ತೇಹ್ರಾನ್ ಮೇಲೆ ನಿಲ್ಲದೆ ಮುಂದುವರೆಯುತ್ತಿರುವ ದಾಳಿಗಳು
ಲೇಖಕರು: ನೇತನ್ ಮಾರ್ಲೆ
ತೇಹ್ರಾನ್ನಿಂದ ಬಂದಿರುವ ಹೊಸ ಛಾಯಾಚಿತ್ರಗಳು ಅಮೆರಿಕಾ-ಇಸ್ರಾಯೇಲ್ ದಾಳಿಗಳ ಆರು ದಿನಗಳ ನಂತರ ಉಂಟಾದ ಭಾರೀ ನಾಶವನ್ನು ತೋರಿಸುತ್ತಿವೆ. ಗುರುವಾರ ಇರಾನ್ ರಾಜಧಾನಿಯ ವಿವಿಧ ಭಾಗಗಳಲ್ಲಿ ಮತ್ತೆ ಹೊಸ ಸ್ಫೋಟಗಳು ಸಂಭವಿಸಿದ ಬಗ್ಗೆ ವರದಿಯಾಗಿದೆ.
ಇಸ್ರಾಯೇಲ್ನಲ್ಲಿ ಸೇನೆ ನೀಡಿದ ಮಾಹಿತಿಯ ಪ್ರಕಾರ, ದಿನದ ಆರಂಭದಲ್ಲಿ ಆಕಾಶದಲ್ಲಿ ಸ್ಫೋಟಗಳು ಕಂಡುಬಂದ ನಂತರ ಇರಾನ್ನಿಂದ ಮತ್ತಷ್ಟು ದಾಳಿಗಳು ನಡೆದಿವೆ. ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟಿಸಿದ ಹೇಳಿಕೆಯಲ್ಲಿ, ಇಸ್ರಾಯೇಲ್ ರಕ್ಷಣಾ ಪಡೆಗಳು ಒಳಬರುವ ಕ್ಷಿಪಣಿಗಳನ್ನು ತಡೆಗಟ್ಟಲು ರಕ್ಷಣಾ ವ್ಯವಸ್ಥೆಗಳು ಕಾರ್ಯನಿರ್ವಹಿಸುತ್ತಿವೆ ಎಂದು ತಿಳಿಸಿವೆ. ಜೊತೆಗೆ ಪರಿಣಾಮ ಬೀರುವ ಪ್ರದೇಶಗಳಲ್ಲಿ ವಾಸಿಸುವ ಜನರಿಗೆ ಎಚ್ಚರಿಕೆ ಸಂದೇಶಗಳನ್ನು ಕಳುಹಿಸಲಾಗಿದೆ ಎಂದು ಸೇನೆ ಹೇಳಿದೆ.
ಇದೇ ವೇಳೆ ಗಡಿ ಉದ್ವಿಗ್ನತೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ಇಸ್ರಾಯೇಲ್ ಸೇನೆ ಬೈರೂತ್ನ ದಕ್ಷಿಣ ಜಿಲ್ಲೆಗಳಲ್ಲಿ ವಾಸಿಸುವ ಜನರು ಪೂರ್ವ ದಿಕ್ಕಿನತ್ತ ಸ್ಥಳಾಂತರಗೊಳ್ಳುವಂತೆ ಸೂಚಿಸಿದೆ.
ಸಂಯುಕ್ತ ಅರಬ್ ಎಮಿರೇಟ್ಸ್(UAE) ಗುರುವಾರ ಇರಾನ್ನ ಆರು ಕ್ಷಿಪಣಿಗಳು ಮತ್ತು 131 ಡ್ರೋನ್ಗಳನ್ನು ತಡೆದಿರುವುದಾಗಿ ತಿಳಿಸಿದೆ. ಆದರೆ ಒಂದು ಕ್ಷಿಪಣಿ ಮತ್ತು ಆರು ಡ್ರೋನ್ಗಳು ದೇಶದೊಳಗೆ ಬಿದ್ದಿರುವುದಾಗಿ ಅಧಿಕಾರಿಗಳು ದೃಢಪಡಿಸಿದ್ದಾರೆ. ಕತಾರ್ ಮತ್ತು ಬಹ್ರೇನ್ ದೇಶಗಳಲ್ಲಿಯೂ ಸ್ಫೋಟಗಳು ಸಂಭವಿಸಿರುವುದಾಗಿ ವರದಿಯಾಗಿದೆ. ಅಜರ್ಬೈಜಾನ್ ಎರಡು ಇರಾನಿ ಡ್ರೋನ್ಗಳು ತನ್ನ ವಾಯುಪ್ರದೇಶಕ್ಕೆ ಪ್ರವೇಶಿಸಿದ್ದವೆಂದು ತಿಳಿಸಿದೆ. ಅದೇ ವೇಳೆ ಉತ್ತರ ಗಲ್ಫ್ ಪ್ರದೇಶದಲ್ಲಿ ಒಂದು ತೈಲ ಸಾಗಣೆ ಹಡಗು ಹಾನಿಗೊಳಗಾದ ಘಟನೆ ವರದಿಯಾಗಿದೆ. ಈ ಘಟನೆಯಲ್ಲಿ ಅಮೆರಿಕದ ಹಡಗು ಭಾಗಿಯಾಗಿತ್ತು ಎಂದು ಇರಾನ್ ಹೇಳಿದೆ.
ಉತ್ತರ ಇರಾಕ್ನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಇರಾನಿ ಕುರ್ದಿಶ್ ಗುಂಪುಗಳು ತಮ್ಮ ಯೋಧರು ಇರಾನ್ ಗಡಿಯನ್ನು ದಾಟಿದ್ದಾರೆ ಎಂಬ ಆರೋಪಗಳನ್ನು ತಳ್ಳಿಹಾಕಿವೆ.
ಘರ್ಷಣೆಯ ಆರನೇ ದಿನಕ್ಕೆ ತಲುಪಿದ ಸಂದರ್ಭದಲ್ಲಿ, (EU)ಯುರೋಪಿಯನ್ ಯೂನಿಯನ್ನ ಇನ್ನಷ್ಟು ನಾಯಕರು ಸೈಪ್ರಸ್ ಮತ್ತು ಗಲ್ಫ್ ಮಿತ್ರ ರಾಷ್ಟ್ರಗಳಿಗೆ ರಕ್ಷಣಾ ಬೆಂಬಲ ನೀಡುವುದಾಗಿ ಘೋಷಿಸಿದ್ದಾರೆ. ಗ್ರೀಸ್, (UK)ಯುನೈಟೆಡ್ ಕಿಂಗ್ಡಮ್ ಮತ್ತು ಫ್ರಾನ್ಸ್ ಎರಡು ದಿನಗಳ ಹಿಂದೆ ಸೈಪ್ರಸ್ಗೆ ನೌಕಾಪಡೆ ಮತ್ತು ವಾಯು ರಕ್ಷಣಾ ವ್ಯವಸ್ಥೆಗಳನ್ನು ನಿಯೋಜಿಸುವುದಾಗಿ ತಿಳಿಸಿದ್ದವು. ಅಕ್ರೋಟಿರಿ ಪ್ರದೇಶದಲ್ಲಿರುವ ರಾಯಲ್ ಏರ್ ಫೋರ್ಸ್ ನೆಲೆ ಡ್ರೋನ್ ದಾಳಿಗೆ ಗುರಿಯಾದ ನಂತರ ಈ ಕ್ರಮ ಕೈಗೊಳ್ಳಲಾಗಿದೆ. ಇಟಲಿ ಮತ್ತು ಸ್ಪೇನ್ ಈಗ ಈ ಕ್ರಮಗಳಿಗೆ ಸೇರ್ಪಡೆಯಾಗಿವೆ. ನೆದರ್ಲ್ಯಾಂಡ್ಸ್ ಕೂಡ ಹೆಚ್ಚುವರಿ ಸಹಾಯ ಒದಗಿಸುವ ಬಗ್ಗೆ ಪರಿಶೀಲಿಸುತ್ತಿದೆ.
ಇದರ ನಡುವೆ (EU)ಯುರೋಪಿಯನ್ ಯೂನಿಯನ್ ವಿದೇಶಾಂಗ ನೀತಿ ಮುಖ್ಯಸ್ಥೆ ಕಾಜಾ ಕಾಲ್ಲಾಸ್, ಮಧ್ಯಪ್ರಾಚ್ಯದ ಸರ್ಕಾರಗಳು ಇರಾನ್ ಒಳಗೆ ಅಂತರ್ಯುದ್ಧದ ಅಪಾಯ ಹೆಚ್ಚುತ್ತಿರುವ ಬಗ್ಗೆ ಯುರೋಪಿಯನ್ ಅಧಿಕಾರಿಗಳಿಗೆ ಎಚ್ಚರಿಕೆ ನೀಡಿವೆ ಎಂದು ತಿಳಿಸಿದ್ದಾರೆ. ಈ ಪ್ರದೇಶದಲ್ಲಿ ಸಮುದ್ರ ಭದ್ರತೆ ಕುರಿತು ಕೂಡ ಯುರೋಪಿಯನ್ ಯೂನಿಯನ್ ಹೆಚ್ಚುತ್ತಿರುವ ಚಿಂತೆಯನ್ನು ವ್ಯಕ್ತಪಡಿಸಿದೆ.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
