ಮಾಸ್ಕೋದಲ್ಲಿ ಆರ್ಚ್ಬಿಷಪ್ ಗ್ಯಾಲಘರ್: ಶಾಂತಿಯ ಅನ್ವೇಷಣೆಯಲ್ಲಿ ರಾಜತಾಂತ್ರಿಕತೆ ಮತ್ತು ಸಂವಾದ.
ವ್ಯಾಟಿಕನ್ ವರದಿ
ಆರ್ಚ್ಬಿಷಪ್ ಪಾಲ್ ರಿಚರ್ಡ್ ಗ್ಯಾಲಘರ್, ರಾಜ್ಯಗಳೊಂದಿಗಿನ ಮತ್ತು ಅಂತರರಾಷ್ಟ್ರೀಯ ಸಂಸ್ಥೆಗಳೊಂದಿಗಿನ ಸಂಬಂಧಗಳಿಗಾಗಿ ಜಗದ್ಗುರುಗಳ ಅಧಿಕಾರ ಸ್ಥಳದ ಕಾರ್ಯದರ್ಶಿ, ಆಗಸ್ಟ್ 24ರಿಂದ 28ರವರೆಗೆ ರಷ್ಯಾದ ರಾಜಧಾನಿ ಮಾಸ್ಕೋಗೆ ಭೇಟಿ ನೀಡುತ್ತಿದ್ದಾರೆ.
ಮಾಸ್ಕೋ ಪ್ರವಾಸದ ಸಂದರ್ಭದಲ್ಲಿ ಅವರು ರಷ್ಯಾ ಒಕ್ಕೂಟದ ಅಧಿಕಾರಿಗಳು, ಮಾಸ್ಕೋ ಪ್ಯಾಟ್ರಿಯಾರ್ಕೇಟ್ನ ಪ್ರತಿನಿಧಿಗಳು ಹಾಗೂ ಅಲ್ಲಿನ ಕಥೊಲಿಕ ಸಮುದಾಯದ ಸದಸ್ಯರನ್ನು ಭೇಟಿಯಾಗಲಿದ್ದಾರೆ.
ನಾಲ್ಕು ದಿನಗಳ ಈ ಮಹತ್ವದ ಮಾತುಕತೆಗಳು ಮತ್ತು ಸಭೆಗಳು ಭೇಟಿಯ ರಾಜತಾಂತ್ರಿಕ ಆಯಾಮದ ಜೊತೆಗೆ ಧರ್ಮ ಸಭೆಗೆ ಸಂಬಂಧಿಸಿದ ಆಯಾಮವನ್ನೂ ಒಳಗೊಂಡಿರಲಿವೆ. ರಷ್ಯಾ ಒಕ್ಕೂಟದಲ್ಲಿರುವ ಬಿಷಪ್ಗಳು ಹಾಗೂ ಕಥೊಲಿಕ ಸಮುದಾಯದೊಂದಿಗೆ ಅವರು ಭೇಟಿಗಳು ಮತ್ತು ಸಂವಾದಗಳನ್ನು ನಡೆಸಲಿದ್ದಾರೆ.
ಈ ಮಹತ್ವದ ಪ್ರವಾಸಕ್ಕೆ ಧರ್ಮಸೌಹಾರ್ದದ ಆಯಾಮವೂ ಇರಲಿದ್ದು, ಮಾಸ್ಕೋ ಪ್ಯಾಟ್ರಿಯಾರ್ಕೇಟ್ನ ಪ್ರತಿನಿಧಿಗಳೊಂದಿಗೆ ಸಭೆಗಳು ನಡೆಯಲಿವೆ. ಜಗತ್ತಿನಾದ್ಯಂತ ಅಂತರರಾಷ್ಟ್ರೀಯ ಸಂಬಂಧಗಳು ಅತ್ಯಂತ ಕಠಿಣ ಪರಿಸ್ಥಿತಿಯನ್ನು ಎದುರಿಸುತ್ತಿರುವ ಈ ಸಂದರ್ಭದಲ್ಲಿ ಕೂಡ, ಸಂವಾದದ ಮಾರ್ಗವನ್ನು ಮುಂದುವರಿಸಲು ಪವಿತ್ರ ಸಿಂಹಾಸನವು ದೃಢಸಂಕಲ್ಪ ಹೊಂದಿದೆ ಎಂಬುದನ್ನು ಈ ಕಾರ್ಯಕ್ರಮ ಸ್ಪಷ್ಟಪಡಿಸುತ್ತದೆ.
ಆರ್ಚ್ಬಿಷಪ್ ಗ್ಯಾಲಘರ್ ರವರಿಗೆ ರಷ್ಯಾದ ರಾಜಧಾನಿಗೆ ಇದು ಮೊದಲ ಭೇಟಿಯಲ್ಲ. ಅವರು ಕೊನೆಯ ಬಾರಿ 2021ರ ನವೆಂಬರ್ನಲ್ಲಿ ಮಾಸ್ಕೋಗೆ ಭೇಟಿ ನೀಡಿದ್ದರು. ಆ ಸಂದರ್ಭದಲ್ಲಿ ಅವರು ಪ್ರಧಾನಿ ಮಿಖಾಯಿಲ್ ಮಿಶುಸ್ಟಿನ್, ವಿದೇಶಾಂಗ ಸಚಿವ ಸೆರ್ಗೇಯ್ ಲಾವ್ರೊವ್ ಹಾಗೂ ಅಂದಿನ ಮಾಸ್ಕೋ ಪ್ಯಾಟ್ರಿಯಾರ್ಕೇಟ್ನ ಬಾಹ್ಯ ಧರ್ಮ ಸಭೆಯ ಸಂಬಂಧಗಳ ಇಲಾಖೆಯ ಮುಖ್ಯಸ್ಥರಾಗಿದ್ದ ಮೆಟ್ರೋಪಾಲಿಟನ್ ಹಿಲಾರಿಯನ್ ಅಲ್ಫೆಯೆವ್ ಅವರನ್ನು ಭೇಟಿಯಾಗಿದ್ದರು. 2022ರಿಂದ ಬಾಹ್ಯ ಚರ್ಚ್ ಸಂಬಂಧಗಳ ಇಲಾಖೆಯ ನೇತೃತ್ವವನ್ನು ಮೆಟ್ರೋಪಾಲಿಟನ್ ಆಂಥನಿ ಸೆವ್ರ್ಯುಕ್ ವಹಿಸಿಕೊಂಡಿದ್ದು, ಅವರು ಮೆಟ್ರೋಪಾಲಿಟನ್ ಹಿಲಾರಿಯನ್ ಅವರ ಉತ್ತರಾಧಿಕಾರಿಯಾಗಿದ್ದಾರೆ.
ರಾಜತಾಂತ್ರಿಕ ಭೇಟಿಗಳ ಜೊತೆಗೆ, ಈ ಪ್ರವಾಸವು ಆರ್ಚ್ಬಿಷಪ್ ಗ್ಯಾಲಘರ್ ರವರಿಗೆ ಮಾಸ್ಕೋದಲ್ಲಿನ ಕಥೊಲಿಕ ಸಮುದಾಯವನ್ನು ಭೇಟಿಯಾಗುವ ಅವಕಾಶವನ್ನೂ ನೀಡಲಿದೆ. ರಾಜ್ಯಗಳೊಂದಿಗಿನ ಸಂಬಂಧಗಳ ಕಾರ್ಯದರ್ಶಿಯಾಗಿ ಅವರು ಬಿಷಪ್ಗಳು ಹಾಗೂ ಸ್ಥಳೀಯ ಕಥೊಲಿಕ ಸಮುದಾಯದ ಪ್ರತಿನಿಧಿಗಳೊಂದಿಗೆ ಮಾತುಕತೆ ನಡೆಸಲಿದ್ದಾರೆ. ಅವರು ಪವಿತ್ರ ಯೂಕರಿಸ್ಟ್ ಆಚರಣೆಗೆ ಅಧ್ಯಕ್ಷತೆ ವಹಿಸುವುದರ ಜೊತೆಗೆ ಗುರುಗಳು ಹಾಗೂ ಪುರುಷ ಮತ್ತು ಮಹಿಳಾ ಧಾರ್ಮಿಕ ಸಮರ್ಪಿತ ವ್ಯಕ್ತಿಗಳನ್ನು ಭೇಟಿಯಾಗಲಿದ್ದಾರೆ.
ರಷ್ಯಾದ ಕಥೊಲಿಕ ಧರ್ಮ ಸಭೆ ಸಂಖ್ಯಾತ್ಮಕವಾಗಿ ಸಣ್ಣ ಸಮುದಾಯವಾಗಿದ್ದು, ವಿಶಾಲವಾದ ಭೌಗೋಳಿಕ ಪ್ರದೇಶದಾದ್ಯಂತ ಹರಡಿಕೊಂಡಿದೆ. ಅದರ ಧರ್ಮಪ್ರಾಂತೀಯ ರಚನೆಯಲ್ಲಿ ಮಾಸ್ಕೋದಲ್ಲಿರುವ ದೇವಮಾತೆಯ ಆರ್ಚ್ಡಯೋಸಿಸ್, ಸರತೋವ್ನ ಸಂತ ಕ್ಲೆಮೆಂಟ್ ಡಯೋಸಿಸ್, ನೊವೊಸಿಬಿರ್ಸ್ಕ್ನ ರೂಪಾಂತರದ ಡಯೋಸಿಸ್ ಮತ್ತು ಇರ್ಕುಟ್ಸ್ಕ್ನ ಸಂತ ಜೋಸೆಫ್ ಡಯೋಸಿಸ್ ಸೇರಿವೆ.
