Longónya ya Vatican na Primat ya sika ya Eklezia y'anglican

Vatican News

Mokónzi Charles III, mokambi ya monéne ya Eklezia y'Angleterre, andimaki liponami ya Sarah Mullally na esika ya episkopo ya 106 ya Canterbury. Kinó waná episkopo ya Londres, akozala mwási ya yambo ya kozala na esika ena. Bovandisi ye na cathédrale ya Canterbury ebongisami na sánzá ya misáto ya 2026.

Na mokánda mókó etindami na episkopo Mullally, episkopo ya lokúmu Kurt Koch, préfet ya dicastere po ya Botómboli bomoko ya bakristu, atindelaki ye longónya pe alaki lisalisi ya Eklezia katoliko na mosála na ye ya sika. "Na boyóki liponami na yo, nakomeli yo po ya kopesa yo longónya pe po ya koloba pósá ya malamu koleka ya Eklezia katoliko o eleko okobongama ya kokamáta mosála na yo o káti ya Eklezia na binó. Nakosambela po 'te Mokónzi atóndisa yo na makabo maye osengeli na yangó po ya mosála na yo zambi ya kosála esika obengami. Apesa yo makoki ya kozala esalelo mókó ya lisangá pe ya bomoko po ya bandimi baye okosálela", ekomi ye na mokánda na ye.

Episkopo ya lokúmu Koch alobaki bokasi pe boúmeli ya lisoló lya mambi mwa eklezia káti ya Lisangá y'Anglican pe Eklezia katoliko, etóngami na boyébi pe boyókani úto pembeni ya mibú 60. Alobi lisusu boyókani káti ya ba Eklezia mibále, eye emonanaki o eleko ya mosála ya François. "Nakolikia ya sóló 'te bozali pembeni ena ekokoba na mibú mikoya, o eleko tokokoba kotambola elongo. Ndima nsámbo na ngai po ya yo pe libótá na yo", ekomaki ye.

Liponami na ye ezuaki pe longónya ya mokónzi ya lisangá ya ba episkopo katoliko y'Angleterre pe ya Pays de Galles, episkopo ya lokúmu Vincent Nichols. "Akomema makoki ya ye moko pe boyébi monene ya mosála na ye ya sika", elobi episkopo ya Westminster, na boláki ye na communiqué mókó na nsámbo ya lisangá ya ba katoliko.

Episkopo Mullally

Episkopo Sarah Mullally akitani na episkopo Justin Welby, eye atikaki eleki pembeni na mobú mókó simá ya bobimisi mokánda mókó (rapport) elobaki mosála mabé na ye ya makambo ya bokútáni ya nzóto. Azali na esika ya episkopo ya Londres úto 2018, na bokómi bôngó mwási ya yambo ya kozua mosála ena.

Commissio ya maponami ya Bokónzi ya Canterbury aponaki episkopo Mullally simá ya boyóki bato pe bososoli na losámbo eye ebándaki na sánzá ya mibále ya 2025. Commisio ezalaki na batindami ya Eklezia y'Angleterre, ya Lisanga ya anglican pe dioceze ya Canterbury.

Simá ya boponami, episkopo Mullally alobaki 'te akolikia kolendisa Eklezia "kokoba kokóla na botiyi motéma na Nsango Ndamu, ya koloba bolingo eye tokozua na Yézu-Kristu pe ya kotika bolingo ena ebongisa misála na bisó". Asepeli kokabola "nzelá ena ya boyambi na ba milio ya bato bakosalisa Nzámbe pe masangá na bangó na ba paloise ya ekolo mobimba pe na nzelá ya Lisangá y'Anglican ya mokili mobimba"..

Matondi mingi na ndéngé otángi lisoló oyo