ಉಕ್ರೇನ್: ನಿರಾಶ್ರಿತರ ಸ್ಥಗಿತಗೊಂಡ ಜೀವನಗಳು
ಲೇಖಕರು: ಸ್ಟೆಫಾನೊ ಲೆಸ್ಜ್ಜಿನ್ಸ್ಕಿ
ರಷ್ಯಾ,- ಉಕ್ರೇನ್ನ ಯುದ್ಧವು ಐದನೇ ವರ್ಷಕ್ಕೆ ಪ್ರವೇಶಿಸಿದೆ. ಇದು ಕೇವಲ ವಿವಾದಾತ್ಮಕ ಪ್ರದೇಶಗಳನ್ನು ಮಾತ್ರವಲ್ಲ, ಅದಕ್ಕಿಂತ ಮೇಲಾಗಿ ಮುರಿದ ಜೀವನಗಳು ಮತ್ತು ವಿಭಜಿತ ಸಮುದಾಯಗಳನ್ನು ನಮ್ಮ ಮುಂದೆ ಸವಾಲಾಗಿ ಇಟ್ಟಿದೆ. ಮನೆಗಳು, ಶಾಲೆಗಳು, ಆಸ್ಪತ್ರೆಗಳು ಹಾಗೂ ಶಕ್ತಿಸೌಕರ್ಯಗಳು ನಿರಂತರವಾಗಿ ದಾಳಿಗೆ ಗುರಿಯಾಗುತ್ತಿದ್ದು, ನಾಗರಿಕರ ಮೇಲೆ ನೇರ ಪರಿಣಾಮ ಬೀರುತ್ತಿವೆ.
ಉಕ್ರೇನ್ನಲ್ಲಿನ ವಿಶ್ವ ಸಂಸ್ಥೆಯ ಮಾನವ ಹಕ್ಕುಗಳ ಮೇಲ್ವಿಚಾರಣಾ ಮಿಷನ್ ಪ್ರಕಾರ, 2025 ನಾಗರಿಕರಿಗಾಗಿ ಅತ್ಯಂತ ಪ್ರಾಣಘಾತಕ ವರ್ಷವಾಗಿತ್ತು: 2,500 ಕ್ಕೂ ಹೆಚ್ಚು ಮಂದಿ ಪ್ರಾಣ ಕಳೆದುಕೊಂಡಿದ್ದು, 12,000 ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಈ ಅಂಕಿಅಂಶಗಳು ಸಂಘರ್ಷವು ಇನ್ನೂ ಪರಿಹಾರದಿಂದ ದೂರವಿರುವುದನ್ನು ದೃಢಪಡಿಸುತ್ತಿದ್ದು, ದಾಳಿಗಳ ತೀವ್ರತೆ ಹಾಗೂ ಅವುಗಳ ಅಗತ್ಯ ಮೂಲಸೌಕರ್ಯಗಳ ಮೇಲಿನ ಪರಿಣಾಮಗಳನ್ನು ಸ್ಪಷ್ಟಪಡಿಸುತ್ತವೆ.
ಸ್ವಗೃಹಗಳಿಂದ ದೂರವಾದ 1 ಕೋಟಿ ಉಕ್ರೇನ್ ನಾಗರಿಕರು
ಪ್ರಸ್ತುತ ಸುಮಾರು 1 ಕೋಟಿ ಉಕ್ರೇನ್ ನಾಗರಿಕರು ತಮ್ಮ ಮನೆಗಳಿಂದ ದೂರವಾಗಿ ಜೀವನ ಸಾಗಿಸುತ್ತಿದ್ದಾರೆ. ಇವರಲ್ಲಿ 37 ಲಕ್ಷ ಜನರು ದೇಶದೊಳಗೇ ಸ್ಥಳಾಂತರಿತರಾಗಿದ್ದು, ಸಂಘರ್ಷ ಪ್ರದೇಶಗಳನ್ನು ತೊರೆದಿದ್ದರೂ ದೇಶದ ಗಡಿಗಳೊಳಗೆ ಉಳಿದಿದ್ದಾರೆ. ಇನ್ನೂ 59 ಲಕ್ಷ ಜನರು ವಿದೇಶಗಳಲ್ಲಿ ರಕ್ಷಣೆಯನ್ನು ಆಶ್ರಯಿಸಿದ್ದಾರೆ.
“ವಿದೇಶಗಳಿಗೆ ಉಕ್ರೇನ್ ಶರಣಾರ್ಥಿಗಳ ಹರಿವು ಇನ್ನೂ ವಾಸ್ತವಿಕತೆಯೇ ಆಗಿದೆ,” ಎಂದು ಉಕ್ರೇನ್ನ ವಿಶ್ವ ಸಂಸ್ಥೆಯ ನಿರಾಶ್ರಿತರ ಉನ್ನತ ಆಯುಕ್ತರ ಕಚೇರಿ ಪ್ರತಿನಿಧಿ ಎಲಿಸಬೆತ್ ಹಾಸ್ಲುಂಡ್ ತಿಳಿಸಿದ್ದಾರೆ. ನಿರಂತರ ಮೂಲಸೌಕರ್ಯ ದಾಳಿಗಳಿಂದ ಉಂಟಾದ ಶಕ್ತಿಸಂಕಷ್ಟದಿಂದ ಭದ್ರತೆ ಕೊರತೆ ಮುಂದುವರಿಯುತ್ತಿರುವುದು ಇದರ ಪ್ರಮುಖ ಕಾರಣವಾಗಿದೆ.
ಯುರೋಸ್ಟಾಟ್ ಅಂಕಿಅಂಶಗಳ ಪ್ರಕಾರ, 2025ರಲ್ಲಿ ಯುರೋಪಿಯನ್ ಒಕ್ಕೂಟವು—ಶೆಂಗೆನ್ ಪ್ರದೇಶಕ್ಕೆ ಸಂಬಂಧಿಸಿದ ಐಸ್ಲ್ಯಾಂಡ್, ಲಿಚ್ಟೆನ್ಸ್ಟೈನ್, ನಾರ್ವೆ ಮತ್ತು ಸ್ವಿಟ್ಜರ್ಲ್ಯಾಂಡ್ ಸೇರಿ—ಉಕ್ರೇನ್ ನಾಗರಿಕರಿಗೆ 6 ಲಕ್ಷ 70 ಸಾವಿರ ತಾತ್ಕಾಲಿಕ ನಿವಾಸ ಅನುಮತಿಗಳನ್ನು ನೀಡಿದೆ. ಇದು 2024ರಿಗಿಂತ 12 ಶೇಕಡಾ ಕಡಿಮೆಯಾಗಿದೆ.
ಉಕ್ರೇನ್ ಗಡಿಗಳೊಳಗಿನ ತುರ್ತು ಪರಿಸ್ಥಿತಿ
ದೇಶದೊಳಗೆ ಕನಿಷ್ಠ 1 ಕೋಟಿ 10 ಲಕ್ಷ ಜನರು ಮಾನವೀಯ ನೆರವಿನ ಅಗತ್ಯವನ್ನು ಎದುರಿಸುತ್ತಿದ್ದಾರೆ. ಈ ಸಂಖ್ಯೆಯ ಹಿಂದೆ ಆಹಾರ, ಆಶ್ರಯ, ವೈದ್ಯಕೀಯ ಚಿಕಿತ್ಸೆ, ಮಾನಸಿಕ ಬೆಂಬಲ ಮತ್ತು ಮೂಲಭೂತ ಸೇವೆಗಳು ಮುಂತಾದ ನೈಜ ಅಗತ್ಯಗಳು ಅಡಗಿವೆ. ದೇಶದೊಳಗಿನ ಸ್ಥಳಾಂತರಿತರ ಬಹುಪಾಲು ಜನರು ತಮ್ಮ ಮನೆಗಳಿಗೆ ಸಾಧ್ಯವಾದಷ್ಟು ಸಮೀಪವಾಗಿರಲು ಪೂರ್ವ ಭಾಗಗಳಲ್ಲಿ—ವಿಶೇಷವಾಗಿ ಖಾರ್ಕಿವ್ ಮತ್ತು ಡ್ನಿಪ್ರೋ ಪ್ರದೇಶಗಳಲ್ಲಿ ಸೇರಿಕೊಂಡಿದ್ದಾರೆ.
ರಾಜಧಾನಿ ಕೀವ್ ನಗರವೂ ನಿರಾಶ್ರಿತರ ನಿರಂತರ ಪ್ರವಾಹದಿಂದ ಒತ್ತಡಕ್ಕೆ ಒಳಗಾಗಿದೆ. ವಿಶೇಷವಾಗಿ ವೃದ್ಧರು ಮತ್ತು ದುರ್ಬಲ ವರ್ಗಗಳಿಗೆ ವಾಸಸ್ಥಳದ ಸಮಸ್ಯೆ ಅತ್ಯಂತ ತುರ್ತು ಪ್ರಶ್ನೆಯಾಗಿದೆ. ಪರ್ಯಾಯ ವ್ಯವಸ್ಥೆಗಳಿಲ್ಲದವರಿಗಾಗಿ ವಾಸಸ್ಥಳ ಮತ್ತು ಆರೋಗ್ಯ ಸೇವೆಗಳನ್ನು ಒದಗಿಸುವುದು ವಿಶ್ವ ಸಂಸ್ಥೆಯ ನಿರಾಶ್ರಿತರ ಉನ್ನತ ಆಯುಕ್ತರ ಕಚೇರಿ ಪ್ರಮುಖ ಆದ್ಯತೆಗಳಲ್ಲೊಂದಾಗಿದೆ.
ಸಮನ್ವಯತೆಗೆ ಸವಾಲುಗಳು
ಇಟಲಿಯ ಸಾಮಾಜಿಕ ಹಿನ್ನೆಲೆಯಲ್ಲಿಯೂ ಉಕ್ರೇನ್ ನಿರಾಶ್ರಿತರು ವಿಶಿಷ್ಟ ಸವಾಲುಗಳನ್ನು ಎದುರಿಸುತ್ತಿದ್ದಾರೆ. “ಇಟಲಿಯಲ್ಲಿ ಇರುವ ಉಕ್ರೇನ್ ನಾಗರಿಕರು ಶಾಶ್ವತವಾಗಿ ನೆಲೆಯಾಗಲು ಬಯಸುವವರಂತೆ ಕಾಣಿಸಿಕೊಂಡಿಲ್ಲ,” ಎಂದು ಇಟಲಿಯ ವಿಶ್ವ ಸಂಸ್ಥೆಯ ಶರಣಾರ್ಥಿ ಉನ್ನತ ಆಯುಕ್ತರ ಕಚೇರಿ ಪ್ರತಿನಿಧಿ ಫಿಲಿಪ್ಪೊ ಉಂಗಾರೊ ತಿಳಿಸಿದ್ದಾರೆ. ಅನೇಕ ಮಕ್ಕಳು ಇನ್ನೂ ಆನ್ಲೈನ್ ಮೂಲಕ ಉಕ್ರೇನ್ ಶಾಲಾ ಪಾಠಗಳನ್ನು ಮುಂದುವರಿಸುತ್ತಿದ್ದು, ಇಟಾಲಿಯನ್ ಭಾಷೆಯ ಪ್ರಾವೀಣ್ಯ ಮಟ್ಟವು ತಾತ್ಕಾಲಿಕವಾಗಿಯೇ ಉಳಿದಿದೆ.
ಇನ್ನೊಂದು ಗಂಭೀರ ಸಮಸ್ಯೆ ನಗರಸಭೆ ನೋಂದಣಿಗೆ ಸಂಬಂಧಿಸಿದೆ: ಅನೇಕರು ನೋಂದಾಯಿಸಿಕೊಳ್ಳದ ಕಾರಣ ಸಾಮಾಜಿಕ ಸೇವೆಗಳು ಮತ್ತು ಬಾಡಿಗೆ ಅನುದಾನಗಳ ಪ್ರವೇಶವನ್ನು ಕಳೆದುಕೊಳ್ಳುತ್ತಿದ್ದಾರೆ. ಹೆಚ್ಚಿನ ಸಂದರ್ಭಗಳಲ್ಲಿ ಅವರು ಬಂಧುಗಳು ಮತ್ತು ಸ್ನೇಹಿತರ ಅನೌಪಚಾರಿಕ ಜಾಲಗಳ ಮೇಲೆ ಅವಲಂಬಿತರಾಗಿದ್ದಾರೆ.
ಸಹನಶೀಲತೆ: ಸಾಮಾನ್ಯವಾಗಿ ಪರಿಗಣಿಸಬಾರದ ವಾಸ್ತವಿಕತೆ
2025ರ ಎರಡನೇ ಅರ್ಧದಲ್ಲಿ ಸ್ಥಳಾಂತರಿತರು ಹಾಗೂ ಇತರೆ ದುರ್ಬಲ ವರ್ಗಗಳಿಗಾಗಿ ಅಪಾಯಗಳು ಹೆಚ್ಚಾದವು. ಆದಾಗ್ಯೂ, ಬಾಂಬ್ ದಾಳಿಗಳು ಮತ್ತು ದೈನಂದಿನ ಸಂಕಷ್ಟಗಳ ನಡುವೆಯೂ ಜನರು ತಮ್ಮ ಕೆಲಸಗಳಿಗೆ ತೆರಳಿ ಮಕ್ಕಳನ್ನು ಶಾಲೆಗೆ ಕರೆದೊಯ್ಯುವ ಜೀವನವನ್ನು ಮುಂದುವರಿಸುತ್ತಿದ್ದಾರೆ. ಆದರೆ ಈ ಸಹನಶೀಲತೆಯನ್ನು ಸಾಮಾನ್ಯ ಪರಿಸ್ಥಿತಿಯಂತೆ ಪರಿಗಣಿಸಬಾರದು.
ಹೊರಗೆ ಕಾಣುವ ಹೊಂದಿಕೊಳ್ಳುವ ಸಾಮರ್ಥ್ಯದ ಹಿಂದೆ ನಿರಂತರ ಒತ್ತಡ—ವಿಶೇಷವಾಗಿ ಮಾನಸಿಕ ಒತ್ತಡ—ಅಡಗಿದೆ. ನಿರಾಶ್ರಿತರಲ್ಲಿ 42 ಶೇಕಡಾ ಮಂದಿ ಮಾನಸಿಕ ಆರೋಗ್ಯಕ್ಕೆ ಸಂಬಂಧಿಸಿದ ಸಂಕಷ್ಟಗಳನ್ನು ಅನುಭವಿಸುತ್ತಿರುವುದಾಗಿ ವರದಿ ಮಾಡಿದ್ದು, ವೃದ್ಧರು, ದೀರ್ಘಕಾಲಿಕ ಕಾಯಿಲೆ ಹೊಂದಿರುವವರು ಹಾಗೂ ಏಕಪೋಷಕ ಕುಟುಂಬಗಳಲ್ಲಿ ಈ ಪ್ರಮಾಣ ಇನ್ನಷ್ಟು ಹೆಚ್ಚಾಗಿದೆ.
ಸ್ವಗೃಹಗಳಿಗೆ ಮರಳುವುದಕ್ಕೆದುರಾಗಿರುವ ಸವಾಲುಗಳು
ಎಲ್ಲದರ ನಡುವೆಯೂ, ಸುಮಾರು 14 ಲಕ್ಷ ನಿರಾಶ್ರಿತರು ಕನಿಷ್ಠ ಮೂರು ತಿಂಗಳುಗಳ ಕಾಲ ಉಳಿದುಕೊಳ್ಳುವ ಉದ್ದೇಶದಿಂದ ಉಕ್ರೇನ್ಗೆ ಮರಳಿದ್ದಾರೆ. ಪರಿಸ್ಥಿತಿಗಳು ಅನುಕೂಲವಾದಾಗ ಮರಳುವ ಬಯಕೆ ವ್ಯಾಪಕವಾಗಿರುವುದಕ್ಕೆ ಇದು ಸಂಕೇತವಾಗಿದೆ. ವಿಶ್ವ ಸಂಸ್ಥೆಯ ನಿರಾಶ್ರಿತರ ಉನ್ನತ ಆಯುಕ್ತರ ಕಚೇರಿ ನಡೆಸಿದ ಇತ್ತೀಚಿನ ಉದ್ದೇಶ ಸಮೀಕ್ಷೆಯ ಪ್ರಕಾರ, ವಿದೇಶಗಳಲ್ಲಿ ಇರುವ ಶರಣಾರ್ಥಿಗಳಲ್ಲಿ 61 ಶೇಕಡಾ ಹಾಗೂ ದೇಶದೊಳಗಿನ ಸ್ಥಳಾಂತರಿತರಲ್ಲಿ 73 ಶೇಕಡಾ ಮಂದಿ ಒಂದಲ್ಲ ಒಂದು ದಿನ ತಮ್ಮ ಸ್ವಗೃಹಗಳಿಗೆ ಮರಳುವ ಆಶೆಯನ್ನು ವ್ಯಕ್ತಪಡಿಸಿದ್ದಾರೆ.
ಆದಾಗ್ಯೂ, ತಮ್ಮ ಮೂಲ ನಿವಾಸಗಳಿಗೆ ಮರಳಲು ಸಾಧ್ಯವಿಲ್ಲವೆಂದು ಒಪ್ಪಿಕೊಂಡವರ ಸಂಖ್ಯೆಯೂ ಹೆಚ್ಚುತ್ತಿದೆ. ಸಂಘರ್ಷದಿಂದ ಹಾನಿಗೊಳಗಾದ 55,000 ಕ್ಕೂ ಹೆಚ್ಚು ಮನೆಗಳನ್ನು ದುರಸ್ತಿ ಮಾಡಲು ವಿಶ್ವ ಸಂಸ್ಥೆಯ ನಿರಾಶ್ರಿತರ ಉನ್ನತ ಆಯುಕ್ತರ ಕಚೇರಿ ಸಹಕಾರ ನೀಡಿದೆ. ಆದರೆ ಇತ್ತೀಚಿನ ಅಂತರರಾಷ್ಟ್ರೀಯ ಸಹಕಾರ ಕಡಿತಗಳಿಂದ ಉಂಟಾದ ಆರ್ಥಿಕ ಸಂಕಷ್ಟಗಳು ನೆರವು ಕಾರ್ಯಗಳನ್ನು ಮಿತಿಗೊಳಿಸುತ್ತಿವೆ: ಕಡಿಮೆ ಸಂಪನ್ಮೂಲಗಳು ಎಂದರೆ ಕಡಿಮೆ ಜನರಿಗೆ ನೆರವು.
ಮುಂಚೂಣಿ ರೇಖೆ ನಿಧಾನವಾಗಿ ಬದಲಾಗುತ್ತಲೇ ಇದೆ. ಆದರೆ ಅತ್ಯಂತ ಆಳವಾದ ಭೇದವು ಕೇವಲ ಭೌಗೋಳಿಕವಲ್ಲ; ಶಾಂತಿಯ ನಿರೀಕ್ಷೆ ಮತ್ತು ಸ್ವಗೃಹಗಳಿಂದ ದೂರದಲ್ಲೇ ಭವಿಷ್ಯವನ್ನು ಮರುನಿರ್ಮಿಸಬೇಕಾದ ಅವಶ್ಯಕತೆಯ ನಡುವೆ ಸಿಲುಕಿರುವ ಲಕ್ಷಾಂತರ ಜನರ ಜೀವನಗಳಲ್ಲಿ ಸ್ಪಷ್ಟವಾಗಿ ಗೋಚರಿಸುತ್ತದೆ.
ನಮ್ಮ ಲೇಖನವನ್ನು ಓದಿದ್ದಕ್ಕಾಗಿ ಧನ್ಯವಾದಗಳು. ನಮ್ಮ ದೈನಂದಿನ ಸುದ್ದಿಪತ್ರಕ್ಕೆ ಚಂದಾದಾರರಾಗುವ ಮೂಲಕ ನೀವು ಸದಾ ಇತ್ತೀಚಿನ ಮಾಹಿತಿಯನ್ನು ಪಡೆದುಕೊಳ್ಳಬಹುದು.(ಇಲ್ಲಿ ಕ್ಲಿಕ್ ಮಾಡಿ).
