Vatican

Zúbile ya ba Papá mibalé esuki

O eleko eye Léon XIV alingi, mokolo ya mibalé 6 ya sánzá ya yambo, na eyenga ya Bomimonisi, kokanga ekuke esántu ya basilique Sántu-Petelo pe ya kosukisa bôngó Zúbile 2025, nini tokoki koloba po ya Mobú Esántu eye? Ba milio ya bato ya mobémbo mwa boyambi bayaki, Papá moko akitani na mosusu, mokili eninganaki, kasi Elikya engengaki pe eyokani na ba sánzá zómi na mibalé biye.

Jean-René Bompolonga - Kinshasa

Po ya mbala ya ibalé na lisapo, Papá moko akokanga Ekuke Esántu ya basilique Sántu-Petelo efungwamaka na Papá mosusu. Likambo lyoko eye epanzaki makási motángo ya boyei ya bato na Roma koleka motángo ekanamaki. Ba Papá mibalé, kasi singa ya bomemi kaka yoko, eye ya Elikya, Elikya eye ekopesa motéma pási te, libongi lyoko ya malongá na eleko eye ya tembe, ya bobéndani na politiki káti na bikóló pe ya mobulu na nkita. Mbela ya boboto eyokani na makasi tángo insó ya Zúbile.

Boloko ya Rebibbia, basilique ya pási

Ezali na boloko boko ya Roma ndé Papá François afúngolaka ekuke esántu ya zúbile ya mibalé, simá ya Mbótama. Butu mibalé libosó, atelemaka na kiti etambolaka ya ye po ya kobete na ezibeli ya basilique Sántu-Petelo. Likambo lyoko ya pási po ya Papá moko asili alembaki. Pe na loléngé ya kokámwa, ezali na boloko ndé ebonzamaki molulu enéne ya Mobú Esántu eye: misa ekambamaki na Léon XIV, na 14 ya sánzá ya zómi na mibalé, po ya zúbile ya bakangemi.

Na milongo ya ntina to na mibembo bwa losámbo ya ba dioceze, bisálemi po ya mosála moko to likambo-likonzi lyoko, na etuluku to moto ye moko, koleka milio misáto ya bandimi batambolaki simá ya Kuruse, nzela molayi etiamaki, po na eleko wana, na balabala Conciliazione eye ememaka na basilique Sántu-Petelo. Ata molunge ya Roma, ata mikolo ya malili, ya mbula to ya mopepe, balandaki nzela ebátelama, na miso ya bato na mobémbo ya loi, ya baí-Roma pe ya bapanzi nsango baútaki mokili mobimba. Babola pe bakambi, bato ya ntoki pe ya lopitalo, ya biyamba pe mabota, bakatekisi, basáli, bakambi ya misála...bansó na botamboli boko ya losámbo pe ya boyambi.

Bilenge na molongo ya yambo

Ba misa, ba bokutani, bisika ya bokanisi, ba konsele, ba bolakisi bitambuisi zúbile eye ya mbala ya 25. Káti ya bileko ya kokanisa, bokomisi basántu bilenge mibalé ya Italie: Carlo Acutis, influenceur ya Nzámbe, mosántu akufaki na leucémie, na mobú ya 15, pe Pier Giorgio Frassati, alpiniste ya Nzámbe, oyo azalaka o ebándeli ya mibú 1900 pe awaki na mibú 24. O eleko eye ya kwokoso ya ba vocation pe ya bosáleli eyamba ekotuna Eklezia, Zúbile ya bolengé -eye ebendaki milio moko na ndambo ya bilenge ya mokili mobimba- ezalaki elonga yoko ezelamaki te.’ Soki Mobú Esántu ezali yambo mpenza molulu moko ya milimo, lomeko ya bonkoko pe ya ntoki ezalaki waná.

Elonga ata nionso

Kasi liwa ya Papá pe liponami ya mokitani na ye bilosaki lisusu, na ndéngé mosusu, Zúbile na botáli bozali pe lokola bokébi ya ba média. Papá, oyo aponamaki, alingaki kotika mikáno bizuamaki bileka, na bopusi mosika makambo misusu ya ntina po ya bomoi ya Eklezia. Pe bandimi bayaki, ebelé na molongo ya ba sánzá. Engebene na motángo ya bakambi, koleka milio 30 ya bato ya mobémbo mwa boyambi pe bato ya loí basalaki mobémbo ya Roma na 2025. Káti na bango, ata bitumba, bandimi baútaki Ukraine, Syrie, Palestine, Nigeria, Sudan ya Sudi.

Epái ya Mobú Esántu ya Bosikoli

Soki tángo ezali ya ba bilan, mituya bikoloba nionso te. Na 31 ya sánzá ya zómi na mibalé, yambo ya Te Deum ya súka ya mobu, Léon XIV alingaki kozongela ntina ya mozindo ya Mobú Esántu: "elembo moko monene ya mokili ya sika, ebongisami lisusu pe eyokani na ndéngé ya mwángo ya Nzámbe". O eleko akomibongama ya kokamba Consistoire na ye ya yambo pe kokutana na mikannda ya lombango po ya bomoi ya Eklezia, Léon XIV asili amonaki bakristu na zúbile moko: Mobú Esántu ya Bosikoli na 2033, na botáli bozongi boko na Yérusalem pe na elikya 'te molulu ena emema na bomoko mobimba.

Matondo mingi na ndéngé otángi lisoló liye.