ಸುಡಾನ್: ದರ್ಫೂರ್ನಲ್ಲಿ ಆಸ್ಪತ್ರೆ ಮೇಲೆ ಭೀಕರ ಹತ್ಯಾಕಾಂಡ
ವ್ಯಾಟಿಕನ್ ವರದಿ
ಜಾಗತಿಕ ಗಮನದಿಂದ ದೂರವಾಗಿಯೇ ಉಳಿದಿರುವ ಸುಡಾನಿನ ಯುದ್ಧವು ಕಳೆದ ಮೂರು ವರ್ಷಗಳಿಂದ ದೇಶವನ್ನು ಚೂರಾಗಿಸುತ್ತಲೇ ಇದೆ. ಹಿಂಸಾಚಾರ ಹೆಚ್ಚುತ್ತಾ, ಸಾಮಾನ್ಯ ಜನರ ನೋವು ಇನ್ನಷ್ಟು ಗಂಭೀರವಾಗುತ್ತಿದೆ.ಪಶ್ಚಿಮ ಸುಡಾನಿನ ಪೂರ್ವ ದರ್ಫೂರ್ ರಾಜ್ಯದ ರಾಜಧಾನಿಯಾದ ಎಲ್-ಡಾಇನ್ನ ವಿಶ್ವವಿದ್ಯಾಲಯ ಆಸ್ಪತ್ರೆ ಮೇಲೆ ನಡೆದ ದಾಳಿಯಲ್ಲಿ ಕನಿಷ್ಠ 64 ಜನರು ಮೃತಪಟ್ಟಿದ್ದು, ಇವರಲ್ಲಿ 13 ಮಕ್ಕಳು ಸೇರಿದ್ದಾರೆ.
ಈ ಘಟನೆ ಬಗ್ಗೆ ಮಾಹಿತಿ ನೀಡಿದ ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ಈಗಾಗಲೇ ನಾಶಗೊಂಡಿರುವ ಈ ಪ್ರದೇಶದಲ್ಲಿ ನಡೆದ ಘಟನೆಯ ಬಗ್ಗೆ ಮಾನವೀಯ ಸಂಸ್ಥೆಗಳು “ತೀವ್ರ ಬೆಚ್ಚಿಬಿದ್ದಿವೆ” ಎಂದು ತಿಳಿಸಿವೆ.ಸುಮಾರು 90 ಮಂದಿ ಗಾಯಗೊಂಡಿದ್ದು, ಅನೇಕರ ಸ್ಥಿತಿ ಗಂಭೀರವಾಗಿದೆ. ಇದರಿಂದ ಈಗಾಗಲೇ ದುರ್ಬಲವಾಗಿರುವ ಆರೋಗ್ಯ ವ್ಯವಸ್ಥೆಯ ಮೇಲೆ ಮತ್ತಷ್ಟು ಒತ್ತಡ ಬಂದಿದೆ.
ಯುದ್ಧದ ಕ್ರೂರತೆ
ಸುಡಾನಿನ ಮಾನವ ಹಕ್ಕುಗಳ ಸಂಘಟನೆಯಾದ ಎಮರ್ಜೆನ್ಸಿ ಲಾಯರ್ಸ್ ಪ್ರಕಾರ, ಈ ದಾಳಿ ಸುಡಾನಿನ ಸೇನೆಯಿಂದ ನಡೆಸಲಾದ ಡ್ರೋನ್ ದಾಳಿಯಾಗಿರಬಹುದು ಎಂದು ಆರೋಪಿಸಲಾಗಿದೆ. ಆದರೆ ಸೇನೆ ಇದನ್ನು ನಿರಾಕರಿಸಿದೆ.
2023ರ ಏಪ್ರಿಲ್ನಿಂದ, ಸುಡಾನ್ ದೇಶವು ರಾಷ್ಟ್ರೀಯ ಸೇನೆ ಮತ್ತು ಸರ್ಕಾರಕ್ಕೆ ವಿರುದ್ಧವಾಗಿ ನಿಂತಿರುವ ಕ್ಷಿಪ್ರ ಬೆಂಬಲ ಪಡೆ (ರಾಪಿಡ್ ಸಪೋರ್ಟ್ ಫೋರ್ಸಸ್-RSF) ಎಂಬ ಶಸ್ತ್ರಸಜ್ಜಿತ ಪಡೆಗಳ ನಡುವಿನ ಗೃಹಯುದ್ಧದಲ್ಲಿ ಸಿಲುಕಿಕೊಂಡಿದೆ.
ಈ ಸಂಘರ್ಷದಲ್ಲಿ ಕನಿಷ್ಠ 1.5 ಲಕ್ಷ ಜನರು ಮೃತಪಟ್ಟಿದ್ದು, 1.2 ಕೋಟಿ ಜನರು ತಮ್ಮ ಮನೆಗಳಿಂದ ಹೊರಹಾಕಲ್ಪಟ್ಟಿದ್ದಾರೆ. ಇದು ಈ ಶತಮಾನದ ಅತ್ಯಂತ ಭೀಕರ ಮಾನವೀಯ ಸಂಕಷ್ಟಗಳಲ್ಲಿ ಒಂದಾಗಿದೆ. ಈ ಯುದ್ಧದಲ್ಲಿ ಸಾಮಾನ್ಯ ನಾಗರಿಕರೇ ಹೆಚ್ಚಾಗಿ ಬಲಿಯಾಗುತ್ತಿದ್ದಾರೆ. ಆಸ್ಪತ್ರೆಗಳು, ವಾಸಸ್ಥಳಗಳು ಮುಂತಾದ ಸೇನೆಯಲ್ಲದ ಸ್ಥಳಗಳೇ ಈಗ ದಾಳಿಗಳ ಗುರಿಯಾಗುತ್ತಿವೆ.
ಚೂರುಚೂರುಗೊಂಡ ದೇಶ
ಈ ಯುದ್ಧವು ದೇಶವನ್ನೇ ವಿಭಜಿಸಿದೆ. ಪಶ್ಚಿಮ ಭಾಗದ ಬಹುತೇಕ ಪ್ರದೇಶಗಳು—ದರ್ಫೂರ್ ಸೇರಿದಂತೆ—RSF ನಿಯಂತ್ರಣದಲ್ಲಿದ್ದು, ಪ್ರಮುಖ ನಗರಗಳನ್ನು ಸೇನೆ ಹಿಡಿದಿಟ್ಟಿದೆ. ಇತ್ತೀಚಿನ ವಾರಗಳಲ್ಲಿ, ಎಲ್-ಡಾಇನ್ ನಗರವು ಪುನಃಪುನಃ ದಾಳಿಗೆ ಒಳಗಾಗುತ್ತಿದೆ. ಸರ್ಕಾರದ ಪಡೆಗಳು RSF ವಿಸ್ತರಣೆಯನ್ನು ತಡೆಯಲು ಪ್ರಯತ್ನಿಸುತ್ತಿವೆ. ಕೋರ್ಡೋಫಾನ್ ಮತ್ತು ದರ್ಫೂರ್ ಪ್ರದೇಶಗಳಲ್ಲಿ ಯುದ್ಧ ಇನ್ನಷ್ಟು ತೀವ್ರಗೊಂಡಿದ್ದು, ದೇಶದ ವಿವಿಧ ಭಾಗಗಳಲ್ಲಿ ವಿಭಜಿತ ಸಂಘರ್ಷಗಳು ಉಂಟಾಗುತ್ತಿವೆ. ಡ್ರೋನ್ ದಾಳಿಗಳು ಮತ್ತು ವಾಯು ದಾಳಿಗಳ ಬಳಕೆ ಹೆಚ್ಚುತ್ತಿರುವುದು ಪರಿಸ್ಥಿತಿಯನ್ನು ಇನ್ನಷ್ಟು ಅಪಾಯಕರಗೊಳಿಸಿದೆ. 2026ರ ಜನವರಿ ಅಂತ್ಯದಿಂದ ಫೆಬ್ರವರಿ ಆರಂಭದವರೆಗೆ, ಕೋರ್ಡೋಫಾನ್ ಪ್ರದೇಶದಲ್ಲಿ ನಡೆದ ವಾಯು ದಾಳಿಗಳಲ್ಲಿ 90ಕ್ಕೂ ಹೆಚ್ಚು ನಾಗರಿಕರು ಮೃತಪಟ್ಟಿದ್ದಾರೆ. ಫೆಬ್ರವರಿ 7ರಂದು, ಉತ್ತರ ಕೋರ್ಡೋಫಾನ್ನಲ್ಲಿ ನಡೆದ ಮತ್ತೊಂದು ಡ್ರೋನ್ ದಾಳಿಯಲ್ಲಿ 8 ಮಕ್ಕಳನ್ನೂ ಒಳಗೊಂಡಂತೆ ಕನಿಷ್ಠ 24 ಜನರು ಮೃತಪಟ್ಟಿದ್ದಾರೆ.
ತೀವ್ರಗೊಳ್ಳುತ್ತಿರುವ ಮಾನವೀಯ ಸಂಕಷ್ಟ
ಮಾನವೀಯ ಪರಿಸ್ಥಿತಿ ದಿನದಿಂದ ದಿನಕ್ಕೆ ಹದಗೆಡುತ್ತಿದೆ. ಎಲ್-ಫಾಶರ್ ನಗರವು RSF ಪಡೆಗಳಿಂದ ಸುತ್ತುವರಿಯಲ್ಪಟ್ಟು, ಈ ಸಂಕಷ್ಟದ ಪ್ರತೀಕವಾಗಿ ಪರಿಣಮಿಸಿದೆ. ವಾಸಸ್ಥಳಗಳು, ಮೂಲಸೌಕರ್ಯ ಮತ್ತು ನೆರವು ಸಾಗಣೆ ವಾಹನಗಳ ಮೇಲೆ ನಡೆಯುತ್ತಿರುವ ದಾಳಿಗಳು, ಸಹಾಯ ಕಾರ್ಯಗಳನ್ನು ಗಂಭೀರವಾಗಿ ಅಡ್ಡಿಪಡಿಸುತ್ತಿವೆ. ಫೆಬ್ರವರಿ 6ರಂದು, ವಿಶ್ವ ಆಹಾರ ಕಾರ್ಯಕ್ರಮದ (WFP) ವಾಹನದ ಮೇಲೆ ನಡೆದ ದಾಳಿಯಲ್ಲಿ ಸಾವಿರಾರು ಜನರಿಗೆ ನೀಡಬೇಕಿದ್ದ ಆಹಾರ ಸಾಮಗ್ರಿಗಳು ನಾಶಗೊಂಡವು. ರಾಜಕೀಯ ಅಸ್ಥಿರತೆ ಮತ್ತು ನಿರಂತರ ಹಿಂಸಾಚಾರ—ಇವುಗಳ ಸಂಯೋಜನೆಯಿಂದ ಮಾತುಕತೆಗಳ ಮೂಲಕ ಪರಿಹಾರ ಕಂಡುಕೊಳ್ಳುವ ಪ್ರಯತ್ನಗಳು ಇನ್ನಷ್ಟು ಕಷ್ಟಕರವಾಗುತ್ತಿವೆ.
ಹಸಿವು ಮತ್ತು ನೋವಿನ ತೀವ್ರತೆ
ಇತ್ತೀಚಿನ ಆಹಾರ ಭದ್ರತಾ ವರದಿಗಳ ಪ್ರಕಾರ, ಸುಡಾನಿನಾದ್ಯಂತ ಆಹಾರ ಪರಿಸ್ಥಿತಿ ವೇಗವಾಗಿ ಹದಗೆಡುತ್ತಿದೆ. ಉತ್ತರ ದರ್ಫೂರ್ ಪ್ರದೇಶದ ಉಮ್ ಬರು ಮತ್ತು ಕೆರ್ನೋಯಿ ಭಾಗಗಳಲ್ಲಿ ತೀವ್ರ ಪೌಷ್ಠಿಕಾಂಶ ಕೊರತೆ ಗಂಭೀರ ಮಟ್ಟ ತಲುಪಿದ್ದು, ಹೆಚ್ಚುವರಿ ಸಾವುಗಳ ಅಪಾಯ ಹೆಚ್ಚಿದೆ. ಮಹಿಳೆಯರು ಮತ್ತು ಮಕ್ಕಳನ್ನು ಒಳಗೊಂಡು ಕೋಟ್ಯಾಂತರ ಜನರು ತೀವ್ರ ಹಸಿವು ಮತ್ತು ಪೌಷ್ಠಿಕಾಂಶ ಕೊರತೆಯಿಂದ ಬಳಲುತ್ತಿದ್ದಾರೆ.
ಯುದ್ಧಕ್ಕೆ ಅಂತ್ಯ ಕಾಣುವ ಲಕ್ಷಣಗಳಿಲ್ಲದಿರುವ ಈ ಸಂದರ್ಭದಲ್ಲಿ, ಸುಡಾನ್ ದೇಶವು ಹಿಂಸಾಚಾರ, ಸ್ಥಳಾಂತರ ಮತ್ತು ಹಸಿವು ಎಲ್ಲವೂ ಒಂದೇ ಸಮಯದಲ್ಲಿ ಜನರ ಬದುಕನ್ನು ಅಪಾಯಕ್ಕೆ ತಳ್ಳುತ್ತಿರುವ ಭೀಕರ ಸ್ಥಿತಿಯನ್ನು ಎದುರಿಸುತ್ತಿದೆ.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
