Likita lya bansó: koyamba bomoto mobimba ya Yézu po na koyéba Tata
Jean-René Bompolonga - Kinshasa
O eleko ya litéya eye ya mibále etáli Mobéko-likonzi ya bosóló ya Dei Verbum, Sántu-Papá akundolaki losámbo esika wápi Yézu asepeli na nsái: « Yézu agangi na esengo enéne: "Natondi yó botondi, Tatá, Mokónzi wa likoló na nsé, zambi oboyi koyébisa makambo mana na bato ba bwányá mpe ba mayéle, mpe oyébisi mango na bato bake. Ya sóló Tatá, yo moko olingaki bôngó. Nionso epesameli ngai na Tatá na ngai. Moto moko te ayébi Mwána, bobélé Tatá ayébi ye; mpe moto oyo Mwána alingi koyébisa ye" ». (Lk 10, 21-22)
Bosakoli ya Nzámbe ekomi moto: Yézu-Kristu
Bosakoli eye Nzámbe asálaki ya ye moko na bato na ye na nzelá ya maloba mpe bikela na bikeke ezuaki bokokisami na yangó na bolakisi ya Liloba, tángo Nzámbe amikomisi moto. Na yangó, bosóló ya káti koleka etáli Nzámbe pe libiki ya bato ekongenga na Kristu, oyo azali ye moko montéi pe mokokisi ya bolakisi (cf. Dei Verbum, 2).
Papá abetaki nsete na "boyébi ya moyébani", eye ekoyébisa kaka makanisi te, ekokabola lisapo lyoko pe ekobenga na bosangisi na epái na epái. Na Kristu, Nzámbe amiyébisaki na bisó mpe alakisaki na bisó na ngonga ena bozali na bisó ya bána, "bakelama na elili ya Liloba". "Liloba lina ya libela ekongengisa bato bansó" (DV, 4) na bolakisi bangó bosóló na bangó na bomoni ya Tatá. "Tatá na yo, oyo akomona na bonkutu, akofúta yo" (Mt 6, 4.6.8), elobi Yézu; mpe abakisi 'te "Tatá ayébi ba pósá na bisó" (cf. Mt 6, 32).
Boyébisi ya bosóló ya Nzámbe ekosálema na nzóto ya Kristu
Mwána, na bobongwani na ye, bomoi na ye, liwa na ye mpe nsékwa na ye, akosalisa bisó kaka ya komona Tatá na ye te, kasi akobianga bisó lokóla ya kokota kutu na mokangano (relation) na Tatá, na libongi ya ekela ya Elimo.
"Tosengeli te kokwa Yézu lokóla nzelá yoko ya bolekisi bosóló ya mayéle, yangó ekopesa lokúmu na bonéne ya bobongoli te". "Soki Yézu azali na nzóto ya sóló, boyébisi ya bosóló ya Nzámbe ekosálema na nzóto ena, na ndéngé ya ye moko ya komona pe ya koyoka bozali ya sóló, na ndéngé na ye ya kovanda na mokili mpe ya koleka yangó", ebakisaki ye.
Yézu akolakisa bisó Nzámbe Tatá lisúngi
Yézu ye méi abiangi bisó ya kokabola botáli na ye na bozali ya sóló mpe ya kofúngola bisó bôngó mpe na lisúngi ya Nzámbe, Tatá wa bisó. Po, elobaki ye, tozali na motúya koleka makási bandeke baye balonaka te babúkaka te mpe Nzámbe akoléisa.
Na bondimi mbela ena, na bolandi Yézu kinó na súka tokokoma bána babáli mpe bána bási na Mwána mpe na bozali na ndéngé ya bonzámbe. "Soki Nzámbe azali po ya bisó, ekomi sántu Polo, nani akobundisa bisó? Abikisaka Mwána na ye moko te, [...] boni boni akokoka, na ye, kopesa bisó nionso te?" (Rm 8, 31-32). Likoló na Yézu, mokristu ayébi Nzámbe Tatá mpe akomitika na ye na botiyi motéma, esúkisaki Sántu-Papá.
Matondo mingi na ndéngé otángi lisoló liye.
