ಸೋಮಾಲಿಯಾದಲ್ಲಿ ಮರುಕಳಿಸಿದ ಹಸಿವಿನ ಸಂಕಟ: ವಿಶ್ವಸಂಸ್ಥೆಯ ಎಚ್ಚರಿಕೆ

ಲೇಖಕರು: ಸಹೋದರಿ ಕ್ರಿಸ್ಟಿನ್ ಮಸಿವೋ, CPS 

ವಿಶ್ವ ಸಂಸ್ಥೆಯ ಎಚ್ಚರಿಕೆಯ ಪ್ರಕಾರ, 2026ರ ಮೊದಲ ಮೂರು ತಿಂಗಳಲ್ಲಿ ಸುಮಾರು 6.5 ಮಿಲಿಯನ್ ಜನರು ತೀವ್ರ ಆಹಾರ ಅಭಾವವನ್ನು ಎದುರಿಸುವ ಸಾಧ್ಯತೆ ಇದೆ. ಈ ಅಂದಾಜುಗಳನ್ನು ‘ಸಮಗ್ರ ಆಹಾರ ಭದ್ರತಾ ಹಂತದ ವರ್ಗೀಕರಣ (Integrated Food Security Phase Classification-IPC)’ ಹೊಸ ವರದಿ ಸೂಚಿಸಿದೆ.

ವ್ಯಾಟಿಕನ್‌ನ ಫಿಡೆಸ್ ಸುದ್ದಿಸಂಸ್ಥೆಯ ಪ್ರಕಾರ, ಅತ್ಯಂತ ಅಸುರಕ್ಷಿತ ವರ್ಗದಲ್ಲಿ ಐದು ವರ್ಷಕ್ಕಿಂತ ಕಡಿಮೆ ವಯಸ್ಸಿನ 1.8 ಮಿಲಿಯನ್ ಮಕ್ಕಳು ಸೇರಿದ್ದಾರೆ. ಇವರಲ್ಲಿ ಸುಮಾರು ಐದು ಲಕ್ಷ ಮಕ್ಕಳು ಈಗಾಗಲೇ ತೀವ್ರ ಅಪೌಷ್ಟಿಕತೆಯಿಂದ ಬಳಲುತ್ತಿದ್ದಾರೆ.

ಸುಮಾರು 19 ಮಿಲಿಯನ್ ಜನಸಂಖ್ಯೆ ಹೊಂದಿರುವ ಸೋಮಾಲಿಯಾದಲ್ಲಿ, ಜನಸಂಖ್ಯೆಯ ಮೂರನೇ ಭಾಗವನ್ನು ಆಹಾರ ಭದ್ರತೆಯ ಮೂರನೇ ಹಂತಕ್ಕೆತೀವ್ರ ಆಹಾರ ಅಭಾವ)  ವರ್ಗೀಕರಿಸಲಾಗಿದೆ. ಇನ್ನೂ 4 ಮಿಲಿಯನ್ ಜನರು ಹಂತ 4ಕ್ಕೆ, ಅಂದರೆ ತುರ್ತು ಪರಿಸ್ಥಿತಿಗೆ ತಲುಪಿದ್ದಾರೆ. ಪ್ರಸ್ತುತ ಪರಿಸ್ಥಿತಿ ವಿನಾಶಕಾರಿ ಹಂತದ ಅಂಚಿನಲ್ಲಿದೆ ಎಂದು ವರದಿ ಎಚ್ಚರಿಸುತ್ತದೆ.

ಹವಾಮಾನ ಆಘಾತ

ಈ ಹಸಿವಿನ ಸಂಕಟಕ್ಕೆ ಪ್ರಮುಖ ಕಾರಣವಾಗಿ 2025ರ ಎರಡನೇ ಅರ್ಧದಲ್ಲಿ ಸಂಭವಿಸಿದ ಭೀಕರ ಬರ ಗುರುತಿಸಲಾಗಿದೆ. ಎರಡು ವರ್ಷಗಳ ಮಳೆಗಾಲದಿಂದ ಸ್ವಲ್ಪ ಮಟ್ಟಿಗೆ ದೊರಕಿದ್ದ ಪರಿಹಾರವನ್ನು ಈ ಬರ ಅಕಸ್ಮಿಕವಾಗಿ ಕೊನೆಗೊಳಿಸಿತು. 2025ರ ಆರಂಭದಲ್ಲೇ ಸುಮಾರು 3.4 ಮಿಲಿಯನ್ ಜನರು ತೀವ್ರ ಆಹಾರ ಅಭಾವದಿಂದ ಪ್ರಭಾವಿತರಾಗಿದ್ದರು; ಈಗ ಈ ಸಂಖ್ಯೆ ವೇಗವಾಗಿ ಹೆಚ್ಚುತ್ತಿದೆ.

ಕೃಷಿ ಮತ್ತು ಪಶುಪಾಲನೆಗೆ ಅವಲಂಬಿತವಾಗಿರುವ ಮಧ್ಯ ಮತ್ತು ದಕ್ಷಿಣ ಪ್ರದೇಶಗಳು ಅತ್ಯಂತ ಹಾನಿಗೊಳಗಾಗಿವೆ. ವಿಶೇಷವಾಗಿ ಪಶುಸಂಗೋಪನೆ ಮಾಡುವವರು, ಸಣ್ಣ ರೈತರು ಮತ್ತು ಒಳನಾಡು ಸ್ಥಳಾಂತರಿತರು ಹೆಚ್ಚು ಸಂಕಷ್ಟ ಅನುಭವಿಸುತ್ತಿದ್ದಾರೆ. ಉತ್ತರ ಪ್ರದೇಶಗಳಲ್ಲಿ ಹಾನಿ ತುಸು ಕಡಿಮೆ ಇದ್ದರೂ ಸಂಕಷ್ಟದ ಪರಿಣಾಮ ಅಲ್ಲಿ ಸಹ ಕಾಣುತ್ತಿದೆ.

ಆದರೆ ಹವಾಮಾನ ಬಿಕ್ಕಟ್ಟು ಮಾತ್ರ ಸಮಸ್ಯೆಯಾಗಿಲ್ಲ. ಜಿಹಾದಿ ಹಿಂಸಾಚಾರ ಮತ್ತು ರಾಜಕೀಯ ಅಸ್ಥಿರತೆ ಜೀವನೋಪಾಯಗಳನ್ನು ಅಸ್ತವ್ಯಸ್ತಗೊಳಿಸುತ್ತಿದ್ದು, ಮಾನವೀಯ ನೆರವಿನ ಪ್ರವೇಶಕ್ಕೂ ಅಡೆತಡೆ ಉಂಟುಮಾಡುತ್ತಿದೆ. ಇದಲ್ಲದೆ, ಆಮದು ಸರಕುಗಳ ಬೆಲೆ ಏರಿಕೆಯಿಂದ ಅನೇಕ ಕುಟುಂಬಗಳಿಗೆ ಅವುಗಳನ್ನು ಖರೀದಿಸುವುದು ಅಸಾಧ್ಯವಾಗಿದೆ.

ಅಂತರರಾಷ್ಟ್ರೀಯ ನೆರವು ಕೂಡ ತೀವ್ರವಾಗಿ ಕುಂಠಿತವಾಗಿದೆ. ಜನವರಿಯಲ್ಲಿ ನೆರವಿನ ಅಗತ್ಯವಿದ್ದವರಲ್ಲಿ ಕೇವಲ 17% ಜನರಿಗೆ ಮಾತ್ರ ಸಹಾಯ ತಲುಪಿತ್ತು, ಇತ್ತೀಚಿನ ಅಂಕಿಅಂಶಗಳ ಪ್ರಕಾರ ಇದು 9%ಕ್ಕೆ ಇಳಿದಿದೆ.

ಸರ್ಕಾರದ ಪ್ರತಿಕ್ರಿಯೆ ಮತ್ತು ತುರ್ತು ನೆರವಿನ ಮನವಿ

ಆಹಾರ ಸಂಕಷ್ಟ ಗಂಭೀರವಾಗುತ್ತಿರುವ ಹಿನ್ನೆಲೆಯಲ್ಲಿ, ಸರ್ಕಾರದ ಅಧಿಕಾರಿಗಳು ಇತ್ತೀಚೆಗೆ ಮೊಗಾದಿಶುದಲ್ಲಿ ಸಭೆಗಳನ್ನು ನಡೆಸಿ ಪರಿಹಾರ ಮಾರ್ಗಗಳನ್ನು ಚರ್ಚಿಸಿದ್ದಾರೆ.

ಈ ಸಭೆಗಳಲ್ಲಿ ಪ್ರಧಾನ ಮಂತ್ರಿಗಳ ಕಚೇರಿ, ಶಿಕ್ಷಣ ಮತ್ತು ಸಂಸ್ಕೃತಿ ಸಚಿವಾಲಯ ಹಾಗೂ ವಿಪತ್ತು ನಿರ್ವಹಣಾ ಸಂಸ್ಥೆ (SODMA) ಪ್ರತಿನಿಧಿಗಳು ಭಾಗವಹಿಸಿದ್ದರು. ರಾಷ್ಟ್ರೀಯ ಪ್ರತಿಕ್ರಿಯೆಯನ್ನು ಬಲಪಡಿಸುವ ಬಗ್ಗೆ ಚರ್ಚೆ ನಡೆದರೂ, ಸಮಗ್ರ ಪರಿಹಾರ ರೂಪುಗೊಂಡಿಲ್ಲ ಎಂದು ಗಮನಿಸಲಾಗಿದೆ. ತಜ್ಞರ ಪ್ರಕಾರ, ಪ್ರಸ್ತಾಪಿಸಲಾದ ಕ್ರಮಗಳು ಪರಿಸ್ಥಿತಿಯ ತೀವ್ರತೆಯನ್ನು ಗಮನಿಸಿದರೆ ಅಪರ್ಯಾಪ್ತವಾಗಿವೆ.

ವಿಪತ್ತು ನಿರ್ವಹಣಾ ಸಂಸ್ಥೆಯ ನಿರ್ದೇಶಕ ಮಹ್ಮೂದ್ ಮೊಅಲ್ಲಿಂ ಅಬ್ದುಲ್ಲೆ ಸೋಮಾಲಿ ನಾಗರಿಕರು ಮತ್ತು ವಿದೇಶದಲ್ಲಿರುವ ಸೋಮಾಲಿ ವಲಸಿಗರಿಗೆ ಬರ ಪರಿಹಾರ ಕಾರ್ಯಗಳಿಗೆ ಆರ್ಥಿಕ ನೆರವು ನೀಡುವಂತೆ ಮನವಿ ಮಾಡಿದ್ದಾರೆ. ಈ ಮನವಿ ದೇಶೀಯ ಐಕ್ಯತೆಯ ಜೊತೆಗೆ ಅಂತರರಾಷ್ಟ್ರೀಯ ಸಮುದಾಯದ ಹೊಸ ತೊಡಗಿಸಿಕೊಳ್ಳುವಿಕೆಯ ಅಗತ್ಯತೆಯನ್ನು ಸೂಚಿಸುತ್ತದೆ.

ಸೋಮಾಲಿಯಾ ಈಗ ರಾಜಕೀಯ ಅಸ್ಥಿರತೆ, ಹವಾಮಾನ ಬಿಕ್ಕಟ್ಟು ಮತ್ತು ಮಾನವೀಯ ಸಂಕಷ್ಟಗಳ ಸಮಕಾಲೀನ ಒತ್ತಡಗಳನ್ನು ಎದುರಿಸುತ್ತಿದೆ. ಈ ಪರಿಸ್ಥಿತಿ ಮುಂದುವರೆದರೆ ಮಾನವೀಯ ಸಂಕಷ್ಟ ಇನ್ನಷ್ಟು ದೀರ್ಘವಾಗುವ ಅಪಾಯವಿದೆ.

ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).