“ಲೆಬನಾನ್ನಲ್ಲಿ ರಾಯಭಾರಿಗಳ ನೇತೃತ್ವದ ಮಾನವೀಯ ನೆರವು ತಂಡ ಗುಂಡಿನ ಚಕಮಕಿಯ ಮಧ್ಯೆ ಸಿಲುಕಿತು”.
ವ್ಯಾಟಿಕನ್ ವರದಿ
ಲೆಬನಾನ್ನ ಪ್ರೇಷಿತರ ರಾಯಭಾರಿ ಆರ್ಚ್ಬಿಷಪ್ ಪಾವ್ಲೊ ಬೋರ್ಜಿಯಾರವರ ನೇತೃತ್ವದಲ್ಲಿ, ದಾನ ಸಂಸ್ಥೆಯ ಹಾಗೂ ಇತರ ಕಥೋಲಿಕ ಸಂಸ್ಥೆಗಳ ಸಹಯೋಗದೊಂದಿಗೆ ದಕ್ಷಿಣ ಲೆಬನಾನ್ನ ಮೂರು ಕ್ರೈಸ್ತ ಗ್ರಾಮಗಳಿಗೆ ಮಾನವೀಯ ನೆರವು ತಲುಪಿಸಲು ಒಂದು ದೊಡ್ಡ ನೆರವು ಪಡೆಯನ್ನು ಆಯೋಜಿಸಲಾಗಿತ್ತು. ಆದರೆ ಇಸ್ರೇಲ್ ಸೇನೆ ಮತ್ತು ಹಿಜ್ಬುಲ್ಲಾ ಪಡೆಗಳ ನಡುವಿನ ಗುಂಡಿನ ಚಕಮಕಿಯ ಕಾರಣ, ಈ ನೆರವು ತಂಡವು ತನ್ನ ನಿಗದಿತ ಮಾರ್ಗವನ್ನು ಬದಲಾಯಿಸಬೇಕಾಯಿತು.
ಬೈರೂತ್ನಿಂದ ಬೆಳಗ್ಗೆಯೇ ಹೊರಟಿದ್ದ 45 ಟ್ರಕ್ಗಳು ಮತ್ತು ವಾಹನಗಳನ್ನು ಒಳಗೊಂಡ ಈ ತಂಡವು ಡೆಬೆಲ್ ಗ್ರಾಮವನ್ನು ತಲುಪುವ ಮುನ್ನವೇ ಭದ್ರತಾ ಪರಿಸ್ಥಿತಿ ಹದಗೆಟ್ಟ ಕಾರಣ ಮುಂದುವರಿಯಲು ಸಾಧ್ಯವಾಗಲಿಲ್ಲ. ಸಂಬಂಧಿತ ಅಧಿಕಾರಿಗಳೊಂದಿಗೆ ಪೂರ್ವಭಾವಿಯಾಗಿ ಸಮನ್ವಯಗೊಳಿಸಿದ್ದ ಮಾರ್ಗವನ್ನು ಬಳಸಲು ಸಾಧ್ಯವಾಗದೆ, ಹೊಸ ಮಾರ್ಗದ ಮೂಲಕ ಸುರಕ್ಷಿತವಾಗಿ ಸಾಗುವ ವ್ಯವಸ್ಥೆ ಮಾಡಬೇಕಾಯಿತು ಎಂದು ಆರ್ಚ್ಬಿಷಪ್ ಬೋರ್ಜಿಯಾ ವಿವರಿಸಿದರು.
ಈ ವಾಹನಗಳಲ್ಲಿ ಆಹಾರ ಸಾಮಗ್ರಿಗಳು, ಹಣ್ಣುಗಳು, ತರಕಾರಿಗಳು, ಕುಡಿಯುವ ನೀರು, ಔಷಧಿಗಳು ಮತ್ತು ಇಂಧನವನ್ನು ಸಾಗಿಸಲಾಗುತ್ತಿತ್ತು. ಡೆಬೆಲ್ ಮಾತ್ರವಲ್ಲದೆ ಐನ್ ಎಬೆಲ್ ಮತ್ತು ರ್ಮೈಶ್ ಗ್ರಾಮಗಳ ನಿವಾಸಿಗಳಿಗೂ ಈ ನೆರವು ತಲುಪಬೇಕಾಗಿತ್ತು. ಅಲ್ಲದೆ, ಅಗತ್ಯ ವಸ್ತುಗಳ ಕೊರತೆಯನ್ನು ಎದುರಿಸುತ್ತಿರುವ ಸ್ಥಳೀಯ ಅಂಗಡಿಗಳು, ರೈತರು ಮತ್ತು ಪಶುಪಾಲಕರಿಗೆ ಸಹಾಯವಾಗುವ ವಸ್ತುಗಳನ್ನೂ ಕೊಂಡೊಯ್ಯಲಾಗುತ್ತಿತ್ತು, ಇದರಿಂದ ಗ್ರಾಮಗಳ ಜೀವನ ಕ್ರಮೇಣ ಪುನರಾರಂಭಗೊಳ್ಳುವ ನಿರೀಕ್ಷೆ ಇತ್ತು.
ನೆರವು ವಾಹನಗಳ ಜೊತೆಗೆ ಕೆಲವು ಸ್ಥಳೀಯ ನಿವಾಸಿಗಳೂ ತಮ್ಮ ಮನೆಗಳಿಗೆ ಮರಳಲು ಪ್ರಯಾಣಿಸುತ್ತಿದ್ದರು. ಹಲವಾರು ವಾರಗಳಿಂದ ಸ್ಥಳಾಂತರಗೊಂಡಿದ್ದ ಅವರು ತಮ್ಮ ಗ್ರಾಮಗಳಿಗೆ ಹಿಂತಿರುಗಲು ಕಾಯುತ್ತಿದ್ದರು. ಗುಂಡಿನ ದಾಳಿ ನಡೆದಾಗ ಭಯದ ವಾತಾವರಣ ಇದ್ದರೂ, ಜನರು ಗಾಬರಿಗೊಳ್ಳಲಿಲ್ಲ ಎಂದು ನುಂಷಿಯೋ ಹೇಳಿದರು. “ಇಂತಹ ಸಂದರ್ಭಗಳು ಭಯಾನಕವಾಗಿರುತ್ತವೆ, ಆದರೆ ಸಮಾಧಾನದಿಂದ ಮತ್ತು ವಿವೇಕದಿಂದ ಪರಿಸ್ಥಿತಿಯನ್ನು ಎದುರಿಸಬೇಕಾಗುತ್ತದೆ” ಎಂದು ಅವರು ಹೇಳಿದರು.
ಅಂತಿಮವಾಗಿ, ಸುಮಾರು 10 ಗಂಟೆಗಳ ದೀರ್ಘ ಪ್ರಯಾಣದ ಬಳಿಕ ನೆರವು ತಂಡವು ಡೆಬೆಲ್ ತಲುಪಲು ಯಶಸ್ವಿಯಾಯಿತು. ಯುದ್ಧ ಮತ್ತು ಸೈನಿಕ ಕಾರ್ಯಾಚರಣೆಗಳಿಂದ ದೇಶದ ಉಳಿದ ಭಾಗಗಳಿಂದ ಬಹುತೇಕ ಪ್ರತ್ಯೇಕಗೊಂಡಿರುವ ಈ ಗ್ರಾಮಗಳಿಗೆ ನೆರವು ತಲುಪಿಸುವುದು ಅತ್ಯಂತ ಮಹತ್ವದ್ದಾಗಿದೆ ಎಂದು ಆರ್ಚ್ಬಿಷಪ್ ಬೋರ್ಜಿಯಾ ಒತ್ತಿಹೇಳಿದರು. “ನಾವು ಯುದ್ಧದ ಪರಿಸ್ಥಿತಿಯಲ್ಲಿದ್ದರೂ ಜನರಿಗೆ ನೆರವಾಗುವ ನಮ್ಮ ಬದ್ಧತೆಯನ್ನು ಮುಂದುವರಿಸುತ್ತೇವೆ. ಮುಂದಿನ ವಾರದಲ್ಲಿಯೇ ಮತ್ತೊಂದು ನೆರವು ತಂಡವನ್ನು ಕಳುಹಿಸುವ ಯೋಜನೆ ಇದೆ” ಎಂದು ಅವರು ಹೇಳಿದರು.
ಯುದ್ಧ ಆರಂಭವಾದ ನಂತರ ದಕ್ಷಿಣ ಲೆಬನಾನ್ಗೆ ಇದು ಇಪ್ಪತ್ತನೇ ಭೇಟಿ ಆಗಿದ್ದು, ಇದುವರೆಗೆ 17 ಮಾನವೀಯ ನೆರವು ಕಾರ್ಯಾಚರಣೆಗಳು ಮತ್ತು 3 ಪಾಸ್ತೋರಲ್ ಭೇಟಿಗಳನ್ನು ನಡೆಸಲಾಗಿದೆ ಎಂದು ಅವರು ತಿಳಿಸಿದರು. ಜನರ ನಡುವೆ ಹಾಜರಿರುವುದು ಕೇವಲ ಭೌತಿಕ ನೆರವು ನೀಡುವುದಲ್ಲ; ಅದು ಜಗದ್ಗುರುಗಳು, ವಿಶ್ವ ಧರ್ಮ ಸಭೆಯ ಮತ್ತು ಲೆಬನಾನ್ ಧರ್ಮ ಸಭೆಯ ಸಾನ್ನಿಧ್ಯವನ್ನು ಅವರಿಗೆ ಅನುಭವಿಸುವಂತೆ ಮಾಡುತ್ತದೆ ಎಂದು ಅವರು ಹೇಳಿದರು. “ಜನರು ತಾವು ಅರ್ಥೈಸಲ್ಪಟ್ಟಿದ್ದೇವೆ, ಬೆಂಬಲಿತವಾಗಿದ್ದೇವೆ ಮತ್ತು ಧರ್ಮ ಸಭೆಯ ಪ್ರೀತಿಯಿಂದ ಆಲಿಂಗಿಸಲ್ಪಟ್ಟಿದ್ದೇವೆ ಎಂದು ಅನುಭವಿಸಬೇಕಾಗಿದೆ. ಅದಕ್ಕಾಗಿ ನಮ್ಮ ಉಪಸ್ಥಿತಿ ಅತ್ಯಂತ ಮಹತ್ವದ್ದಾಗಿದೆ” ಎಂದು ಅವರು ಹೇಳಿದರು.
