Léon XIV: Masano mya olympia ya eleko ya malili masengeli kolendisa bizaleli malamu ya masano

Bansango ya Vatikan

Tika ‘te masano “Jeux Olympiques d’hiver” ya Milan-Cortina ezala libaku malamu ya kotombola bizaleli ya solosol ya masano: bosembo, limemya, elimo ya lisanga mpe ya komipesa, mpe bosangani bya bato mpe esengo ya bokutani. Wana ezali mposa oyo Léon XIV amonisaki na telegrame na ye epai ya Kardinal Oscar Cantoni, episkopo ya Côme, na maloba oyo: “Bobondisi ya motema mpe makanisi malamu epai na bato ya Vicariat ya Bormio”, oyo bazalaki na mokumba ya kobongisa mpe kotambwisa Masano ya Olympe.

Nsango yango, oyo ekomami na mokomeli ya Vatikan Kardinal Pietro Parolin, etángamaki na misa oyo episkopo ya dioseze ya Lombardi atambwisaki mokolo ya mitano, 30 ya sanza Yanuali, na parwase ya Bormio, mpo na kopesa na Nzambe masano ya 25 ya ntango ya malili na engumba Milan mpe Cortina d’Ampezzo, oyo ekosalema kobanda mokolo mwa 6 tee 22 ya sanza ya Febuali 2026. Bilenge ya masano ya lisanga ya masano ya etuka wana, elongo na bakonzi ba bango, balakisi mpe bato basusu, mpe bato banso oyo bazalaki na mokumba ya kobongisa mpe koyamba molulu mwango, basanganaki na milulu na Eklezya ya basantu Gervasio mpe Protasio.

Ba Parwasi, elembo ya bozali bwa Kristu

Nganga-Nzambe Monene, oyo amonisi “botondi bwa ye mpo na lisungi ya molende na momekano ya masano maye”, alendisi lisusu “bato ya parwasi ya etuka wana ‘te bàzala na esengo ya kokutana na momekano oyo ya ntina mingi”, mpo na kopesa litatoli ya boboto ya Kristu, na bongo kokóma elembo ya mwinda ya kozala ya Kristu oyo azali kobyanga bato banso na bondeko. Na nsuka ya telegrame, Pápa alaki losambo la ye mpe bobenisi bwa ye ya ntoma, “azwi mapamboli mingi ya likoló”. Masano ma Olympe ya Milan-Cortina ekosalema na Dioseze ya Côme, mpe na bamboka ya pembeni, Livigno mpe Bormio.

Kuruze ya masano ya Olympia

Matondi mingi na ndéngé otángi lisolo oyo. Soki olingi kozwa basàngo tango inso, mikomisa na mokanda na biso ya basàngo na kofina esika eye.