Frassati azalaka nzeneneke mókó ya bomoi ya mokristo na mokili mókó ya makambo ebelé

Jean-René Bompolonga – Kinshasa

Yoane Polo II pe François bangó bansó mibále bakamwisamaka na Pier Giorgio Frassati. Mobú mókó yambo ya kokomisa ye mwá esengo, na 1989, papá Wojtyla andimaka ‘te abetamaki na litatoli na ye ya mokristo; papá Bergoglio ayókaka bakoloba kómbó na ye na tátá na ye, oyo azalaka elama ya Action catholique, pe akamwisamaka na esengo na ye ya mokristo. Pier Giorgio Frassati pe Carlo Acutis bazali baye Léon XIV akokómisa ba sántu ya libosó. Atángaki bangó o eleko ya Zubilé ya bilenge na Tor Vergata lokóla ba ndakisa ya bilenge bakoki kosála makambo ya minene. Frassati akokóma sántu po na bondimi ya likamwisi mókó: libiki ya kokamwisa ya tendon y’Achille ebukanaki ya Juan Manuel Gutierez, mwána ya Mexique, leló sángó na diocèze ya Los Angeles, eye azalaka na 2017 elenge molikindo.  

Bomoi mókó esálemi na bomipesi

Elengé mókó oyo azali kosámbela po ya elenge mosusu pe azui libiki elobi mingi na likambo ya bosántu ya Pier Giorgio. Ya sóló, bilenge bazali kozua ye lokóla “boláti nzóto mókó ya sóló pe ekobika na ndakisa ya mokristo oyo akobika na bomipesi”. Waná ezali ndéngé momemi ya likambo ya bokómisi ye sántu, Silvia Correale, akolakisa elongi ya sántu ya sika. Bokútáni na ye ekobongola, “koleka liloba nionso”, pe ekopesa bosóló ‘te “kobika lokóla bilenge bakristu na mokili mókó ya makambo ebelé ekoki kosálema”. Makambo ebelé biye, epayi ya Giorgio, ekobóngwana na bomipesi na bato pe politiki. “Ebongaki te po na ye, elimboli Silvia Correale, ya kofúngola miso na babóla na bozangi kosála kéba o eleko ena na makambo ya bato pe ya lisapo, na lisolo ya makanisi pe na bobongisi ya politiki bikoleka na ekóló pe na mokili”.

Lisangá ya mwinda

« Boyambi, ekokoba kokóla na losámbo, bomoi ya sakramento, boyokani na liloba ya Nzámbe, ezalaki po na ye, elobaki Correale, lisangá mókó ya ngúyá ya mwinda ya kokamba eye ezingaki ye po ya koyéba eye tokobénga leló bilembo ya tángo (signes de temps), elingi koloba bososoli ya laïki na mosála ». Ezali waná motele ya bokasi ya Frassati pe yangó ekokómisa liloba na ye ya eleko na bisó po, na kobika na mokili, « mokristo akozua esika na ye, kaka na libóta, na mosála, na baningá na ye te, kasi lokóla na momeseno pe lisapo ya eleko na ye ». Ezali bôngó penza « bolaïki, bososoli ya mokristo, evandi na nzela mókó ya bonzámbe, eye ekoki tángo mosusu kozala mókó ya makonzi ya litéya mókó ya bilenge ya makási leló pe emóna na Frassati motatoli mókó elongobami ». Kozala na mokili elingi koloba te koluka bisika ya bokónzi, « Pier Giorgio atikala kozala mokambi to mokónzi ya eloko mókó te « yangó elingi koloba, ekobaki Correale, kozala n’angele, na bokébi, na bozali na ndéngé mókó ezali kosangisa bokasi pe bonkútú eye ekoki kozala liziba mókó ya bopesi likanisi mókó pe mosála mókó ya politiki na eleko mókó ya mobúlú lokóla eye tozali komóna sikóyo »

Bompikiliki na Kristu

Ngómbá ezalaki bolingo ya monene ya Frassati. Azuaka kúna bolembi po ya kokóma na sóngé, kasi azuaka na nzelá ena litéya mókó monene: esengeli kosála makási koleka po ya komáta na sóngé eleki likoló, kasi ezali yangó eye ezali pembeni ya Nzámbe. “Azali elenge mobáli mókó oyo, na boleki mikakatano ya mike pe ya minene ya bomoi na ye, atikali na loboko na ye-mei pe akomema yangó na likambo mókó mókó ya bomoi, bolukiluki ya bompikiliki na Yézu-Kristu. Ezalaki na pási, kasi botatabani te, komekama ezalaki, kasi abwákaka mabóko te, atikala kotika te ndámbo mókó ya ye mókó. Pe waná nionso na kolekisa mbeka eloko mókó te lokóla bolenge na ye, kasi na kobika malamu bomoi na ye”.

Bondeko ya mokili

Waná ezali liloba ya Pier Giorgio Frassati; botiyi motéma na Elimo pe likoki ya kosála makambo ya malamu, mokili ekobóngwana bôngó pe tokoki komóna Bokónzi ya Nzámbe. « Frassati, esúkisaki Silvia Correale, azalaki káti na ye motindo mókó ya mokristo ya bondeko ya mokili, abándaki koyóka lokóla ya ye nionso ezalaki koleka mosika, na bikóló misusu. Ba ndelo ya bikolo bizalaki epekiseli mókó te po ya bonzámbe na ye ».

« Na mobúlú, ekomaki Frassati na mikandá na ye ya bokaboli, tokolóna likúnya pe tokozua ba mbuma mabé ya milona ena ; na bokaboli, tokolóna kimia na bato, kasi kimia na mokili te, Kimia ya Sóló eye kaka boyambi na Yézu-Kristo ekoki kopesa na bisó na bozali na bondeko bipayi na bipayi ».

Matondi mingi na ndéngé otángi lisoló oyo.