на светот да ги прослават јубилејните денови.
Благодарам на Дикастеријата за култура и образование што го подготви овој настан, кој не потсетува на важноста на уметноста како универзален јазик кој шири убавина и ги обединува народите, придонесувајќи за создавање хармонија во светот и замолчување на секој воен крик. Сакам да ги поздравам сите уметници кои учествуваа: Сакав да бидам меѓу вас, но, како што знаете, сум во поликлиниката „Гемели“ затоа што уште имам потреба за лекување од бронхитисот.
Благодарност до персоналот на поликлиниката Гемели
Папата потоа се заблагодарува за изразите на близина кои стигнаа до него во овие денови на хоспитализација, со посебни мисли за целиот здравствен персонал во поликлиниката „Гемели“ каде е хоспитализиран.
Ви благодарам за љубовта, молитвите и близината со која ме придружувате овие денови, но исто така сакам да им се заблагодарам на лекарите и здравствените работници од оваа болница за грижата: тие вршат скапоцена и многу тешка работа, да ги поддржиме со молитва!
Мисли посветени на земјите во војна
На крајот, пред да ги поттикне верниците да и се доверат на Марија за таа да им помогне, како неа, да бидат пејачи и создатели на убавината што го спасува светот, папата Фрањо уште еднаш поттикна на молитвата за земјите во војна. Ги поттикнувам сите да продолжат да се молат за мир во напатената Украина, во Палестина, во Израел и на целиот Блиски Исток, во Мјанмар, во Киву и во Судан.
