ಇರಾನ್ನಲ್ಲಿ ಪ್ರತಿಭಟನಾಕಾರರ ಮೇಲೆ ಭದ್ರತಾ ಪಡೆಗಳಿಂದ ಅಶ್ರುವಾಯು ಪ್ರಯೋಗ
ಇರಾನ್ನಲ್ಲಿ ತೀವ್ರಗೊಳ್ಳುತ್ತಿರುವ ಆರ್ಥಿಕ ಸಂಕಷ್ಟದ ವಿರುದ್ಧ ಆರಂಭವಾದ ರಾಷ್ಟ್ರವ್ಯಾಪಿ ಪ್ರತಿಭಟನೆಗಳ ಹನ್ನೆರಡನೇ ದಿನದಂದು, ಇರಾನಿನ ಭದ್ರತಾ ಪಡೆಗಳು ಜನಸಮೂಹವನ್ನು ಚದುರಿಸಲು ಅಶ್ರುವಾಯು ಬಳಸಿವೆ. ಆರಂಭದಲ್ಲಿ ಆರ್ಥಿಕ ಕಾರಣಗಳಿಂದ ಹುಟ್ಟಿದ ಈ ಪ್ರತಿಭಟನೆಗಳು ನಂತರ ಸರ್ಕಾರ ವಿರೋಧಿ ಚಳವಳಿಯಾಗಿ ವಿಸ್ತರಿಸಿವೆ.
ಇರಾನ್ ಮಾನವ ಹಕ್ಕುಗಳು (ಇರಾನ್ ಹ್ಯೂಮನ್ ರೈಟ್ಸ್ -IHR) ಎಂಬ ಎನ್ಜಿಒ ಪ್ರಕಾರ, ದಕ್ಷಿಣ-ಪೂರ್ವ ಇರಾನ್ನ ಕೆರ್ಮಾನ್ ನಗರದಲ್ಲಿ ಭದ್ರತಾ ಪಡೆಗಳು ಗುಂಡಿನ ದಾಳಿ ನಡೆಸಿದ್ದು, ಅಶ್ರುವಾಯು ಬಳಸಿ ನಾಗರಿಕರ ಮೇಲೆ ಹಲ್ಲೆ ನಡೆಸಿವೆ.
ಮಂಗಳವಾರ ಬಿಡುಗಡೆ ಮಾಡಿದ ವರದಿಯಲ್ಲಿ, ಐದು ಅಪ್ರಾಪ್ತರೂ ಸೇರಿ ಕನಿಷ್ಠ 27 ಪ್ರತಿಭಟನಾಕಾರರು ಮೃತಪಟ್ಟಿದ್ದಾರೆ ಎಂದು ಸಂಸ್ಥೆ ತಿಳಿಸಿದೆ.
ಅಮೆರಿಕಾದಲ್ಲಿರುವ ಮಾನವ ಹಕ್ಕುಗಳ ಕಾರ್ಯಕರ್ತರ ಸುದ್ದಿ ಸಂಸ್ಥೆ (ಹ್ಯೂಮನ್ ರೈಟ್ಸ್ ಆಕ್ಟಿವಿಸ್ಟ್ಸ್ ನ್ಯೂಸ್ ಏಜೆನ್ಸಿ -HRANA) ಪ್ರಕಾರ, ಈ ಅಶಾಂತಿ ದೇಶದ ಎಲ್ಲಾ 31 ಪ್ರಾಂತ್ಯಗಳ 111 ನಗರಗಳು ಮತ್ತು ಪಟ್ಟಣಗಳಿಗೆ ವಿಸ್ತರಿಸಿದೆ.
ಕನಿಷ್ಠ 34 ಪ್ರತಿಭಟನಾಕಾರರು ಮತ್ತು ನಾಲ್ವರು ಭದ್ರತಾ ಸಿಬ್ಬಂದಿ ಮೃತಪಟ್ಟಿದ್ದು, ಸುಮಾರು 2,200 ಜನರನ್ನು ಬಂಧಿಸಲಾಗಿದೆ ಎಂದು ಸಂಸ್ಥೆ ವರದಿ ಮಾಡಿದೆ.
ಆರ್ಥಿಕ ಆತಂಕದಿಂದ ಆರಂಭವಾದ ಪ್ರತಿಭಟನೆಗಳು
ಡಿಸೆಂಬರ್ 28ರಂದು, ಇರಾನಿನ ಕರೆನ್ಸಿಯಾದ ರಿಯಾಲ್ ಅಮೆರಿಕನ್ ಡಾಲರ್ ಎದುರು ಮತ್ತೆ ತೀವ್ರವಾಗಿ ಮೌಲ್ಯ ಕಳೆದುಕೊಂಡ ಬಳಿಕ, ತೆಹ್ರಾನ್ನ ಅಂಗಡಿ ಮಾಲೀಕರು ಬೀದಿಗಿಳಿದಾಗ ಈ ಪ್ರತಿಭಟನೆಗಳು ಆರಂಭವಾದವು.
ನಂತರ ವಿಶ್ವವಿದ್ಯಾಲಯ ವಿದ್ಯಾರ್ಥಿಗಳು ಸೇರಿಕೊಂಡರು. ಪ್ರತಿಭಟನೆಗಳು ಇತರ ನಗರಗಳಿಗೂ ಹರಡಿದ್ದು, ಜನಸಮೂಹವು ಸರ್ವಾಧಿಕಾರಿ ಅಯಾತೊಲ್ಲಾ ಅಲಿ ಖಾಮೆನೇಯಿ ವಿರುದ್ಧ ಘೋಷಣೆಗಳನ್ನು ಕೂಗಿತು.
ಇದು 2022ರಲ್ಲಿ ಮಹ್ಸಾ ಅಮಿನಿ ಎಂಬ ಯುವ ಕುರ್ದಿಶ್ ಮಹಿಳೆಯ ಸಾವಿನ ಬಳಿಕ ಉಂಟಾದ ಮಹಾ ಪ್ರತಿಭಟನೆಯ ನಂತರದ ಅತಿ ವ್ಯಾಪಕ ಅಶಾಂತಿ ಎಂದು ಪರಿಗಣಿಸಲಾಗುತ್ತಿದೆ. ಹಿಜಾಬ್ ನಿಯಮ ಉಲ್ಲಂಘನೆ ಆರೋಪದ ಮೇಲೆ ನೀತಿಪಾಲನಾ ಪೊಲೀಸರು ಬಂಧಿಸಿದ ಬಳಿಕ ಅವಳು ಸಾವನ್ನಪ್ಪಿದ್ದರು.
ಮಾನವ ಹಕ್ಕು ಸಂಘಟನೆಗಳ ಪ್ರಕಾರ, ಆ ಸಮಯದ ದಮನ ಕಾರ್ಯಾಚರಣೆಯಲ್ಲಿ 550ಕ್ಕಿಂತ ಹೆಚ್ಚು ಜನರು ಮೃತಪಟ್ಟಿದ್ದು, ಸುಮಾರು 20,000 ಜನರನ್ನು ಬಂಧಿಸಲಾಗಿತ್ತು.
