Ангел Господов: Адвентот е драгоцена можност да се олесни срцето

Папата Фрањо, во својот говор пред молитвата „Ангел Господов“, се осврна на неделното литургиско евангелие кое зборува за космички потреси, страв и неизвесност што го исполнуваат човештвото. Во тој контекст, Исус упатува зборови на надеж кон своите ученици: „Исправете се и подигнете ги главите свои, зашто се приближува вашето спасение“ (Лука 21,28).

Папата потсети дека многумина од Исусовите современици, гледајќи катастрофални настани околу себе – прогони, конфликти, природни непогоди – мислеле дека доаѓа крајот на светот. Нивните срца биле оптоварени со страв. Но, Исус сака да ги ослободи од таа тешкотија и лажни верувања, учејќи ги да бидат будни во срцето и да ги читаат настаните од перспектива на Божјиот план, кој носи спасение дури и во најдраматичните моменти од историјата.

Споменувајќи ја Исусовата препорака, која е важна и за нас, дека срцата не треба да ни бидат обременети, Папата се запраша како можеме да имаме „лесно“ срце, будно и слободно, односно такво кое не дозволува да биде скршено од тага?

Може да се случи, всушност, грижите, стравовите и грижите за нашиот личен живот или за тоа што денес се случува во светот, да паднат врз нас како големи камења и да нѐ турнат во очај. Ако грижите ни го обременуваат срцето и нѐ наведуваат да се затвориме во себе, Исус, напротив, нѐ повикува да ги подигнеме главите, да се потпреме на Неговата љубов која сака да нѐ спаси и преку која Тој ни се доближува во секоја ситуација од нашиот живот, за да му направиме место и повторно да ја пронајдеме надежта.

Прашувајќи се на крајот дали и ние имаме срца стегнати од страв, вознемиреност или загриженост за иднината, или пак знаеме да гледаме на секојдневните настани и на настаните во историјата со Божји очи, Светиот Отец ги поттикна присутните верници да го искористат времето на Адвент како драгоцена можност за подигање на погледот кон Господ, Кој ги зајакнува нашите срца и нѐ поддржува во животот.